၅.၅.၂။ ဥယျောဇနသိက္ခာပိုဒ်

274) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳပိုဉ်ဥပနန္ဒ ကောန်သၟိၚ်သာကျဝၚ်ဂှ် “ယွံကောန်တၠ ဩဝ်ကၠုၚ်ညိ၊ ကြက်လုပ်ကွာန် တၞဟ်နပိဏ္ဍပါတ်အိုတ်ရ” ရဴဝွံ ဟီုသ္ဂးကဵုခမဳကွးပဒတဴမွဲစွံ ကောဇကုတုဲ သီုဟွံကဵုအာမိသ ကုခမဳဂှ် “ယွံကောန်တၠ ဩဝ်အာညိရ၊ ပွမဟီုဂလာန်ကီု ပွမပဒတဴမံၚ်စံၚ်ကီု ကေုာံတၠအဲဂှ် ဟွံဒှ်တသိုခ်ကုအဲရ၊ ပွမဟီုဂလာန်ကီု ပွမဒတဴမံၚ်စံၚ်ကီု ကုအဲမဒှ်ညးမွဲဓဝ်ဂှ် ဒှ်တသိုခ်ရ” ရဴဝွံ (ဟီုသ္ဂး) ဗလးဏာရ။ ပ္ဍဲအခိၚ်ဂှ် ခမဳဂှ် တ္ၚဲကြပ်စေၚ်တုဲ တၞဟ်နဂ္ၚေၚ်ပိဏ္ဍပါတ်လေဝ် ဟွံသၟဟ်ရထရ၊ ပ္ဍဲဇြပ်ကဵုပိုဉ်လေဝ် ကဵုပိုဉ်ဟွံဂတာပ်ရ၊ ပိုဉ်သကုတ်အာရ ‘ဟဂွံကဵုပိုဉ်ရ’ ။ ပ္ဍဲအခိၚ်ဂှ် ခမဳဂှ် က္ညအာအာရှာံဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ်ဂှ် ‘ယွံကောန်တၠ ဩဝ်ကၠုၚ်ညိ၊ ကြက်လုပ်ကွာန် တၞဟ်နပိဏ္ဍပါတ်အိုတ်ရ’ ရဴဝွံ ဟီုသ္ဂးတုဲ သီုဟွံကဵုအာမိသ ကုခမဳဂှ် ဗလးဏာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ ‘ယွံကောန်တၠ ဩဝ်ကၠုၚ်ညိ၊ ကြက်လုပ်ကွာန် တၞဟ်နပိဏ္ဍပါတ်အိုတ်ရ’ ရဴဝွံ ဟီုသ္ဂးတုဲ သီုဟွံကဵုအာမိသ ကုခမဳဂှ် ဗလးဏာရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ “ယွံကောန်တၠ ဩဝ်ကၠုၚ်ညိ၊ ကြက်လုပ်ကွာန် တၞဟ်နပိဏ္ဍပါတ်အိုတ်ရ” ရဴဝွံ ဟီုသ္ဂးတုဲ သီုဟွံကဵုအာမိသ ကုခမဳဂှ် ဗလးဏာရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

275) “ယြဴခမဳမွဲ ‘ယွံကောန်တၠ ဩဝ်ကၠုၚ်ညိ၊ တၞဟ်နပိဏ္ဍပါတ် ကြက်လုပ်ကွာန်ကီု နိဂီုကီုအိုတ်ရ’ ရဴဝွံ ဟီုသ္ဂးကဵုခမဳတုဲ ဖအောဝ်ကဵုကဵုအာမိသ ကုခမဳဂှ်တုဲကီု ဟွံဖအောဝ်ကဵုကဵုတုဲကီု ‘ယွဴကောန်တၠ ဩဝ်အာညိရ၊ ပွမဟီုဂလာန်ကီု ပွမပဒတဴမံၚ်စံၚ်ကီု ကေုာံတၠအဲဂှ် ဟွံဒှ်တသိုခ် ကုအဲရ၊ ပွမဟီုဂလာန်ကီု ပွမပဒတဴမံၚ်စံၚ်ကီု ကုအဲမဒှ်ညးမွဲဓဝ်ဂှ် ဒှ်တသိုခ်ရ’ ရဴဝွံ သ္ပဟိုတ်ကဵုဟိုတ်ဂှ်ဟေၚ်တုဲ သီုဟွံမွဲကဵုဟိုတ်မွဲသအာၚ် ဗလးဏာမ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။