၅.၆.၁.၁။ ပွံက်သုရာပနိသိက္ခာပိုဒ်

328) သိ မ္ဂးဂှ် သိမခၞံလဝ်နဝိုဟ် သိမခၞံလဝ်နကွာၚ် သိမခၞံလဝ်နပုၚ် သိစုတ်မအရက်မလံက်ချာတုဲမခၞံလဝ် ကဵုစိုန်သကီုကေုာံအရာဝတ္ထုတၞဟ်တၞဟ်တုဲ သိမခၞံလဝ်ရောၚ်။ အရက် မ္ဂးဂှ် အရက်မခၞံလဝ်နူပ္ကဴ အရက်မခၞံလဝ်နသတ် အရက်မခၞံလဝ်နသတ်ဗၠတ် အရက်မခၞံလဝ်နမပ္တံသတ်မုတ်ဒြာတ် အရက်မခၞံလဝ်နကဝ်တၚ်လာဲ ကဵုစိုန်သကီုကေုာံအရာဝတ္ထုတၞဟ်တၞဟ်တုဲ အရက်မခၞံလဝ်ရောၚ်။ သုၚ်မ္ဂး မ္ဂးဂှ် ဗွဲတွဵုမယုတ် နကၞုၚ်ကၟတ်သၠခိုဟ်လေဝ် သုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲသိအရက် မၞုံကဵုစၟတ်သမ္တီ သိအရက်ဒှ်တုဲ သုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲသိအရက်မၞုံကဵုသၠေဟ်ပၟာဒှ်တုဲ သုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲသိအရက် မၞုံကဵုစၟတ်သမ္တီ သိအရက်ဟွံသေၚ်ဒှ်တုဲ သုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲဟွံသေၚ်ကဵုသိအရက် မၞုံကဵုစၟတ်သမ္တီ သိအရက်မ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုသိအရက် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုသိအရက် မၞုံကဵုစၟတ်သမ္တီ သိအရက်ဟွံသေၚ်မ္ဂး၊ ဟွံဒးအာပတ်ရ။ 329) သီုဟွံသေၚ်ကဵုသိအရက် ဍာ်ပၠာဲ မၞုံကဵုသာ်သိအရက် သၟူအမြာဲသိအရက်ရှ်သာ် သိအရက်ဂှ် သုၚ်မ္ဂး၊ ပ္ဍဲအရာဖျိန်သွၜဲကီု ပ္ဍဲအရာဖျိန်သွဖျုန်ကီု ပ္ဍဲအရာဖျိန်ကၠေၚ်ကီု ပ္ဍဲတလုဲ (ဂမောဝ်) တၚ်လာဲကီု (တၞဟ်နသၟူအမြာဲဂွံခိုဟ် ဖျိန်စုတ်အရက်ဗၞတ်ညိနာၚ်တုဲ စမ္ဂး)၊ သုၚ်တဴ ဍာ်ပၠာဲ (ဍာ်ဂဥုဲလမ္စံက်) မၞုံကဵုယၟုအရိဋ္ဌ မဟွံသေၚ်ကဵုသိအရက်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သုရာပနသိက္ခာပိုဒ် ပဌမတုဲရ။