၅.၅.၄။ ရဟောပဋိစ္ဆန္နသိက္ခာပိုဒ်

284) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် က္ညအာသ္ၚိမိတ်သဟာဲတုဲ ဂဇအ်ဒၟံၚ်ပ္ဍဲဌာန်လ္ၚုဂြောပ်ဗ္ဒန် ကေုာံသမ္ဘာမိတ်သဟာဲဂှ်မွဲစွံရ။ ပ္ဍဲအခိၚ်ဂှ် တြုံဂှ် “မုဟိုတ် တဳလပိုဉ်ဥပနန္ဒ သ္ဂောံဂဇအ်ဒၟံၚ်ပ္ဍဲဌာန်လ္ၚုဂြောပ်ဗ္ဒန် ကေုာံသမ္ဘာအဲဍိက်မွဲစွံရော?” ရဴဝွံ ဟီုဂရိုဟ်ရ၊ ဟီုပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်တြုံဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ် သ္ဂောံဂဇအ်ဒၟံၚ် ပ္ဍဲဌာန်လ္ၚုဂြောပ်ဗ္ဒန် ကေုာံမာတုဂါမ်မွဲစွံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ ဂဇအ်ဒၟံၚ် ပ္ဍဲဌာန်လ္ၚုဂြောပ်ဗ္ဒန် ကေုာံမာတုဂါမ်မွဲစွံရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ ဂဇအ်ဒၟံၚ် ပ္ဍဲဌာန်လ္ၚုဂြောပ်ဗ္ဒန် ကေုာံမာတုဂါမ်မွဲစွံရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

285) “ယြဴခမဳမွဲ ဂဇအ်ဒၟံၚ် ပ္ဍဲဌာန်လ္ၚုဂြောပ်ဗ္ဒန် ကေုာံမာတုဂါမ်မွဲစွံမ္ဂ၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။