၅.၅.၁၀။ ဥယျောဓိကသိက္ခာပိုဒ်
322) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် သီုပဒတဴထောံ ပ္ဍဲဒပ်ပၞာန်လုကဴၜါဗ္တံပိဗ္တံအိုတ်ဂှ် အာတဴ ဌာန်တဝ်စၞေဟ်ကီု ဌာန်မသူဗိုလ်လဗး (ဌာန်စၟဳစၟတ်ရိုဟ်လၟိဟ်ဗိုလ်လဗး) ကီု ဌာန်ပြေၚ်ပၞာန်ကီု ပွမဗဵုပၞာန်ပန်ကၞိပ်ကီုအိုတ်ရ၊ ခမဳဆဗ္ဗဂ္ဂဳမွဲဇကုလေဝ် ဟိုတ်မအာဌာန်တဝ်စၞေဟ်ပၞာန်ဂှ်ရ ဒးအာလဴရ။ မၞိဟ်ဂမၠိုၚ် “ယွံတဳလပိုဉ် ပသာ်ရော? သ္ဂောံတဝ်စၞေဟ်ပၞာန် ဗွဲမဒးရးကီုဟာ၊ တဳလပိုဉ်ကလိဂွံၚုဟ်လိၚ်ဂမၠိုၚ်မုစိရော?” ရဴဝွံ သ္ပဂရိုၚ်စရဵု (ဟီုဗျံက်) ခမဳဂှ်အိုတ်ရ။ ခမဳဂှ် ဟိုတ်နူမၞိဟ်ဂမၠိုၚ်သ္ပဂရိုၚ်စရဵုဟီုဗျံက်ဂှ်ရ ဟွံမိပ်စိုတ်ဒှ်အာရ၊ (မုက်မတ်ဟွံကျေဝ် ဒှ်အာရ)။ မၞိဟ်ဂမၠိုၚ် “မုဟိုတ်ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ကၠုၚ်တဴ တၞဟ်နပွမဗဵုပေဲါတဝ်စၞေဟ်ပၞာန်အိုတ်ရော? ယြဴပိုဲညးဂမၠိုၚ် ဟိုတ်နူဟိုတ်မတွံဂးပွမဂယိုၚ်လမျီု ဟိုတ်နူဟိုတ်မတွံဂးပွမလွဳမြိမြန်ကောန်သမ္ဘာ သ္ဒးကၠုၚ်တဴ ပေဲါတဝ်စၞေဟ်ပၞာန်အိုတ်ရ၊ ကုပိုဲညးဂမၠိုၚ်ဂှ်လေဝ် ကလိဂွံဒဒှ်မၞိဟ်ခိုဟ် ဟွံသေၚ်ရ၊ ပိုဲညးဂမၠိုၚ်ဂှ်လေဝ် ဂပ်ဝ်ကလိဂွံဒဒှ်မၞိဟ် ဗွဲဟွံဒးရးရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂဳဂမၠိုၚ် အာတဴ တၞဟ်နပွမဗဵု ပေဲါတဝ်စၞေဟ်ပၞာန်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် မၞးတအ်ညးဂမၠိုၚ် အာတဴ တၞဟ်နပွမဗဵု ပေဲါတဝ်စၞေဟ်ပၞာန်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် အာတဴ တၞဟ်နပွမဗဵု ပေဲါတဝ်စၞေဟ်ပၞာန်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
323) “ခမဳ မပဒတဴပ္ဍဲဒပ်ပၞာန် လုကဴၜါဗ္တံပိဗ္တံဂှ် အာတဴ ဌာန်တဝ်စၞေဟ်ကီု ဌာန်မသူဗိုလ်လဗး (ဌာန်စၟဳစၟတ်ရိုဟ်လၟိဟ်ဗိုလ်လဗး) ကီု ဌာန်ပြေၚ်ပၞာန်ကီု ပွမဗဵုပၞာန်ပန်ကၞိပ်ကီုမ္ဂး၊ (ကုခမဳ) ဂှ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
