၅.၅.၃။ သဘောဇနသိက္ခာပိုဒ်
279) ပ္ဍဲအခိၚ်တၠဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် က္ညအာသ္ၚိမိတ်သဟာဲတုဲ ဂဇအ်ဒၟံၚ်ပ္ဍဲဂၠမ်သတိက် ကေုာံသမ္ဘာမိတ်သဟာဲဂှ်မွဲစွံရ။ ပ္ဍဲအခိၚ်ဂှ် တြုံဂှ် ပြာပ်အာဇရေၚ ်တဳလပိုဉ်ဥပနန္ဒ ကောန်သၟိၚ်သာကျဝၚ်တုဲ လ္ၚောဝ်သ္ပဝတ်တဳလပိုဉ်ဥပနန္ဒ ကောန်သၟိၚ်သာကျဝၚ်တုဲမ္ဂး ဂဇအ်ဒၟံၚ်ပ္ဍဲဒၞါဲမွဲရ၊ တြုံမဂဇအ်ဒၟံၚ် ပ္ဍဲဒၞါဲမွဲဂှ် “ဩဝ်ဗဂိန်ကဵုဒါန်ပိဏ္ဍပါတ် ကုကောန်နာဲညိ” ရဴဝွံ သ္ဂးကဵုသမ္ဘာရ။ ပ္ဍဲအခိၚ်ဂှ် သမ္ဘာဂှ် ကဵုဒါန်ပိဏ္ဍပါတ် ကုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် တြုံဂှ် “ယွံတအလပိုဉ် ဩဝ်က္ညအာညိရ၊ ကဵုဒါန်ပိဏ္ဍပါတ် ကုတဳလပိုဉ်တုဲရ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် ဗြဴဂှ် ‘တြုံဝွံတုန် ရာဂကတဵုဒၟံၚ်’ ရဴဝွံ ပသမ္တီဂွံတုဲ “ယွံတဳလပိုဉ် လ္ပက္ညအာညိဏီ၊ ဩဝ်ဂဇအ်ဒၟံၚ်ကၠာညိ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ မရနုက်ကဵုၜါဝါလေဝ် တြုံဂှ် ။ ပ ။ မရနုက်ကဵုပိဝါလေဝ် တြုံဂှ် “ယွံတဳလပိုဉ် ဩဝ်က္ညအာညိရ၊ ကဵုဒါန်ပိဏ္ဍပါတ် ကုတဳလပိုဉ်တုဲရ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ မရနုက်ကဵုပိဝါလေဝ် ဗြဴဂှ် “ယွံတဳလပိုဉ် လ္ပက္ညအာညိဏီ၊ ဩဝ်ဂဇအ်ဒၟံၚ်ကၠာညိ” ရဴဝွံ သ္ဂးကဵုတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ပ္ဍဲအခိၚ်ဂှ် တြုံဂှ် တိတ်အာတုဲ “ယွံတဳလပိုဉ်တအ် တဳလပိုဉ်ဥပနန္ဒဝွံ ဂဇအ်ဒၟံၚ်ပ္ဍဲဂၠမ်သတိက် ကေုာံသမ္ဘာအဲဍိက်မွဲစွံရ၊ ခမဳဂှ် ၜိုန်အဲဍိက်ဂပ်ဝ်ဗက်ဗ္ဒဴထောံလေဝ် ဟွံမွဲပၟိက်တၞဟ်နအာရ၊ ပိုဲဍိက်တအ်ညးဂမၠိုၚ် မၞုံကဵုကမၠောန်ကေၚ်ကာဂၠိုၚ်အိုတ်ရ၊ မၞုံကဵုသွက်ဒးသ္ပဂၠိုၚ်အိုတ်ရ” ကဵုဟီု ဗျိဒေါန်ရ ‘ကဵုဟီုဂရိုဟ်ပျုတ်ဗ္ဒေက်’ ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ် လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ သ္ဂောံဂဇအ်ဒၟံၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒမံၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠတပိုဉ်တြံပြကာ ဟီုဂရိုဟ်ရ ။ ပ ။ ယွံတြုဴမလ္ၚုသၟး (နူမဂ်ဖိုလ်) မုဟိုတ် တၠအဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒၟံၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏိ တၞဟ်နပွကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
280) “ယြဴခမဳမွဲ လုပ်အာပ္ဍဲသ္ၚိ မၞုံကဵုတြုံဗြဴသမ္ဘာတၠသ္ၚိညးၜါတုဲ ဂဇအ်ဒၟံၚ်မ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
