၅.၅.၂.၁။ ပွံက်ဥယျောဇနသိက္ခာပိုဒ်
276) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳ မ္ဂးဂှ် ဟိုတ်ခမဳမသအာၚ်နူဇကု။ ယွံကောန်တၠ ဩဝ်ကၠုၚ်ညိ၊ ကွာန်ကီု နိဂီုကီု မ္ဂးဂှ် ကွာန်ကီု နိဂီုကီု ဍုၚ်ကီု ကွာန်လေဝ်မ္ဂးရ၊ နိဂီုလေဝ်မ္ဂးရ။ ဖအောဝ်ကဵုကဵုအာမိသ ကုခမဳဂှ်တုဲ မ္ဂးဂှ် ဖအောဝ်ကဵုဵု ယာဂုကီု ပုၚ်ကီု စၞစကီု ဘောဇိုန်ကီုတုဲ။ ဟွံဖအောဝ်ကဵုကီုတုဲ မ္ဂးဂှ် ဟွံဖအောဝ်ကဵုကဵုမမိက်ကဵုမွဲမွဲတုဲ။ ဗလးဏာမ္ဂး မ္ဂးဂှ် မိက်ဂွံအီဂြိုၚ် မိက်ဂွံဝေၚ်ကတိုၚ်ကမှ် မိက်ဂွံဂဇအ်ပ္ဍဲဌာန်လ္ၚု မိက်ဂွံဒ္ဂေတ်သ္ပ ဒ္ဂေတ်မဟဂပ်ဝ်ဒ္ဂေတ် ကေုာံမာတုဂါမ်မွဲစွံတုဲ “ယွံကောန်တၠ ဩဝ်အာညိရ၊ ပွမဟီုဂလာန်ကီု ပွမပဒတဴမံၚ်စံၚ်ကီု ကေုာံတၠအဲဂှ် ဟွံဒှ်တသိုခ် ကုအဲရ၊ ပွမဟီုဂလာန်ကီု ပွမပဒတဴမံၚ်စံၚ်ကီု ကုအဲမဒှ်ညးမွဲဓဝ်ဂှ် ဒှ်တသိုခ်ရ” ရဴဝွံ ဟီုသ္ဂးတုဲ ဗလးဏာမ္ဂး၊ ဒးအာပတ်ဒုက္ကဋ်ရ၊ ဃောသၠးကၠေံ ဥပစာမထေက်ကဵုညာတ်ကီု ဥပစာမထေက်ကဵုမိၚ်ကီုဂှ် ဒးအာပတ်ဒုက္ကဋ်ရ၊ သၠးကၠေံတုဲမ္ဂး ဒးအာပတ်ပါဲစိုတ်ရ။ သ္ပဟိုတ်ကဵု ဟိုတ်ဂှ်ဟေၚ်တုဲ သီုဟွံမွဲကဵုဟိုတ်မွဲသအာၚ် မ္ဂးဂှ် တၞဟ်နဗလးဏာ ဟိုတ်တၞဟ်သအာၚ်မမိက်ကဵုမွဲမွဲဟွံမွဲရ။
277) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ ဗလးဏာမ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ ဗလးဏာမ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုစၟတ်သမ္တီခမဳဟွံသေၚ်ဒှ်တုဲ ဗလးဏာမ္ဂး၊ ဒးအာပတ်ပါဲစိုတ်ရ။ ပၞတ် (စိုတ်) တိတ်တုဲ ဒၠောံဗတောန်မ္ဂး၊ ဒးအာပတ်ဒုက္ကဋ်ရ၊ ဗလးဏာ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။ ပၞတ် (စိုတ်) တိတ်တုဲ ဒၠောံဗတောန်မ္ဂး၊ ဒးအာပတ်ဒုက္ကဋ်ရ။ ညးဟွံသေၚ်ကဵုခမဳဂှ် မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ၊ ပ္ဍဲညးဟွံသေၚ်ကဵုခမဳဂှ် မၞုံကဵုစၟတ်သမ္တီခမဳဟွံသေၚ်မ္ဂး၊ ဟွံဒးအာပတ်ရ။
278) “ခမဳဂမၠိုၚ်ၜါဇကု ဒှ်မွဲဂကောဓဝ်မ္ဂး ကြက်ဟွံယိုပ်ယာပ်အိုတ်ရ” ရဴဝွံ ဗလးဏာမ္ဂး၊ ဟွံဒးအာပတ်ရ။ “ညာတ်ဒးဂြပ်ရတ် မထေက်ကဵုၚုဟ်မးတုဲ ဓရ်လောဘ ကြက်ကတဵုဒှ်ရ” ရဴဝွံ ဗလးဏာမ္ဂး၊ ဟွံဒးအာပတ်ရ။ “ညာတ်ဒးမာတုဂါမ်တုဲ ကြက်ဒှ်ဟွံမိပ်လဟိၚ် (ပ္ဍဲသာသနာ) ရ” ရဴဝွံ ဗလးဏာမ္ဂး၊ ဟွံဒးအာပတ်ရ။ “ဩဝ်ပလံၚ်ဏာ ယာဂု ပုၚ် စၞစ ဘောဇိုန် ကုခမဳ မဂိယဲ ကုခမဳမသှေ်ၜက်ဒၟံၚ် ကုခမဳမၚ်ဘာညိ” ရဴဝွံ ဗလးဏာမ္ဂး၊ ဟွံဒးအာပတ်ရ။ သီုမဟွံမိက် ဒ္ဂေတ်သ္ပတဴ ဒ္ဂေတ်မဟဂပ်ဝ်ဒ္ဂေတ်ဂှ် ဟိုတ်နွံတုဲ ဗလးဏာမ္ဂး၊ ဟွံဒးအာပတ်ရ။ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်တရ။ ဥယျောဇနသိက္ခာပိုဒ် ဒုတိယတုဲရ။
