၅.၅.၇။ မဟာနာမသိက္ခာပိုဒ်
303) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာနိဂြောဓာရာမ် ဇရေၚ်ဍုၚ်ကပိလဝှ် လုပ်လၟိဟ်သက္ကရးဂှ် ဂဥုဲဂၠိုၚ်ဂၠၚ် ကုသၟိၚ်သာကျဝၚ် မၞုံယၟုမဟာနာမ်ရ။ ပ္ဍဲအခိၚ်ဂှ် သၟိၚ်သာကျဝၚ် မၞုံယၟုမဟာနာမ် ပြာပ်အာဇရေၚ်တဳလမၞုံပိုဉ်ကျာ်တြဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲတုဲ “ယွံတဳလမၞုံပိုဉ် နွံပၟိက်ဘိက်နိမန်သၚ် နကဵုဂဥုဲ လုကဴပန်ဂိတုဂမၠိုၚ်ရ” ရဴဝွံ ဂရၚ်ပတီတဳလမၞုံပိုဉ်ကျာ်တြဲရ။ ယွံမဟာနာမ် ခိုဟ်သန်ရ ခိုဟ်သန်ရ၊ ယွံမဟာနာမ် ယဝ်ဒှ်သာ်ဂှ်မ္ဂး တၠအဲ ဩဝ်ဘိက်နိမန်သၚ် နကဵုဂဥုဲ လုကဴပန်ဂိတုဂမၠိုၚ်ညိ ရဴဝွံ (သ္ဂးရ)။ ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်ဒှ်တုဲ ဟွံဒုၚ်တဲအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် တၞဟ်ပွမသာယျေန် (ဒုၚ်တဲ) ပွမဘိက်နိမန် နဂဥုဲ လုကဴပန်ဂိတုဂမၠိုၚ် ကဵုအခေါၚ်ရ” ရဴဝွံ သ္ဂးရ။
304) ပ္ဍဲအခိၚ်ဂှ် ခမဳဂမၠိုၚ် အာတ်တဴ သၟိၚ်သာကျဝၚ် မၞုံံယၟုမဟာနာမ် ဂဥုဲဗၞတ်ညိနာၚ်ဟေၚ်အိုတ်ရ။ ကုသၟိၚ်သာကျဝၚ် မၞုံယၟုမဟာနာမ် ဂဥုဲအတိုၚ်ဂၠိုၚ်လၟိုန်ဂှ်ဂၠိုၚ်ဂၠၚ်ရ။ မရနုက်ကဵုၜါဝါလေဝ် သၟိၚ်သာကျဝၚ် မၞုံယၟုမဟာနာမ် ပြာပ်အာဇရေၚ်တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲတုဲ “ယွံတဳလမၞုံပိုဉ် အဲဍိက် နွံပၟိက် ထပ်ဘိက်နိမန်သၚ် နကဵုဂဥုဲ လုကဴပန်ဂိတုဂမၠိုၚ်ရ” ရဴဝွံ ဂရၚ်ပတီတဳလမၞုံပိုဉ်ကျာ်တြဲရ။ ယွံမဟာနာမ် ခိုဟ်သန်ရ ခိုဟ်သန်ရ၊ ယွံမဟာနာမ် ယဝ်ဒှ်သာ်ဂှ်မ္ဂး တၠအဲ ဩဝ်ထပ်ဘိက်နိမန်သၚ် နကဵုဂဥုဲ လုကဴပန်ဂိတုဂမၠိၚ်ညိ ရဴဝွံ (သ္ဂးရ)။ ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်ဒှ်တုဲ ဟွံဒုၚ်တဲအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပွမထပ်ဘိက်နိမန်ဂှ်လေဝ် တၞဟ်နပွမသာယျေန် (ဒုၚ်တဲ) ကဵုအခေါၚ်ရ” ရဴဝွံ သ္ဂးရ။
305) ပ္ဍဲအခိၚ်ဂှ် ခမဳဂမၠိုၚ် အာတ်တဴသၟိၚ်သာကျဝၚ် မၞုံယၟုမဟာနာမ် ဂဥုဲဗၞတ်ညိနာၚ်ဟေၚ်အိုတ်ရ။ ကုသၟိၚ်သာကျဝၚ် မၞုံယၟုမဟာနာမ် အတိုၚ်ကိုပ်ကၠာဂှ်ဟေၚ် ဂဥုဲအတိုၚ်ဂၠိုၚ်လၟိုန်ဂှ် ဂၠိုၚ်ဂၠၚ်ဒၟံၚ်ပၠန်ရ။ မရနုက်ကဵုပိဝါလေဝ် သၟိၚ်သာကျဝၚ် မၞုံယၟုမဟာနာမ် ပြာပ်အာဇရေၚ်တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲတုဲ “ယွံတဳလမၞုံပိုဉ် စဵုကဵုလအိတ်လမျီု အဲဍိက် နွံပၟိက်ဘိက်နိမန်သၚ် နကဵုဂဥုဲရ” ရဴဝွံ ဂရၚ်ပတီတဳလမၞုံပိုဉ်ကျာ်တြဲရ။ ယွံမဟာနာမ် ခိုဟ်သန်ရ ခိုဟ်သန်ရ၊ ယွံမဟာနာမ် ယဝ်ဒှ်သာ်ဂှ်မ္ဂး တၠအဲ စဵုကဵုလအိတ်လမျီု ဩဝ်ဘိက်နိမန်သၚ် နကဵုဂဥုဲညိ ရဴဝွံ (သ္ဂးရ)။ ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်ဒှ်တုဲ ဟွံဒုၚ်တဲအိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် တၞဟ်နပွမသာယျေန် (ဒုၚ်တဲ) ပွမဘိက်နိမန်လၟိုန်ဂှ် ကဵုအခေါၚ်ရ” ရဴဝွံ သ္ဂးရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဗိုက်လတက်လဝ် ဗွဲဟွံဒးရးအိုတ်ရ၊ ရုၚ်လတက်လဝ် ဗွဲဟွံဒးရးအိုတ်ရ၊ ဟွံဍိုက်ပေၚ်တဴကေုာံအယောၚ်အလာခမဳအိုတ်ရ၊ သၟိၚ်သာကျဝၚ် မၞုံယၟုမဟာနာမ်ဂှ် “ယွံတဳလပိုဉ်တအ် တဳလပိုဉ်တအ်ညးဂမၠိုၚ် မုဟိုတ် ဗိုက်လတက်လဝ် ဗွဲဟွံဒးရးအိုတ်ရော? ရုၚ်လတက်လဝ် ဗွဲဟွံဒးရးအိုတ်ရော? ဟွံဍိုက်ပေၚ်တဴ ကေုာံအယောၚ်အလာခမဳအိုတ်ရော? ညးမဒှ်ခမဳဂှ် ထေက်ကဵုဒးဗိုက်လတက်ဗွဲမဒးရး ထေက်ကဵုရုၚ်လတက်ဗွဲမဒးရး ထေက်ကဵုဒးဍိုက်ပေၚ်တဴ ကေုာံအယောၚ်အလာခမဳရ ဟွံသေၚ်ဟာ” ရဴဝွံ မၞုံအလေံဟီုသ္ဂးရ။ ခမဳဆဗ္ဗဂ္ဂဳဂမၠိုၚ် ဒက်လဝ်ဝဲ ပ္ဍဲသၟိၚ်သာကျဝၚ် မၞုံယၟုမဟာနာမ်ရ။ ပ္ဍဲအခိၚ်ဂှ် “ပိုဲညးဂမၠိုၚ် နဟိုတ်ဥပါယ်သာ်လဵု ဂွံသ္ပညံၚ်သၟိၚ်သာကျဝၚ် မၞုံယၟုမဟာနာမ် မုက်မတ်ဟွံကျေဝ်အိုတ်ရော?” ရဴဝွံ ကသပ်ဒှ် ကုခမဳဆဗ္ဗဂ္ဂဳဂမၠိုၚ်ရ။ ပ္ဍဲအခိၚ်ဂှ် “ယွံကောန်တၠတအ် သၟိၚ်သာကျဝၚ် မၞုံယၟုမဟာနာမ် ဘိက်နိမန်လဝ်သၚ် နကဵုဂဥုဲရ၊ ယွံကောန်တၠတအ် ပ္ဍဲလၟုဟ်ဟေၚ် ပိုဲညးဂမၠိုၚ် အာအာတ်သၟိၚ်သာကျဝၚ် မၞုံယၟုမဟာနာမ် ကၠေၚ်သွဟ်အိုတ်စိုအ်” ရဴဝွံ ကသပ်ဒှ် ကုခမဳဆဗ္ဗဂ္ဂဳဂမၠိုၚ်ရ။ ပ္ဍဲကြဴနူဂှ် ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ်သၟိၚ်သာကျဝၚ် မၞုံယၟုမဟာနာမ်တုဲ “ယွံဒကာ နွံပၟိက်ကဵုကၠေၚ်သွဟ် မွဲဒြိုဏ်မွဲဇိပ် (ပန်တဠတ်) ရ” ရဴဝွံ ဟီုသ္ဂးကဵုသၟိၚ်သာကျဝၚ် မၞုံယၟုမဟာနာမ်အိုတ်ရ။ ယွံတဳလပိုဉ်တအ် ဗၞတ်တ္ၚဲဏအ်မွဲတ္ၚဲ ဩဝ်လၟတ်မၚ်လ္ဇအိုတ်ညိကၠာ၊ မၞိဟ်ဂမၠိုၚ် သွက်သ္ဂောံရၚ်တၠုၚ်နၚ် ကၠေၚ်သွဟ် အာတဴခရိုၚ်ဂၠဴအိုတ်ရ၊ အခိၚ်ဒးမ္ဂး ကြက်ရၚ်တၠုၚ်နၚ်အိုတ်ရ ရဴဝွံ (သ္ဂး) ရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ခမဳဆဗ္ဗဂ္ဂဳဂမၠိုၚ် “ယွံဒကာ နွံပၟိက်ကဵုကၠေၚ်သွဟ် မွဲဒြိုဏ်မွဲဇိပ် (ပန်တဠတ်) ရ” ရဴဝွံ ဟီုသ္ဂးကဵု သၟိၚ်သာကျဝၚ် မၞုံယၟုမဟာနာမ်အိုတ်ရ။ ယွံတဳလပိုဉ်တအ် ဗၞတ်တ္ၚဲဏအ်မွဲတ္ၚဲ ဩဝ်လၟတ်မၚ်လ္ဇအိုတ်ညိကၠာ၊ မၞိဟ်ဂမၠိုၚ် သွက်သ္ဂောံရၚ်တၠုၚ်နၚ်ကၠေၚ်သွဟ် အာတဴခရိုၚ်ဂၠဴအိုတ်ရ၊ အခိၚ်ဒးမ္ဂး ကြက်ရၚ်တၠုၚ်နၚ်အိုတ်ရ ရဴဝွံ (သ္ဂးရ)။ ယွံဒကာ တၠအဲ နပွမဘိက်နိမန် သီုဟွံမိက်ကဵုဒါန်ဂှ် မုဖဵုနွံရော? တၠအဲ ဘိက်နိမန်လဝ် (ညံၚ်ကွေံကွေံကြာန်ကြာန်) တုဲ သီုဟွံကဵုဒါန်ဂှ် မံၚ်ဒှ်ရောၚ်သွံ ရဴဝွံ (ဟီုသ္ဂးအိုတ်ရ)။ ပ္ဍဲအခိၚ်ဂှ် သၟိၚ်သာကျဝၚ် မၞုံယၟုမဟာနာမ် “မုဟိုတ် တဳလပိုဉ်မဆာဲဂမၠိုၚ် ဗၞတ်တ္ၚဲဏအ်မွဲတ္ၚဲ ဩဝ်လၟတ်မၚ်လ္ဇအိုတ်ညိ ရဴဝွံ သီုကဵုဟီုသ္ဂးတဴဂှ် ဟွံလၟတ်မၚ်လ္ဇအိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်သၟိၚ်သာကျဝၚ် မၞုံယၟုမဟာနာမ်ဂှ် မဟီုဂရိုဟ် ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သၟိၚ်သာကျဝၚ် မၞုံယၟုမဟာနာမ်ဂှ် ယွံတဳလပိုဉ်တအ် ဗၞတ်တ္ၚဲဏအ်မွဲတ္ၚဲ ဩဝ်လၟတ်မၚ်လ္ဇအိုတ်ညိ ရဴဝွံ သီုကဵုဟီုသ္ဂးတဴဂှ် ဟွံလၟတ်မၚ်လ္ဇအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် ဩဝ်လၟတ်မၚ်လ္ဇအိုတ်ညိ ရဴဝွံ သီုကဵုဟီုသ္ဂးတဴဂှ် ဟွံလၟတ်မၚ်လ္ဇအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သၟိၚ်သာကျဝၚ် မၞုံယၟုမဟာနာမ်ဂှ် ယွံတဳလပိုဉ်တအ် ဗၞတ်တ္ၚဲဏအ်မွဲတ္ၚဲ ဩဝ်လၟတ်မၚ်လ္ဇအိုတ်ညိ ရဴဝွံ သီုကဵုဟီုသ္ဂးတဴဂှ် ဟွံလၟတ်မၚ်လ္ဇအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
306) “ခမဳဟွံဂိယဲဂှ် ဝေၚ်ကၠေံပွမထပ်ဘိက်နိမန် ကေုာံပွမဘိက်နိမန်လၟိုန်တုဲ လုကဴပန်ဂိတုဂမၠိုၚ် ဂပ်ဝ်သာယျေန် (ဒုၚ်တဲ) ပွမဘိက်နိမန် နဂဥုဲရ၊ သာယျေန် လောန်လတူပန်ဂိတုဂှ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
