၅.၄.၉။ ပဏဳတဘောဇနသိက္ခာပိုဒ်
257) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှ်ာမ်အနာထပိဏ္ဍကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် တၞဟ်နဖဵုသွက်ကု အာတ်တဴ ဘောဇိုန်မပြဲပြဲဂမၠိုၚ်တုဲ စအိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် တၞဟ်နဖဵုသွက်ဇကု အာတ်တဴ ဘောဇိုန်မပြဲပြဲဂမၠိုၚ်တုဲ စအိုတ်ရော? မုရဴညးမွဲ ဟွံဒးစိုတ် ရှ်သာဍာတ်ကြိုအ်နွံရော၊ မုရဴညးမွဲ ဟွံသ္ဍိုက်မၠိုက်ဒးဂၞပ် ရှ်သာ်ခိုဟ်ခိုဟ် နွံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ် ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞိဟ်ဂမၠိုၚ် တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မုဟိုတ် မၞးတအ်ညးဂမၠိုၚ် တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စအိုတ်ရော၊ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴဘောဇိုန်မပြဲဂမၠိုၚ် နွံအိုတ်ရ၊ ဘောဇိုန်ဂမၠိုၚ်ဂှ် ညးဍေံအိုတ်ရော? ကၠေၚ်သွဟ်ကၠေၚ်တၟိ ကၠေၚ် ဍာ်သာဲ တၚ်လာဲ က ဖျုန် ဍာ်တျ် ဍာ်တှ်ထၟတ်ဂမၠိုၚ်ရောၚ်၊ ယြဴခမဳမွဲ တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ် မၞုံသဘဴရဴဝွံတုဲ စမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
258) ပ္ဍဲအခိၚ်ဂှ် ခမဳဂမၠိုၚ် ဂိယဲအိုတ်ရ၊ ခမဳမသၟာန်ယဲဂမၠိုၚ် “ယွံကောန်တၠတအ် ဒုၚ်စရၚ်ဟာ ယိုပ်ယာပ်ဟာ” ရဴဝွံ သၟာန်ခမဳမဂိယဲဂမၠိုၚ်အိုတ်ရ။ ယွံကောန်တၠတအ် ပိုဲညးဂမၠိုၚ် ပ္ဍဲအခိၚ်ကၠာတေံ တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ စအိုတ်ရ၊ ဟိုတ်ဂှ်ရ ဟွံဒှ်ပွမထတ်ယုက် ကုပိုဲညးဂမၠိုၚ်ရ ရဴဝွံ (ဟီုသ္ဂးအိုတ်ရ)။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ခမဳမဂိယဲဂှ် တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ်တုဲ တၞဟ်နစကဵုအခေါၚ်ရ” ရဴဝွံ သ္ဂးကဵု ခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ 259) “ယြဴဘောဇိုန်မပြဲဂမၠိုၚ် နွံအိုတ်ရ၊ ဘောဇိုန်ဂမၠိုၚ်ဂှ် ညးဍေံအိုတ်ရော? ကၠေၚ်သွဟ် ကၠေၚ်တၟိ ကၠေၚ် ဍာ်သာဲ တၚ်လာဲ က ဖျုန် ဍာ်တှ် ဍာ်တှ်ထၟတ်ဂမၠိုၚ်ရောၚ်၊ ယြဴခမဳမွဲ သီုဟွံဂိယဲ တၞဟ်နဖဵုသွက်ဇကု အာတ်တဴဘောဇိုန်မပြဲပြဲဂမၠိုၚ် မၞုံသဘဴရဴဝွံတုဲ စမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
