၅.၅.၆။ စာရိတ္တသိက္ခာပိုဒ်
294) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ဒကာကၠောန်ၜိုတ်ဥပကာ တဳလပိုဉ်ဥပနန္ဒ ကောန်သၟိၚ်သာကျဝၚ် ဘိက်နိမန်ကဵုပိုဉ် တဳလပိုဉ်ဥပနန္ဒ ကောန်သၟိၚ်သာကျဝၚ်ရ၊ ခမဳသအာၚ်ဂမၠိုၚ်လေဝ် ဘိက်နိမန်လဝ်ကဵုပိုဉ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီ ပြာပ်အာသ္ၚိဒကာသအာၚ်ဂမၠိုၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် “ယွံဒကာတအ် ဩဝ်ကဵုဒါန်ပိဏ္ဍပါတ်အိုတ်ညိအဴ” ရဴဝွံ သ္ဂးကဵုမၞိဟ်ဂမၠိုၚ်ဂှ်အိုတ်ရ။ ယွံတဳလပိုဉ်တအ် စဵုကဵုတဳလပိုဉ်ဥပနန္ဒ က္ညကၠုၚ်ဂှ် ဩဝ်လၟတ်မၚ်လ္ဇဒၟံၚ်ကၠာအိုတ်ညိ ရဴဝွံ (ဂရၚ်ပတီအိုတ်ရ)။ မရနုက်ကဵုၜါလေဝ် ခမဳဂမၠိုၚ်ဂှ် ။ ပ ။ မရနုက်ကဵုပိဝါလေဝ် ခမဳဂမၠိုၚ်ဂှ် “ယွံဒကာတအ် ဩဝ်ကဵုဒါန်ပိဏ္ဍပါတ်အိုတ်ညိ၊ အခိၚ်ကဵုပိုဉ်ဂယး ကလိလောန်အာတုဲရ” ရဴဝွံ သ္ဂးကဵုမၞိဟ်ဂမၠိုၚ်အိုတ်ရ။ ယွံတဳလပိုဉ်တအ် ဟိုတ်နူဟိုတ်တဳလပိုဉ်ဥပနန္ဒဂှ် ပိုဲဍိက်တအ်ညးဂမၠိုၚ် ပြုပြေၚ်စဳရေၚ်တဴပိဏ္ဍပါတ်အိုတ်ရ၊ ယွံတဳလပိုဉ်တအ် စဵုကဵုတဳလပိုဉ်ဥပနန္ဒ က္ညကၠုၚ်ဂှ် ဩဝ်လၟတ်မၚ်လ္ဇဒၟံၚ်ကၠာအိုတ်ညိ ရဴဝွံ (ဂရၚ်ပတီအိုတ်ရ)။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် အခိၚ်နူဂယး ကိုပ်ကၠာဟဂွံကဵုပိုဉ်ဏီ ပြာပ်အာသ္ၚိဒကာသအာၚ်ဂမၠိုၚ်တုဲ တ္ၚဲသၠုၚ်မှက္ညကၠုၚ်ရ၊ ခမဳဂမၠိုၚ် အတိုၚ်သဘဴစိုတ်နွံဂှ် ဟဂွံသ္ပပြဘိုဂ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ် သီုမဒုၚ်နိမန်လဝ် ကဵုပိုဉ်တုဲဒှ်ဂှ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီ ဂေတ်ဂ္ၚေၚ်သ္ၚိဒကာသအာၚ်ဂမၠိုၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ သီုမဒုၚ်နိမန်လဝ် ကဵုပိုဉ်တုဲဒှ်ဂှ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီ ဂေတ်ဂ္ၚေၚ်သ္ၚိဒကာသအာၚ်ဂမၠိုၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုမဒုၚ်နိမန်လဝ် ကဵုပိုဉ်တုဲဒှ်ဂှ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီ ဂေတ်ဂ္ၚေၚ်သ္ၚိဒကာသအာၚ်ဂမၠိုၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဘိက်နိမန်လဝ်ကဵုပိုဉ်တုဲ သီုမၞုံကဵုပိဏ္ဍပါတ်ပြာကဋ်ဂှ် ပ္ဍဲသွက်ကိုပ်ကၠာ ဟဂွံကဵုပိုဉ်ဏီ ဂေတ်ဂ္ၚေၚ်အာကၠုၚ် သ္ၚိဒကာသအာၚ်ဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
295) ပ္ဍဲအခိၚ်ဂှ် ဒကာကၠောန်ၜိုတ်ဥပကာ တဳလပိုဉ်ဥပနန္ဒ ကောန်သၟိၚ်သာကျဝၚ် “ထ္ၜးကဵုတဳလပိုဉ်ဥပနန္ဒာတုဲ ဩဝ်ကဵုဒါန် ကုသၚ်ညိ” ဖအောဝ်ပလံၚ်နၚ်စၞစ တၞဟ်နသွက်သၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ဒှ်အခိၚ်လုပ်ဂ္ၚေၚ်ဒၟံၚ်ပိဏ္ဍပါတ်အပ္ဍဲကွာန်ရ။ ပ္ဍဲအခိၚ်ဂှ် မၞိဟ်ဂမၠိုၚ် အာအာရှာမ်တုဲ “ယွံတဳလပိုဉ်တအ် တဳလပိုဉ်ဥပနန္ဒဂှ် ဣလဵုရော?” ရဴဝွံ သၟာန်ခမဳဂမၠိုၚ်ရ။ ယွံဒကာတအ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် လုပ်ဂ္ၚေၚ်ဒၟံၚ်ပိဏ္ဍပါတ်ပ္ဍဲကွာန်ရ ရဴဝွံ (သ္ဂးအိုတ်ရ)။ ယွံတဳလပိုဉ်တအ် စၞစဝွံ ထ္ၜးကဵုတဳလပိုဉ်ဥပနန္ဒတုဲ ကဵုထောံဒါန် ကုသၚ်ညိ ရဴဝွံ (ဂရၚ်ပတီအိုတ်ရ)။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ— “ယွံခမဳတအ် ဒှ်သာ်ဂှ်မ္ဂး ဒုၚ်ဗဂိန်လဝ်တုဲ ဩဝ်စွံပတန်လဝ် စဵုကဵုဥပနန္ဒကၠုၚ်စိုပ်အိုတ်ညိ” ရဴဝွံ သ္ဂးကဵုခမဳဂမၠိုၚ်ရ။ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် “ပွမဂေတ်ဂ္ၚေၚ်အာကၠုၚ် ပ္ဍဲသ္ၚိဒကာသအာၚ်ဂမၠိုၚ် ပ္ဍဲသွက်ကိုပ်ကၠာဟွံဂွံကဵုပိုဉ်ဏီဂှ် တဳလမၞုံပိုဉ်ကျာ်တြဲ ပဲါကၠေံရ” ရဴဝွံ (ပၠုပ်စိုတ်တုဲ) ကဵုပိုဉ်တုဲလက်ကရဴမှ ပြာပ်အာသ္ၚိဒကာသအာၚ်ဂမၠိုၚ်တုဲ တ္ၚဲသၠုၚ်မှ က္ညကၠုၚ်ရ၊ စၞစဂှ် သ္ဒးဒးကလေၚ် ရၚ်တၠုၚ်ဖျဴဏာ သ္ၚိမွဲလှေ်ပၠန်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ် ကဵုပိုဉ်တုဲ လက်ကရဴမှ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ ကဵုပိုဉ်တုဲ လက်ကရဴမှ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုမလ္ၚုသၟး (နူမဂ်ဖိုလ်) မုဟိုတ် တၠအဲ ကဵုပိုဉ်တုဲလက်ကရဴမှ ဂေတ်ဂ္ၚေၚ်အာကၠုၚ်သ္ၚိဒကာသအာၚ်ဂမၠိုၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဘိက်နိမန်လဝ်ကဵုပိုဉ်တုဲ သီုမၞုံကဵုပိဏ္ဍပါတ်ပြာကဋ်ဂှ် ပ္ဍဲသွက်ကိုပ်ကၠာဟဂွံကဵုပိုဉ်ဏီကီု ပ္ဍဲကြဴနူကဵုပိုဉ်တုဲကီု ဂေတ်ဂ္ၚေၚ်အာကၠုၚ် သ္ၚိဒကာသအာၚ်ဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
296) ပ္ဍဲအခိၚ်ဂှ် ခမဳဂမၠိုၚ် ပ္ဍဲအခိၚ်ကဵုဒါန်သ္ၚာ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံပြာပ်အာသ္ၚိဒကာသအာၚ်ဂမၠိုၚ်အိုတ်ရ။ ကလိဂွံသ္ၚာအောန်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ကဵုဒါန်သ္ၚာ ကဵုအခေါၚ်တၞဟ်နပွမပြာပ်အာသ္ၚိဒကာသအာၚ်ဂမၠိုၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဘိက်နိမန်လဝ်ကဵုပိုဉ်တုဲ သီုမၞုံကဵုပိဏ္ဍပါတ်ပြာကဋ်ဂှ် ပ္ဍဲသွက်ကိုပ်ကၠာဟဂွံကဵုပိုဉ်ဏီကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ဂ္ၚေၚ်အာကၠုၚ် သ္ၚိဒကာသအာၚ်ဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ၊ ပ္ဍဲအရာပြာပ်အာသ္ၚိဒကာသအာၚ်ဂှ် ကြက်သ္ဒးဂတဝွံတုန် အခိၚ်အခါရောၚ်၊ အခိၚ်ကဵုဒါန်သ္ၚာရ၊ ဣဝွံတုန် ပ္ဍဲအရာပြာပ်အာသ္ၚိဒကာသအာၚ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
297) ပ္ဍဲအခိၚ်ဂှ် ခမဳဂမၠိုၚ် ဟိုတ်မဇိၚ်ဒၟံၚ်သ္ၚာဂှ်ရ နွံပၟိက်ကဵုတၞိၚ် တောဝ်ပလုဲ ၜုန်သၟတ်ဂမၠိုၚ်အိုတ်ရ။ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်ဒှ်တုဲ ဟွံပြာပ်အာသ္ၚိဒကာသအာၚ်ဂမၠိုၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ကဵုဇိၚ်သ္ၚာ ကဵုအခေါၚ် တၞဟ်နပွမပြာပ်အာသ္ၚိဒကာသအာၚ်ဂမၠိုၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဘိက်နိမန်လဝ်ကဵုပိုဉ်တုဲ သီုမၞုံကဵုပိဏ္ဍပါတ်ပြာကဋ်ဂှ် ပ္ဍဲသွက်ကိုပ်ကၠာဟဂွံကဵုပိုဉ်ဏီကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ၚေၚ်အာကၠုၚ် သ္ၚိဒကာသအာၚ်ဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ၊ ပ္ဍဲအရာပြာပ်အာသ္ၚိဒကာသအာၚ်ဂှ် ကြက်သ္ဂးဂတဝွံတုန် အခိၚ်အခါၚ်ရောၚ်၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာရ၊ ဣဝွံတုန် ပ္ဍဲအရာပြာပ်အာသ္ၚိုကာသအာၚ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
298) ပ္ဍဲအခိၚ်ဂှ် ခမဳဂမၠိုၚ် ဟိုတ်မဂိယဲဒၟံၚ်ဂှ်ရ နွံပၟိက်ကဵုဂဥုဲဂမၠိုၚ်အိုတ်ရ။ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်ဒှ်တုဲ ဟွံပြာပ်အာသ္ၚိဒကာသအာၚ်ဂမၠိုၚ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ရ ။ “ယွံခမဳတအ် ဂရၚ်ပတီ ခမဳမၞုံတဴပြာကဋ်တုဲ တၞဟ်နပွမပြာပ်အာသ္ၚိဒကာသအာၚ်ဂမၠိုၚ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ်ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
299) “ယြဴခမဳမွဲ ဘိက်နိမန်လဝ်ကဵုပိုဉ်တုဲ သီုမၞုံကဵုပိဏ္ဍပါတ်ပြာကဋ်ဂှ် ဟွံဂရၚ်ပတီခမဳမၞုံတဴပြာကဋ်တုဲ ပ္ဍဲသွက်ကိုပ်ကၠာ ဟဂွံကဵုပိုဉ်ဏီကီု ပ္ဍဲကြဴနူကဵုပိုဉ်တုဲကီု ဝေၚ်ကၠေံအခိၚ်အခါတုဲ ဂေတ်ဂ္ၚေတ်အာကပုၚ် သ္ၚိဒကာသအာၚ်ဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ၊ ပ္ဍဲအရာပြာပ်အာသ္ၚိဒကာသအာၚ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာရ၊ ဣဝွံတုန် ပ္ဍဲအရာပြာပ်အာသ္ၚိဒကာသအာၚ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
