၅.၅.၃.၁။ ပွံက်သဘောဇနသိက္ခာပိုဒ်

281) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ သ္ၚိ မၞုံကဵုတြုံဗြဴသမ္ဘာတၠသ္ၚိညးၜါ မ္ဂးဂှ် ဗြဴကီု တြုံကီု နွံရ၊ ဗြဴကီု တြုံကီု သီုညးၜါတၠ ဟွံတိတ် (မ္ၚး) အိုတ်ရ၊ ညးၜါတၠဂမၠိုၚ်ဂှ် ပွမထၞေန်စပ်ဟွံစာ်စ္ဍးအိုတ်ရ။ လုပ်တုဲ မ္ဂးဂှ် လုပ်အာအပ္ဍဲတုဲ။ ဂဇအ်ဒၟံၚ် မ္ဂးဂှ် ပ္ဍဲသ္ၚိမဇၞော် သၠးကၠေံဟတ္ထပါသ်ၜါဟတ်မွဲဍ ဇဵုတြၚ်တုဲ ဂဇအ်မ္ဂး၊ ဒးအာပတ်ပါဲစိုတ်ရ။ ပ္ဍဲသ္ၚိမဍောတ် ကလိလောန် စၞိန်စးဒုန်ဂတဵု (ဒုန်ကလီု) တုဲ ဂဇအ်မ္ဂး၊ ဒးအာပတ်ပါဲစိုတ်ရ။ 282) ပ္ဍဲဂၠမ်သတိက် မၞုံကဵုစၟတ်သမ္တီဂၠမ်သတိက်ဒှ်တုဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒၟံၚ်မ္ဂး၊ ဒးအာပတ်ပါဲစိုတ်ရ။ ပ္ဍဲဂၠမ်သတိက် မၞုံကဵုသၠေဟ်ပၟာဒှ်တုဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒၟံၚ်မ္ဂး၊ ဒးအာပတ်ပါဲစိုတ်ရ။ ပ္ဍဂၠမ်သတိက် မၞုံကဵုစၟတ်သမ္တီဂၠမ်သတိက်ဟွံသေၚ်ဒှ်တုဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒၟံၚ်မ္ဂး၊ ဒးအာပတ်ပါဲစိုတ်ရ။ ပ္ဍဲဟွံသေၚ်ကဵုဂၠမ်သတိက် မၞုံကဵုစၟတ်သမ္တီဂၠမ်သတိက်မ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုဂၠမ်သတိက် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲဟွံသေၚ်ကဵုဂၠမ်သတိက် မၞုံကဵုစၟတ်သမ္တီဂၠမ်သတိက်ဟွံသေၚ်မ္ဂး၊ ဟွံဒးအာပတ်ရ။ 283) ပ္ဍဲသ္ၚိမဇၞော် ဟွံသၠးကၠေံဟတ္ထပါသ်ၜါဟတ်မွဲဍ ဇဵုတြၚ်တုဲ ဂဇအ်မ္ဂး၊ ပ္ဍဲသ္ၚိမဍောတ် ဟွံကလိလောန် စၞိန်စးဒုန်ဂတဵု (ဒုန်ကလီု) တုဲ ဂဇအ်မ္ဂး၊ ခမဳသကအ်ပွံၚ်နွံမ္ဂး၊ ဗြဴကီု တြုံကီု သီုညးၜါတၠတိတ်ဒၟံၚ်မ္ၚးအိုတ်မ္ဂး၊ သီုညးၜါတၠဂမၠိုၚ် ပွမထၞေန်စပ်စ္ဍးအိုတ်မ္ဂး၊ ဂၠမ်သတိက်ဟွံသေၚ်မ္ဂး၊ ဟွံဒးအာပတ်ရ။ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သဘောဇနသိက္ခာပိုဒ် တတိယတုဲရ။