၅.၅.၁၀.၁။ ပွံက်ဥယျောဓိကသိက္ခာပိုဒ်

324) ခမဳ မပဒတဴပ္ဍဲဒပ်ပၞာန် လုကဴၜါဗ္တံပိဗ္တံဂှ် မ္ဂးဂှ် ခမဳမပဒတဴ လုကဴၜါဗ္တံပိဗ္တံဂမၠိုၚ်ရောၚ်။ ဌာန်တဝ်စၞေဟ် မ္ဂးဂှ် ဌာန်ပန်ပေါဟ်ဗာ်ထပက်ရောၚ်။ ဌာန်မသူဗိုလ်လဗး မ္ဂးဂှ် စိၚ်ဂမၠိုၚ် မၞုံဗၞတ်ဝွံအိုတ်ရ၊ ချေံဂမၠိုၚ် မၞုံဗၞတ်ဝွံအိုတ်ရ၊ ကွဳစောတ်ရထာဂမၠိုၚ် မၞုံဗၞတ်ဝွံအိုတ်ရ၊ သရာဲပၞာန်တိုက်ဂမၠိုၚ် မၞုံဗၞတ်ဝွံအိုတ်ရ ရဴဝွံ ပွမရိုဟ်လၟိဟ်ရောၚ်။ ဌာန်ပြေၚ်ပၞာန် မ္ဂးဂှ် နူဌာန်ဝွံ ဩဝ်ကဵုစိၚ်ဂမၠိုၚ်မံၚ်အိုတ်ညိ၊ နူဌာန်ဝွံ ဩဝ်ကဵုချေံဂမၠိုၚ်မံၚ်အိုတ်ညိ၊ နူဌာန်ဝွံ ဩဝ်ကဵုကွဳစောတ်ရထာဂမၠိုၚ်မံၚ်အိုတ်ညိ၊ နူဌာန်ဝွံ ဩဝ်ကဵုသရာဲပၞာန်တိုက်ဂမၠိုၚ်မံၚ်အိုတ်ညိ ရဴဝွံ ပွမစဳရေၚ်ပြေၚ်စွံရောၚ်။ ပၞာန်ပန်ကၞိပ် မ္ဂးဂှ် ဂကောံစိၚ် ဂကောံချေံ ဂကောံကွဳစောတ်ရထာ ဂကောံသရာဲပၞာန်တိုက်ရောၚ်။ စိၚ်ဂမၠိုၚ်ပိပ္ဍိုက်ဂှ် ဒပ်စိၚ်အောန်အိုတ်မ္ဂးရ၊ ချေံဂမၠိုၚ်ပိပ္ဍိုက်ဂှ် ဒပ်ချေံအောန်အိုတ်မ္ဂးရ၊ ကွဳစောတ်ရထာဂမၠိုၚ်ပိပ္ဍိုက်ဂှ် ဒပ်ကွဳစောတ်ရထာအောန်အိုတ်မ္ဂးရ၊ တြုံဂမၠိုၚ်ပန်တၠ မၞုံကဵုလဴပ္ဍဲတဲဂှ် ဒပ်သရာဲပၞာန်တိုက်အောန်အိုတ်မ္ဂးရ။ တၞဟ်နဗဵုသ္ၚေဝ် အာမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မထေက်ကဵုညာတ်မွဲ ဒတူဒၟံၚ်တုဲ ဗဵုသ္ၚေဝ်မ္ဂး၊ ဒးအာပတ်ပဲါစိုတ်ရ။ သၠးကၠေံဥပစာမထေက်ကဵုညာတ်တုဲ ဗဵုသ္ၚေဝ်ဂၠိုၚ်ကဵုဝါမ္ဂး၊ ဒးအာပတ်ပဲါစိုတ်ရ။ အာတဴ တၞဟ်နပွမဗဵုသ္ၚေဝ် အၚ်္ဂပၞာန်မွဲမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မထေက်ကဵုညာတ်မွဲ ဒတူဒၟံၚ်တုဲ ဗဵုသ္ၚေဝ်မ္ဂး၊ ဒးအာပတ်ဒုက္ကဋ်ရ။ သၠးကၠေံ ဥပစာမထေက်ကဵုညာတ်တုဲ ဗဵုသ္ၚေဝ်ဂၠိုၚ်ကဵုဝါမ္ဂး၊ ဒးအာပတ်ဒုက္ကဋ်ရ။

325) ဒတူဒၟံၚ်ပ္ဍဲအာရှာမ်တုဲ ဗဵုသ္ၚေဝ်မ္ဂး၊ ကၠုၚ်တဴ ဌာန်ခမဳဒတူကီု ဌာန်ဂဇအ်ကီု ဌာနတိက်ကီုတုဲ ဗဵုသ္ၚေဝ်တဴ ပွမတဝ်စၞေဟ်ပၞာန်မ္ဂး၊ ဃောအာတဴဒစးတရဴ ညာတ်ဒးမ္ဂး၊ ကမၠောန်ထေက် ကဵုဒးသ္ပနွံတုဲအာဂှ် ညာတ်ဒးမ္ဂး၊ ပ္ဍဲအခိၚ်မၞုံကဵုပရိုက်ဘဲဂမၠိုၚ် ညာတ်ဒးမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဥယျောဓိကသိက္ခာပိုဒ် ဒသမတုဲရ။ အစေလကဝဂ် ပဉ္စမတုဲရ။