၅.၅.၈။ ဥယျုတ္တသေနာသိက္ခာပိုဒ်

311) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သၟိၚ်ဇၞော်ပသေနဒဳကောသလ ဇက်တိတ်နဒပ်ပၞာန်ရ။ ခမဳဆဗ္ဗဂ္ဂဳဂမၠိုၚ် အာတဴတၞဟ်နသွက်ဂွံဗဵုလ္ၚေဝ် ဒပ်ပၞာန်မဇက်တိတ်အိုတ်ရ။ သၟိၚ်ဇၞော်ပသေနဒဳကောသလ သ္ဂောံညာတ်ကေတ် ခမဳဆဗ္ဗဂ္ဂဳဂမၠိုၚ် မက္ညကၠုၚ်နူဇမ္ၚောဲတုဲ ကဵုဘိက်နိမန်နၚ်တုဲမ္ဂး၊ “ယွံတဳလပိုဉ်တအ် တဳလပိုဉ်တအ်ညးဂမၠိုၚ် မုဟိုတ် က္ညကၠုၚ်အိုတ်ရော?” ရဴဝွံ ဂရၚ်ပတီသၟာန်ရ။ ယွံသၟိၚ်ဇၞော် ပိုဲညးဂမၠိုၚ် မိက်ဆဵုညာတ်သၟိၚ်ဇၞော်အိုတ်ရ ရဴဝွံ (သ္ဂးအိုတ်ရ)။ ယွံတဳလပိုဉ်တအ် နပွမဗဵုညာတ် အဲဍိက်မသ္ဍိုက်မၠိုက် ပွမတဝ်စၞေဟ်ပၞာန်ဂှ် မုဖဵုနွံရော? ထေက်ကဵုဗဵုလ္ၚောဝ် တဳလမၞုံပိုဉ်ကျာ်တြဲရ ဟွံသေၚ်ဟာ ရဴဝွံ (ဂရၚ်ပတီရ)။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ကၠုၚ်တဴ တၞဟ်နပွမဗဵုဒပ်ပၞာန်မဇက်တိတ်အိုတ်ရော? ယြဴပိုဲညးဂမၠိုၚ် ဟိုတ်နူဟိုတ်မတွံဂး ပွမဂယိုၚ်လမျီု ဟိုတ်နူ ဟိုတ်မတွံဂးပွမလွဳမြိမြန်ကောန်သမ္ဘာ သ္ဒးကၠုၚ်တဴ တၞဟ်နတဝ်စၞေဟ်ပၞာန်အိုတ်ရ၊ ကုပိုဲညးဂမၠိုၚ်ဂှ်လေဝ် ကလိဂွံဒဒှ်မၞိဟ်ခိုဟ် ဟွံသေၚ်ရ၊ ပိုဲညးဂမၠိုၚ်ဂှ်လေဝ် ဂပ်ဝ်ကလိဂွံဒဒှ်မၞိဟ်ဗွဲဟွံဒးရးရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် အာတဴ တၞဟ်နပွမဗဵုဒပ်ပၞာန်မဇက်တိတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် အာတဴ တၞဟ်နပွမဗဵုဒပ်ပၞာန် မဇက်တိတ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ မၞးတအ်ညးဂမၠိုၚ် မုဟိုတ် အာတဴ တၞဟ်နပွမဗဵုဒပ်ပၞာန် မဇက်တိတ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ အာတဴ တၞဟ်နပွမဗဵုဒပ်ပၞာန် မဇက်တိတ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။

312) ပ္ဍဲအခိၚ် အမူခမဳမွဲဇကု ဂိယဲဒၟံၚ် ပ္ဍဲဒပ်ပၞာန်ရ၊ ညးတေံဂှ် “အဲဍိက် ဂိယဲဒၟံၚ်ပ္ဍဲဒပ်ပၞာန်တုဲ ဩဝ်က္ညကၠုၚ်ညိ၊ နွံပၟိက်ကဵုတဳလပိုဉ် က္ညကၠုၚ်ရ” ရဴဝွံ ဗလးဏာကလုတ် ဇရေၚ်ခမဳဂှ်ရ။ ပ္ဍဲအခိၚ်ဂှ် “တဳလမၞုံပိုဉ်ကျာ်တြဲ ကညပ်လဝ်သိက္ခာပိုဒ် ရဴဝွံမ္ဂး၊ ‘ဟဂပ်ဝ်အာတဴ တၞဟ်နပွမဗဵုသ္ၚေတ်ဒပ်ပၞာန် မဇက်တိတ်ရ၊ အမူအဲလေဝ် ဂိယဲဒၟံၚ်ပ္ဍဲဒပ်ပၞာန်ရ၊ အဲ ပသာ်သ္ဂောံဒ္ဂေတ်သ္ပညိရော?” ရဴဝွံ ကသပ်ဒှ် ကုခမဳဂှ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ဟိုတ်မထေက်ကဵုအာ မၞုံသဘဴမဖှ်သာ်ဂှ်နွံမ္ဂး ကဵုအခေါၚ် တၞဟ်နပွမအာဒပ်ပၞာန်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 313) “ယြဴခမဳမွဲ ဝေၚ်ကၠေံဟိုတ်မထေက်ကဵုအာ မၞုံသဘဴမဖှ်သာ်ဂှ်တုဲ အာတဴ တၞဟ်နပွမဗဵုဒပ်ပၞာန်မဇက်တိတ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။