၅.၄.၉.၁။ ပွံက်ပဏဳတဘောဇနသိက္ခာပိုဒ်

260) ပ္ဍဲအရာယြဴဘောဇိုန်မပြဲဂမၠိုၚ် ဂှ် ကၠေၚ်သွဟ် မ္ဂးဂှ် ကၠေၚ်သွဟ်ဂၠဴကီု ကၠေၚ်သွဟ် ဗ္ၜေအ်ကီု ကၠေၚ်သွဟ်ပြေၚ်ကီု ယြဴဖျုန်သတ်ဂမၠိုၚ် ဂပ်ဝ္ရ၊ ကၠေၚ်သွဟ် သတ်ဂမၠိုၚ်ဂှ်ရောၚ်။ ကၠေၚ်တၟိ မ္ဂးဂှ် ကၠေၚ်တၟိ မကတဵုနူသတ်ဖျုန်မဂပ်ဝ်ဂမၠိုၚ်ဂှ်ရောၚ်။ ကၠေၚ် မ္ဂးဂှ် ကၠေၚ်လ္ၚဴ ကၠေၚ်ရာဲ ကၠေၚ်သတ်ဗၠတ် ကၠေၚ်တောၚ် ကၠေၚ်အယိၚ်ဂမၠိုၚ်ရ။ ဍာ်သာဲ မ္ဂးဂှ် တၚ်လာဲမကတဵုဒှ်နူက္ၜဴရောၚ်။ က မ္ဂးဂှ် သ္ဂးတဴ သတ်မဂေတ်ၚေၚ်ပ္ဍဲဍာ်ရ။ ဖျုန် မ္ဂးဂှ် ဖျုန်သတ်ဖျုတ်မဂပ်ဝ်ဂမၠိုၚ်ရောၚ်။ ဍာ်တှ် မ္ဂးဂှ် ဍာ်တှ်ဂၠဴ ဍာ်တှ်ဗ္ၜေအ် ဍာ်တှ်ပြေၚ် ဍာ်တှ်မကတဵုဒှ်နူသတ်ဖျုန်မဂပ်ဝ်ဂမၠိုၚ်ရ။ ဍာ်တှ်ထၟတ် မ္ဂးဂှ် ဍာ်တှ်ထၟတ် မကတဵုနူသတ်ဖျုန်မဂပ်ဝ်ဂမၠိုၚ်ဂှ်ရောၚ်။ ယြဴ မ္ဂးဂှ် ယြဴဍေံမၞုံသဘဴမဖှ်သာလဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဘောဇိုန်မပြဲပြဲဂမၠိုၚ် မၞုံသဘဴရဴဝွံ မ္ဂးဂှ် ဘောဇိုန်မပြဲပြဲဂမၠိုၚ် မၞုံသဘဴမဖှ်သာ်ဂှ်ရောၚ်။ ခမဳမဂိယဲ မ္ဂးဂှ် ခမဳစာ်စ္ဍးကေုာံဘောဇိုန်မပြဲပြဲဂမၠိုၚ်တုဲ မထတ်ယုက်ရောၚ်။ ခမဳမဂိယဲ မ္ဂးဂှ် ခမဳစာ်စ္ဍးကေုာံဘောဇိုန်မပြဲပြဲဂမၠိုၚ်တုဲ မဟွံထတ်ယုက်ရောၚ်။ သီုဟွံဂိယဲ တၞဟ်နဖဵုသွက်ဇကု အာတ်မ္ဂး၊ ဇၟာပ်ပတိတ်ဇြဟတ် ဇၟာပ်ပတိတ်ဇြဟတ် ဒးအာပတ်ဒုက္ကဋ်ရ။ “ကလိဂွံမ္ဂး ကြက်ပြဘိုဂ်ရ” ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ၊ ဇၟာပ်မၚိဖျေံ ဇၟာပ်မၚိတ်ဖျေဴ ဒးအာပတ်ပါဲစိုတ်ရ။

261) သီုဟွံဂိယဲ မၞုံကဵုစၟတ်သမ္တီဟွံဂိယဲဒှ်တုဲ တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စမ္ဂး၊ ဒးအာပတ်ပါဲစိုတ်ရ။ သီုဟွံဂိယဲ မၞုံကဵုသၠေဟ်ပၟာဒှ်တုဲ တၞဟ်နဖဵုသွက်ဇကု အာတ်တဴ ဘောဇိုန်မပြဲပြဲဂမၠိုၚ်တုဲ စမ္ဂး၊ ဒးအာပတ်ပါဲစိုတ်ရ။ သီုဟွံဂိယြ မၞုံကဵုစၟတ်သမ္တီဂိယဲဒှ်တုဲ တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စမ္ဂး၊ ဒးအာပတ်ပါဲစိုတ်ရ။ သီုမဂိယဲ မၞုံကဵုစၟတ်သမ္တီဟွံဂိယဲမ္ဂး၊ ဒးအာပတ်ဒုက္ကဋ်ရ။ သီုမဂိယဲ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ သီုမဂိယဲ မၞုံကဵုစၟတ်သမ္တီမဂိယဲမ္ဂး၊ ဟွံဒးအာပတ်ရ။

262) ကုခမဳမဂိယဲ ဟွံဒးအာပတ်ရ၊ ဂိယဲတုဲ အာတ်တုဲမ္ဂး သီုဟွံဂိယဲ စမ္ဂး၊ စတဴသှေ်သၟေဟ်ခမဳဂိယဲမ္ဂး၊ (အာတ်စနူဇရေၚ်) ညးဒှ်ကဠောမသ ညးဘိက်နိမန်လဝ်ဂမၠိုၚ်မ္ဂး၊ (အာတ်စ) တၞဟ်နသွက်ညးသအာၚ်မ္ဂး၊ (ရာန်စ) နကဵုဂြပ်ဇကုမ္ဂး၊ ဟွံဒးအာပတ်ရ၊ ကုခမဳကြက်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ပဏဳတဘလောဇနသိက္ခာပိုဒ် နဝမတုဲရ။