၅.၅.၉.၁။ ပွံက်သေနာဝါသသိက္ခာပိုဒ်

319) တၞဟ်နပွမအာဒပ်ပၞာန် ဟိုတ်မမိက်ကဵုမွဲမွဲနွံ ကုခမဳဂှ်မ္ဂး မ္ဂးဂှ် ယြဴဟိုတ်မွဲနွံမ္ဂး၊ ကမၠောန်ကေၚ်ကာထေက်ကဵုဒးသ္ပနွံမ္ဂး။ ခမဳဂှ် လုကဴၜါဗ္တံပိဗ္တံဂမၠိုၚ် ဂပ်ဝ်ပဒတဴ ပ္ဍဲဒပ်ပၞာန်ရ မ္ဂးဂှ် လုကဴၜါဗ္တံပိဗ္တံဂမၠိုၚ် ပဒတဴမာန်ရ။ လောန်လတူၜါဗ္တံပိဗ္တံဂှ် ပဒတဴ မ္ဂးဂှ် ပ္ဍဲတ္ၚဲမရနုက်ကဵုပန်ဂှ် စဵုကဵုတ္ၚဲပၠိုတ် ပဒတဴပ္ဍဲဒပ်ပၞာန်မ္ဂး၊ ဒးအာပတ်ပဲါစိုတ်ရ။

320) ပ္ဍဲအရာလောန်ပိဗ္တံ မၞုံကဵုစၟတ်သမ္တီလောန်ပိဗ္တံဒှ်တုဲ ပဒတဴ ပ္ဍဲဒပ်ပၞာန်မ္ဂး၊ ဒးအာပတ် ပဲါစိုတ်ရ။ ပ္ဍဲအရာလောန်ပိဗ္တံ မၞုံကဵုသၠေဟ်ပၟာဒှ်တုဲ ပဒတဴ ပ္ဍဲဒပ်ပၞာန်မ္ဂး၊ ဒးအာပတ်ပဲါစိုတ်ရ။ ပ္ဍဲအရာလောန်ပိဗ္တံ မၞုံကဵုစၟတ်သမ္တီယုက်ဒေတ်ဒှ်တုဲ ပဒတဴ ပ္ဍဲဒပ်ပၞာန်မ္ဂး၊ ဒးအာပတ်ပဲါစိုတ်ရ။ ပ္ဍဲအရာယုက်ဒေက်သၟဝ်ပိဗ္တံ မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာယုက်ဒေတ်သၟဝ်ပိဗ္တံ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာယုက်ဒေတ်သၟဝ်ပိဗ္တံ မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။

321) ပဒတဴ ၜါဗ္တံပိဗ္တံဂမၠိုၚ်မ္ဂး၊ ပဒတဴယုတ်ဒေက်သၟဝ်ၜါဗ္တံပိဗ္တံမ္ဂး၊ ပဒတဴ ၜါဗ္တံတုဲ ပ္ဍဲတ္ၚဲမရနုက်ကဵုပိ ကိုပ်ကၠာအရှိုဏ်ဟွံတိုန်ဏီ တိတ်အာတုဲ မွဲလှေ်ပၠန် ပဒတဴမ္ဂး၊ ဂိယဲတုဲ ပဒတဴမ္ဂး၊ ဟိုတ်နူကေၚ်ကာဒးသ္ပကဵုညးဂိယဲတုဲ ပဒတဴမ္ဂး၊ ဒပ်ပၞာန်ဇကုပဒတဴဒၟံၚ်ဂှ်လေဝ် ဒပ်ပၞာန်သအာၚ် ဗိုၚ်လဝ်မ္ဂး၊ ပရိုက်ဘဲမမိက်ကဵုမွဲမွဲ သ္ပဂဗုဓ်ပထုဲမ္ဂး၊ ဟိုတ်နူပရိုက်ဘဲနွံတုဲ ပဒတဴမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သေနာဝါသသိက္ခာပိုဒ် နဝမတုဲရ။