၅.၅.၈.၁။ ပွံက်ဥယျုတ္တသေနာသိက္ခာပိုဒ်

314) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဇက်တိတ် မ္ဂးဂှ် ဒပ်ပၞာန်ဂှ် တိတ်နူကွာန်တုဲ လုပ်လေဝ်လုပ်ရ၊ အာလေဝ်အာရ။ ဒပ်ပၞာန် မ္ဂးဂှ် စိိၚ် ချေံ ကွဳစောတ်ရထာ သရာဲပၞာန်တိုက်ဂမၠိုၚ်ရ။ စိၚ်မၞုံကဵုတြုံစှ်ၜါတၠဂှ် စိၚ်မ္ဂးရ၊ ချေံမၞုံကဵုတြုံပိတၠဂှ် ချေံမ္ဂးရ၊ ကွဳစောတ်ရထာမၞုံကဵုတြုံပန်တၠဂှ် ကွဳစောတ်ရထာမ္ဂးရ၊ တြုံဂမၠိုၚ်ပန်တၠ မရပ်လဴပ္ဍဲတဲဂှ် သရာဲပၞာန်တိုက်မ္ဂးရ။ တၞဟ်နဗဵုသ္ၚေဝ် အာမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မထေက်ကဵုညာတ်မွဲ ဒတူဒၟံၚ်တုဲ ဗဵုသ္ၚေဝ်မ္ဂး၊ ဒးအာပတ်ပဲါစိုတ်ရ။ သၠးကၠေံဥပစာမထေက်ကဵုညာတ်တုဲ ဗဵုသ္ၚေဝ်ဂၠိုၚ်ကဵုဝါမ္ဂး၊ ဒးအာပတ်ပဲါစိုတ်ရ။ ဝေၚ်ကၠေံဟိုတ်မထေက်ကဵုအာ မၞုံသဘဴမဖှ်သာ်ဂှ်တုဲ မ္ဂးဂှ် ပဲါကၠေံဟိုတ်မထေက်ကဵုအာ မၞုံသဘဴမဖှ်သာ်ဂှ်တုဲ။

315) ပ္ဍဲအရာဇက်တိတ်ဂှ် မၞုံကဵုစၟတ်သမ္တီဇက်တိတ်ဒှ်တုဲ ဝေၚ်ကၠေံဟိုတ်မထေက်ကဵုအာ မၞုံသဘဴမဖှ်သာ်ဂှ်တုဲ အာတဴ တၞဟ်နပွမဗဵုသ္ၚေဝ်မ္ဂး၊ ဒးအာပတ်ပဲါစိုတ်ရ၊ ပ္ဍဲအရာဇက်တိတ်ဂှ် မၞုံကဵုသၠေဟ်ပၟာဒှ်တုဲ ဝေၚ်ကၠေံဟိုတ်မထေက်ကဵုအာ မၞုံသဘဴမဖှ်သာ်ဂှ်တုဲ အာတဴတၞဟ်နပွမဗဵုသ္ၚေဝ်မ္ဂး၊ ဒးအာပတ်ပဲါစိုတ်ရ။ ပ္ဍဲအရာဇက်တိတ်ဂှ် မၞုံကဵုစၟတ်သမ္တီသ္ၚေဝ်မ္ဂး၊ ဒးအာပတ်ပဲါစိုတ်ရ။ အာတဴ တၞဟ်နပွမဗဵုသ္ၚေဝ် အၚ်္ဂပၞာန်မွဲမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မထေက်ကဵုညာတ်မွဲ ဒတူဒၟံၚ်တုဲ ဗဵုသ္ၚေဝ်မ္ဂး၊ ဒးအာပတ်ဒုက္ကဋ်ရ၊ သၠးကၠေံ ဥပစာမထေက်ကဵုညာတ်တုဲ ဗဵုသ္ၚေဝ်ဂၠိုၚ်ကဵုဝါမ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံဇက်တိတ်ဂှ် မၞုံကဵုစၟတ်သမ္တီဇက်တိတ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံဇက်တိတ်ဒှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံဇက်တိတ်ဂှ် မၞုံကဵုစၟတ်သမ္တီ ဟွံဇက်တိတ်မ္ဂး၊ ဟွံဒးအာပတ်ရ။

316) ဒတူဒၟံၚ်ပ္ဍဲအာရှာမ်တုဲ ဗဵုသ္ၚေဝ်မ္ဂး၊ ကၠုၚ်တဴ ဌာန်ခမဳဒတူကီု ဌာန်ဂဇအ်ကီု ဌာန်တိက်ကီုမ္ဂး၊ ဃောအာတဴဒစးတရဴ ညာတ်ဒးမ္ဂး၊ ဟိုတ်နူဟိုတ်မထေက်ကဵုအာ မၞုံသဘဴမဖှ်သာ်ဂှ် အာမ္ဂး၊ ဟိုတ်နူပရိုက်ဘဲဂမၠိုၚ် အာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဥယျုတ္တသေနာသိက္ခာပိုဒ် အဋ္ဌမတုဲရ။