၅.၆.၁။ သုရာပနသိက္ခာပိုဒ်
326) တဳလမၞုံပိုဉ်ကျာ်တြဲ မပတၠပိုဉ်တြဴပြကာ က္ညဂေတ်ဂ္ၚေၚ်ဒေသစာရိတ် ပ္ဍဲစေတဳယရးမ္ဂး စိုပ်ကၠုၚ်ကွာန်ဘဒ္ဒဝတိကာရ။ ဂၟာဂၠဴ (ပၟၚ်ဂၠဴ) ပၟၚ်ဗ္ၜေအ် သ္ၚာဗ္ၚ ညးကွာ်တရဴဂမၠိုၚ် သ္ဂောံညာတ်ကေတ် တဳလမၞုံပိုဉ်ကျာ်တြဲ မက္ညကၠုၚ်နူဇမ္ၚောဲတုဲ “ယွံတဳလမၞုံပိုဉ် လ္ပက္ညအာသၞေဟ်တၞံကြုက်တေံညိ၊ ပ္ဍဲဘာအဿမပိုဒ်ရသိ သၞေဟ်တၞံကြုက်ဂှ် နာဂ်မဍိုက်ပေၚ်တဴကဵုကြဳဇှ် ဂျိမပြဟ်မသကာတ်မြဟ် ပဒတဴဒၟံၚ်ရကျာ်၊ နာဂ်ဂှ် လ္ပကဵုရာန်သကိုတ်ပြိုက်ပျဲ တဳလမၞုံပိုဉ်ကျာ်တြဲညိ” ရဴဝွံ ဂရၚ်ပတီအိုတ်ရ။ ဂရၚ်ပတီတိုန်ရဴဝွံမ္ဂး တဳလမၞုံပိုဉ်ကျာ်တြဲ ဒၟံၚ်ထောံသ္ၚိတ်သ္ၚိတ်ရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ဂၟာဂၠဴ (ပၟၚ်ဂၠဴ) ပၟၚ်ဗ္ၜေအ် သၟာဗ္ၚ ညးကွာ်တရဴဂမၠိုၚ် “ယွံတဳလမၞုံပိုဉ် လ္ပက္ညအာသၞေဟ်တၞံကြုက်တေံညိ၊ ပ္ဍဲဘာအဿမပိုဒ်ရသိ သၞေဟ်တၞံကြုက်ဂှ် နာဂ်မဍိုက်တဴကဵုကြဳဇှ် ဂျိမပြဟ်မသကာတ်မြဟ် ပဒတဴဒၟံၚ်ရကျာ်၊ နာဂ်ဂှ် လ္ပကဵုရာန်သကိုတ်ပြိုက်ပျဲ တဳလမၞုံပိုဉ်ကျာ်တြဲညိ” ရဴဝွံ ဂရၚ်ပတီတဳလမၞုံပိုဉ်ကျာ်တြဲအိုတ်ရ။ မရနုက်ကဵုပိဝါလေဝ် တဳလမၞုံကျာ်တြဲ ဒၟံၚ်ထောံသ္ၚိတ်သ္ၚိတ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂေတ်ဂ္ၚေၚ်ဒေသစာရိတ်မ္ဂး စိုပ်ကၠုၚ်ကွာန်ဘဒ္ဒဝတိကာတုဲ သ္ပဒတဴတန်ဒၟံၚ် ပ္ဍဲကွာန်ဘဒ္ဒဝတိကာဂှ်ဟေၚ်ရ။ ပ္ဍဲအခိၚ်ဂှ် တဳလပိုဉ်သာဂတ ပြာပ်အာဇရေၚ်ဘာအဿမပိုဒ်ရသိ သၞေဟ်တၞံကြုက်တုဲမ္ဂး လုပ်အာသ္ၚိဇရုၚ်ပၟတ်တုဲ လးကၠေံသၞာလးချောဲတုဲမ္ဂး တက်ထွာဲ သီုမစွံပတန်လဝ်ဇကုဗွဲတပ်တပ် ကဵုကတဵုဗဒှ်သတိ တူရူကဵုကမ္မဋ္ဌာန်တုဲ ဂဇအ်ဒၟံၚ်ရ။ ပ္ဍဲအခိၚ်ဂှ် နာဂ်ဂှ် ညာတ်ဒးတဳလပိုဉ်သာဂတလုပ်ကၠုၚ်တုဲ ဟွံမိပ်စိုတ်ဒှ်တုဲ ဗလးယေက်ရ၊ တဳလပိုဉ်သာဂတလေဝ် ဗလးယေက်ရ၊ ပ္ဍဲအခိၚ်ဂှ် နာဂ်ဂှ် အေၚ်ဒုၚ်ပၞတ်ဒေါသဟွံမာန်တုဲ ဗလးသၞပၟတ်ရ၊ တဳလပိုဉ်သာဂတလေဝ် လုပ်စ တေဇောကသိုဏ်တုဲ ဗလးသၞပၟတ်ရ၊ ပ္ဍဲအခိၚ်ဂှ် တဳလပိုဉ်သာဂတ ကဵုဖအိုတ်ကၠေံကြဳဇှ်နာဂ် နကဵုကြဳဇှ်ဇကုတုဲ ပြာပ်အာကွာန်ဘဒ္ဒဝတိကာရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ သ္ပဒတဴတန်ဒၟံၚ် ပ္ဍဲကွာန်ဘဒ္ဒဝတိကာ ဗွဲမမိပ်လဟိၚ်တုဲမ္ဂး က္ညဂေတ်ဂ္ၚေၚ်အာဒေသစာရိတ် ဍုက်ကောသမ္ဗဳရ။ ဥပးကောန်ဍုၚ်ကောသမ္ဗဳဂမၠိုၚ် “တဳလပိုဉ်သာဂတ တဝ်စၞေဟ်ပၞာန် ကေုာံနာဂ်မပဒတဴ ပ္ဍဲသၞေဟ်တၞံကြုက်ရဂး” ရဴဝွံ သ္ဂောံမိၚ်အိုတ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ အတိုၚ်လၟေၚ်လၟေၚ် က္ညဂေတ်ဂ္ၚေၚ်ဒေသစာရိတ်မ္ဂး စိုပ်ကၠုၚ်ဍုၚ်ကောသမ္ဗဳရ၊ ပ္ဍဲအခိၚ်ဂှ် ဥပးကောန်ဍုၚ်ကောမ္ဗဳဂမၠိုၚ် ဒစးဒုၚ်တၠုၚ်တရဴ တဳလမၞုံပိုဉ်ကျာ်တြဲတုဲ ပြာပ်အာဇရေၚ်တဳလပိုဉ်သာဂတတုဲ ပ္ဍဲကြဴ လ္ၚောဝ်သ္ပဝတ်တၠဳပိုဉ်သာဂတတုဲမ္ဂး သီုမဒတူဒၟံၚ် ပ္ဍဲဒၞဲါမွဲအိုတ်ဂှ် “ယွံတဳလပိုဉ် ကုတဳလပိုဉ်ဂမၠိုၚ် မုရဴဝတ္ထုပစ္စယ်မွဲ ဇြိုၚ်ကဵုကလိဂွံရော? သ္ဍိုက်မၠိုက်လေဝ် ဒှ်ရော? သ္ဂောံစဳရေၚ်တဴ မုရဴဝတ္ထုပစ္စယ်မွဲအိုတ်ရော?” ရဴဝွံ ဂရၚ်ပတီအိုတ်ရ။ ဂရၚ်ပတီတုန် ရဴဝွံမ္ဂး ခမဳဆဗ္ဗဂ္ဂဳဂမၠိုၚ် “ယွံဒကာတအ် သိအရက်မဇြုၚ်ကေဝ် မၞုံယၟုကာပေါတိက ‘မၞုံသာ်ဗကေတ် တုပ်သၟဟ်သာ်ဇိုၚ်ဖရာပ်’ ဂှ် ကုခမဳဂမၠိုၚ် ကလိဂွံလေဝ် ဇြိုၚ်ကဵုကလိဂွံရ၊ သ္ဍိုက်မၠိုက်လေဝ် ဒှ်ရ၊ ဩဝ်စဳရေၚ်တဴ သိအရက်ဂှ်အိုတ်ညိ” ရဴဝွံ သ္ဂးကဵုဥပးကောန်ဍုၚ်ကောသမ္ဗဳဂမၠိုၚ်အိုတ်ရ။ ပ္ဍဲအခိၚ်ဂှ် ဥပးကောန်ဍုၚ်ကောသမ္ဗဳဂမၠိုၚ် ပ္ဍဲဇၟာပ်သ္ၚိ စဳရေၚ်လဝ် သိအရက်မဇြုၚ်ကေဝ် မၞုံယၟုကာပေါတိကတုဲမ္ဂး သ္ဂောံညာတ်ကေတ် တဳလပိုဉ်သာဂတ မလုပ်ကၠုၚ်ဂ္ၚေၚ်ပိဏ္ဍပါတ်တုဲ “ယွံတဳလပိုဉ် တဳလပိုဉ်သာဂတ ဩဝ်သုၚ်တဴ သိအရက်မဇြၚ်ကေဝ်မၞုံယၟု ကာပေါတိကညိ၊ ယွံတဳလပိုဉ် တဳလပိုဉ်သာဂတ ဩဝ်သုၚ်တဴ သိအရက်မဇြုၚ်ကေဝ်မၞုံယၟုကာပေါတိကညိ” ရဴဝွံ ဂရၚ်ပတီ တဳလပိုဉ်သာဂတအိုတ်ရ။ ပ္ဍဲအခိၚ်ဂှ် တဳလပိုဉ်သာဂတ ပ္ဍဲဇၟာပ်သ္ၚိ သုၚ်တဴ သိအရက်မဇြၚ်ကေဝ်မၞုံယၟုကာပေါတိကတုဲ တိတ်ကၠုၚ်နူဍုၚ်မ္ဂး လောတ်လောစှေ် ပ္ဍဲပါၚ်တြၚ်ဍုၚ်ရ။ ပ္ဍဲအခိၚ်ဂှ် တဳလပိုဉ်ကျာ်တြဲ မွဲဟာန်ကေုာံခမဳဂမၠိုၚ်ဗွဲမဂၠိုၚ် တိတ်ကၠုၚ်နူဍုၚ်မ္ဂး ညာတ်ဒး တဳလပိုဉ်သာဂတ မလောတ်လောဒၟံၚ် ပ္ဍဲပါၚ်တြၚ်ဍုၚ်တုဲ “ယွံခမဳတအ် ဩဝ်ဂိုၚ်ကေတ်နၚ်သာဂတအိုတ်ညိ” ရဴဝွံ သ္ဂးကဵုခမဳဂမၠိုၚ်ရ။ ခမဳဂမၠိုၚ်ဂှ် “ခိုဟ်သန်ရ ယွံကျာ်မၞုံပိုဉ်” ရဴဝွံ ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ရၚ်တၠုၚ်ကေတ်နၚ် တဳလပိုဉ်သာဂတ ဇရေၚ်အာရှာမ်ဘာတုဲ သ္ပစွံက္ဍိုပ် ဌာန်တဳလမၞုံပိုဉ်ကျာ်တြဲတေံတုဲ သတိက်ကဵုအိုတ်ရ၊ ပ္ဍဲအခိၚ်ဂှ် တဳလပိုဉ်သာဂတ ဂေတ်ကလေၚ်တုဲ သ္ပကသဵုဏာဇိုၚ် ဌာန်တဳလမၞုံပိုဉ်ကျာ်တြဲတေံတုဲ တိက်တဴရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံခမဳတအ် ပ္ဍဲကိုပ်ကၠာတေံ သာဂတဂှ် မၞုံကဵုပွမရှေ်သှေ်ရဴဂဴ ပွမဇအ်သဝ်အောပ်မာ ပ္ဍဲအဲကျာ်ရ ဟွံသေၚ်ဟာ” ရဴဝွံ သၟာန်ခမဳဂမၠိုၚ်ရ။ ယွံတဳလမၞုံပိုဉ် မၞုံကဵုပွမရှေ်သှေ်ရဴဂဴ ပွမဇအ်သဝ်အောပ်မာဂှ် ဍာံပြရ ရဴဝွံ (ဂရၚ်ပတီအိုတ်ရ)။ ယွံခမဳတအ် သာဂတဂှ် ပ္ဍဲအခိၚ်လၟုဟ် ပွမရှေ်သှေ်ရဴဂဴ ပွမဇအ်သဝ်အောပ်မာ ပ္ဍဲအဲကျာ် နွံဏီဟာ ရဴဝွံ (သၟာန်ရ)။ ယွံတဳလမၞုံပိုဉ် ပွမရှေ်သှေ် ပွမဇအ်သဝ်အောပ်မာ ဟွံမွဲရ ရဴဝွံ (ဂရၚ်ပတီအိုတ်ရ)။ ယွံခမဳတအ် သာဂတဂှ် တဝ်စၞေဟ်ကၠုၚ်ပၞာန် ကေုာံနာဂ်မပဒတဴ ပ္ဍဲသၞေဟ်တၞံကြုက်ရ ဟွံသေၚ်ဟာ ရဴဝွံ (သၟာန်ရ)။ ယွံတဳလမၞုံပိုဉ် ပွမတဝ်စၞေဟ်ပၞာန်ဂှ် ဍာံပြရ ရဴဝွံ (ဂရၚ်ပတီအိုတ်ရ)။ ယွံခမဳတအ် သာဂတဂှ် ပ္ဍဲအခိၚ်လၟုဟ် တၞဟ်နပွမတဝ်စၞေဟ်ပၞာန် ကေုာံနာဂ်မပဒတဴပ္ဍဲသၞေဟ်တၞံကြုက် သၟဟ်ရထဏီဟာ ရဴဝွံ (သၟာန်ရ)။ ယွံတဳလမၞုံပိုဉ် ဟွံသၟဟ်ရထရ ရဴဝွံ (ဂရၚ်ပတီအိုတ်ရ)။ ယွံခမဳတအ် ယြဴသိအရက်မွဲ သုၚ်တုဲ (ဟိုတ်နူဗ္ၜူဂှ်ရ) သညာသမ္တီစ္ဍးအာရ၊ ‘ဝိဝိၚ်ဘိၚ်တၠိၚ်လှၚ်အာရ’၊ သိအရက်ဂှ် ထေက်ကဵုသုၚ်ဟာ ရဴဝွံ (သၟာန်ရ)။ ယွံတဳလမၞုံပိုဉ် ဟွံထေက်ကဵုသုၚ်ရ ရဴဝွံ (ဂရၚ်ပတီအိုတ်ရ)။ ယွံခမဳတအ် ဟွံထေက် ကုသာဂတရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ။ ယွံခမဳတအ် မုဟိုတ် သာဂတဂှ် သုၚ်သိအရက်ရော? ယွံခမဳတအ် (ပွသာဂတ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
327) “ဟိုတ်နူပွမသုၚ်စသိအရက် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
