၅.၅.၆.၁။ ပွံက်စာရိတ္တသိက္ခာပိုဒ်
300) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဘိက်နိမန်လဝ်ကဵုပိုဉ်တုဲ မ္ဂးဂှ် ဘိက်နိမန်လဝ်ကဵုပိုဉ် ပၞောန်ကဵုဘောဇိုန်ဂမၠိုၚ်မသုန်သာ် နကဵုဘောဇိုန်မွဲမွဲသာ်တုဲဒှတ်ရ။ မၞုံကဵုပိဏ္ဍပါတ် မ္ဂးဂှ် မဂပ်ဝ်ဘိက်နိမန်လဝ်ဂှ် မၞုံကဵုပိဏ္ဍပါတ်ရ။ မၞုံပြာကဋ် မ္ဂးဂှ် ပါန်အခေါၚ်ခမဳတုဲ တၞဟ်နလုပ်သၟဟ်ရထရ။ ဟွံမွဲပြာကဋ် မ္ဂးဂှ် ပါန်အခေါၚ်ခမဳတုဲ တၞဟ်နလုပ် ဟွံသၟဟ်ရထရ။ သွက်ကိုပ်ကၠာ ဟဂွံကဵုပိုဉ်ဏီ မ္ဂးဂှ် သွက်ကိုပ်ကၠာ ဟဂွံစပိဏ္ဍပါတ်မနိမန်လဝ်ဏီ။ ကြဴနူကဵုပိုဉ်တုဲ မ္ဂးဂှ် ပၞောန်ကဵုဘောဇိုန်ဂမၠိုၚ်မသုန်သာ် ဘောဇိုန်မွဲမွဲသာ်ဂှ် ဗွဲတွဵုမယုတ် နဗၞတ်တၞုၚ်ကၟတ်သၠခိုဟ်လေဝ် စတုဲဒှ်ရ။ သ္ၚိဒကာ မ္ဂးဂှ် သ္ၚိဂကူသၟိၚ် သ္ၚိဂကူဗၞး သ္ၚိဂကူညးဗၞိက် သ္ၚိဂကူညးဒိုက်ဂတ် ရဴဝွံ သ္ၚိဒကာ နွံပန်ဂကူအိုတ်ရ။ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်မ္ဂး မ္ဂးဂှ် ကုခမဳတၞီလုပ်ဥပစာသ္ၚိညးသအာၚ် ဒးအာပတ်ဒုက္ကဋ်ရ၊ လဂါမ်ဇိုၚ်ပဌမဂှ် ကလိလောန်ဒၟုၚ်တြၚ်မ္ဂး၊ ဒးအာပတ်ဒုက္ကဋ်ရ၊ လဂါမ်ဇိုၚ်ဒုတိယဂှ် ကလိလောန်မ္ဂး၊ ဒးအာပတ်ပဲါစိုတ်ရ။ ဝေၚ်ကၠေံအခိၚ်အခါသ္ၚာ မ္ဂးဂှ် ဟွံလလးကထိုန်မ္ဂး လုကဴဂိတုလအိတ်အိုတ်ဥတုဗြဲကီု လလးကထိုန်မ္ဂး လုကဴမသုန်ဂိတုဂမၠိုၚ်ရောၚ်။ အခိၚ်ဇိၚ်သ္ၚာ မ္ဂးဂှ် ဇိၚ်တဴသ္ၚာမ္ဂး။
301) ပ္ဍဲမဘိက်နိမန်လဝ် မၞုံကဵုစၟတ်သမ္တီ ဘိက်နိမန်လဝ်ဒှ်တုဲ သီုဟွံဂရၚ်ပတီ ခမဳနွံတဴပြာကဋ် ပ္ဍဲသွက်ကိုပ်ကၠာ ဟဂွံကဵုပိုဉ်ကီုကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲမဘိက်နိမန်လဝ် မၞုံကဵုသၠေဟ်ပၟာဒှ်တုဲ သီုဟွံဂရၚ်ပတီ ခမဳနွံတဴပြာကဋ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲမဘိက်နိမန်လဝ် မၞုံကဵုစၟတ်သမ္တီ ဟဂွံဘိက်နိမန်လဝ်ဒှ်တုဲ သီုဟွံဂရၚ်ပတီ ခမဳနွံတဴပြာကဋ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီုကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်မ္ဂး၊ ဒးအာပတ်ပဲါစိုတ်ရ။ ပ္ဍဲမဟဂွံဘိက်နိမန်လဝ် မၞုံကဵုစၟတ်သမ္တီ ဘိက်နိမန်လဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲမဟဂွံဘိက်နိမန်လဝ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမဟဂွံဘိက်နိမန်လဝ် မၞုံကဵုစၟတ်သမ္တီ မဟဂွံဘိက်နိမန်လဝ်မ္ဂး၊ ဟွံဒးအာပတ်ရ။
302) ပ္ဍဲအခိၚ်အခါ ဟွံဒးအာပတ်ရ၊ ဂရၚ်ပတီ ခမဳနွံတဴပြာကဋ်တုဲ လုပ်မ္ဂး၊ သီုဟွံဂရၚ်ပတီ ခမဳဟွံမွဲတဴပြာကဋ်တုဲ လုပ်မ္ဂး၊ ဒှ်ဂၠံၚ်တတ်အာကၠုၚ် သ္ၚိညးသအာၚ်မ္ဂး၊ ဒှ်ဂၠံၚ်သ္ဒးတတ်အာကၠုၚ် နဥပစာသ္ၚိမ္ဂး၊ အာဘာအပ္ဍဲကွာန်မ္ဂး၊ အာဘာခမဳဗြဴမ္ဂး၊ အာဘာ (ဒၞဲါဒၟံၚ်) တဳဂမၠိုၚ်မ္ဂး၊ အာဇြပ်ကဵု ပိုဉ်မ္ဂး၊ အာသ္ၚိဖဴဌာန်ဖျိန်ပုၚ်မ္ဂး၊ ဟိုတ်နူပရိုက်ဘဲအာမ္ဂး၊ ဟွံဒးအာပတ်ရ။ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ စာရိတ္တသိက္ခာပိုဒ် ဆဋ္ဌတုဲရ။
