၅.၅.၄.၁။ ပွံက်ရဟောပဋိစ္ဆန္နသိက္ခာပိုဒ်
286) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မာတုဂါမ် မ္ဂးဂှ် ဗြဴမၞိဟ်ရောၚ်၊ လကိုဟ် (ဒေဝတဴ) ဗြဴ ဟွံသေၚ်၊ ပြိုတ်ဗြဴ ဟွံသေၚ်၊ တိရစ္ဆာန်ဗြဴ ဟွံသေၚ်၊ ဗွဲတွဵုမယုတ် ကောန်ၚာ်ဗြဴ မၜံၚ်သၠးတိတ် တ္ၚဲဂှ်လေဝ် (မာတုဂါမ်) ရ၊ ပ္ဍဲမၞိဟ်ဗြဴ အဝယ်ဇၞော်ဂှ် သ္ဇက်ဟီုဟၟဲဟေၚ်ရ။ မွဲစွံ မ္ဂးဂှ် မွဲဂကောံဓဝ်။ ဌာန်လ္ၚု မ္ဂးဂှ် ဌာန်လ္ၚုဂြောပ်ဗ္ဒန်မတ် ဌာန်လ္ၚုဂြောပ်ဗ္ဒန်ကတောဝ်ရောၚ်။ ဌာန်လ္ၚုဂြောပ်ဗ္ဒန်မတ် မ္ဂးဂှ် ဌာန်ဟွံသၟဟ်အစောံ တၞဟ်နညာတ် ပွမထ္ၜေက်ထ္ၜးမတ်ကီု ပွမချဳထ္ၜးတၞေၚ်မတ်ကီု ပွမဓညိက်ထ္ၜးက္ဍိုပ်ကီုရောၚ်။ ဌာန်လ္ၚုဂြောပ်ဗ္ဒန်ကတောဝ် မ္ဂးဂှ် ဌာန်ဟွံသၟဟ်အစောံ တၞဟ်နမိၚ်ဂလာန်ဟီုပကတိရောၚ်။ ဌာန်ဂြောပ်ဗ္ဒန် မ္ဂးဂှ် ဌာန်မဂပ်ဝ်ဂြောပ်ဗ္ဒန်စဵုလဝ် နကဵုဗ္ဒၚ်ကီု နကဵုသၠတြၚ်ကီု နကဵုသကဝ်ကီု နကဵုယာတ်သၞိက်ကီု နကဵုတၞံဆုကီု နကဵုဒယိုၚ်ကီု နကဵုကောပ်ကာဲဒေဲါကီု နကဵုဝတ္ထုမမိက်မွဲမွဲရောၚ်။ ဂဇအ်ဒၟံၚ် မ္ဂးဂှ် မာတုဂါမ်ဃောဂဇအ်ဒၟံၚ်ဂှ် ဂဇအ်ပ္ဍဲဇရေၚ်ကီု တိတ်ပ္ဍဲဇရေၚ်ကီုမ္ဂး၊ ဒးအာပတ်ပဲါစိုတ်ရ။ ခမဳဃောဂဇအ်ဒၟံၚ် မာတုဂါမ်ဂှ် ဂဇအ်ပ္ဍဲဇရေၚ်ကီု တိက်ပ္ဍဲဇရေၚ်ကီုမ္ဂး၊ ဒးအာပတ်ပဲါစိုတ်ရ။ သီုညးၜါတၠ ဂဇအ်ဒၟံၚ်ကီု သီုညးၜါတၠ တိက်ဒၟံၚ်ကီုမ္ဂး၊ ဒးအာပတ်ပဲါစိုတ်ရ။
287) ပ္ဍဲမာတုဂါမ်ဂှ် မၞုံကဵုစၟတ်သမ္တီ မာတုဂါမ်ဒှ်တုဲ ဂဇအ်ဒၟံၚ်ပ္ဍဲဌာန်မလ္ၚုဂြေပ်ဗ္ဒန်မ္ဂး၊ ဒးအာပတ်ပဲါစိုတ်ရ။ ပ္ဍဲမာတုဂါမ်ဂှ် မၞုံကဵုသၠေဟ်ပၟာဒှ်တုဲ ဂဇအ်ဒၟံၚ်ပ္ဍဲဌာန်မလ္ၚုဂြောပ်ဗ္ဒန်မ္ဂး၊ ဒးအာပတ်ပဲါစိုတ်ရ။ မာတုဂါမ်ဂှ် မၞုံကဵုစၟတ်သမ္တီမာတုဂါမ် ဟွံသေၚ်ဒှ်တုဲ ဂဇအ်ဒၟံၚ်ပ္ဍဲဌာန်မလ္ၚုဂြောပ်ဗ္ဒန်မ္ဂး၊ ဒးအာပတ်ပဲါစိုတ်ရ။ ဂဇအ်ဒၟံၚ်ပ္ဍဲဌာန်မလ္ၚုဂြောပ်ဗ္ဒန် ကေုာံလကိုဟ် (ဒေဝတဴ) ဗြဴကီု ကေုာံပြိုတ်ဗြဴကီု ကေုာံခမၞုဲဗြဴကီု ကေုာံတိရစ္ဆာန်ဗြဴကီု ကေုာံတိရစ္ဆာန်ဗြဴ မပတောံလဝ်မၞိဟ်ကီုမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီ မာတုဂါမ်မ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမဂှ် မၞုံကဵုစၟတ်သမ္တီ မာတုဂါမ်ဟွံသေၚ်မ္ဂး၊ ဟွံဒးအာပတ်ရ။
288) သကအ်မၞိဟ်တြုံမတီစဳကၠး မမိက်ကဵုမွဲမွဲနွံမ္ဂး၊ ဒတူဟေၚ်တုဲ ဟွံဂဇအ်မ္ဂး၊ ဟွံသ္ၚေဝ်မဲကဵုဌာန်လ္ၚုမ္ဂး၊ ပၠုပ်ဒၟံၚ်စိုတ်အာရီုမွဲသအာၚ်တုဲ ဂဇအ်ဒၟံၚ်မ္ဂး၊ ဟွံဒးအာပတ်ရ။ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ရဟောပဋိစ္ဆန္နသိက္ခာပိုဒ် စတုတ္ထတုဲရ။
