၅.၆.၁၀။ စဳဝရအပနိဓာနသိက္ခာပိုဒ်

377) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳသတ္တရသဝဂ္ဂဳဂမၠိုၚ် ဟွံသီဂိုၚ်ဒေပ် ‘ပရိက္ခရာ’ အရပ်စပ်မပ္တံသ္ၚာဂမၠိုၚ်အိုတ်ရ။ ခမဳဆဗ္ဗဂ္ဂဳဂမၠိုၚ် ပၞုက်ထောံဗဗေၚ်သ္ၚာ ခမဳသတ္တရသဝဂ္ဂဳဂမၠိုၚ် အိုတ်ရ။ ခမဳသတ္တရသဝဂ္ဂဳဂမၠိုၚ် “ယွံကောန်တၠတအ် ဩဝ်ကဵုဗဗေၚ်သ္ၚာပိုဲညးဂမၠိုၚ်အိုတ်ညိ” ရဴဝွံ သ္ဂးကဵုခမဳဆဗ္ဗဂ္ဂဳအိုတ်ရ၊ ခမဳဆဗ္ဗဂ္ဂဳဂမၠိုၚ် ဂြိုၚ်ဂအှ်ေအိုတ်ရ၊ ခမဳသတ္တရသဝဂ္ဂဳဂမၠိုၚ် လရိုအ်ယာံအိုတ်ရ။ ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ် လရိုအ်ယာံအိုတ်ရော?၊ ရဴဝွံ သၟာန်အိုတ်ရ။ ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ ပၞုက်ထောံဗဗေၚ်သၞာ ပိုဲညးဂမၠိုၚ်အိုတ်ရ ရဴဝွံ ဟီုသ္ဂးအိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပၞုက်ထောံဗဗေၚ်သ္ၚာ ခမဳဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ပၞုက်ထောံဗဗေၚ်သ္ၚာ ခမဳဂမၠိုၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟဳတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်ပၞုက်ထောံဗေေၚ်သ္ၚာ ခမဳဂမၠိုၚ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

378) “ယြဴခမဳမွဲ ဗဗေၚ်ကီု သ္ၚာကီု သၞာနိသဳဒိုန်ကီု ဒကိုအ် (ဍေၚ်) တၞိၚ်ကီု ဇုက်ကာယဗန်ကီု ဂြပ်ခမဳဂှ် ပၞုက်လေဝ်ပၞုက်ကၠေံမ္ဂး၊ ဖအောဝ်လေဝ်ဖအောဝ်ကဵုပၞုက်ကၠေံမ္ဂး၊ ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် ပၞုက်ကၠေံမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။