၅.၄.၈။ သန္နိဓိကာရကသိက္ခာပိုဒ်

252) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဗေလဋ္ဌသဳသ မဒှ်အ္စာဥပဇ္ၛာယ် တဳလပိုဉ်အာနန္ဒ သ္ပဒတဴဒၟံၚ်ပ္ဍဲဂြိုပ်ရ၊ တဳလပိုဉ်ဗေလဋ္ဌသဳသ ဂေတ်ဂ္ၚေၚ်တၞဟ်နပိဏ္ဍပါတ်တုဲ ရၚ်တၠုၚ်နၚ် ပုၚ်သက်သက် (ဟွံဖက်နှဴကဵုသွ) ဇရေၚ်အာရှာမ်တုဲ သကဵုကှ်ခ္ဍဟ်အာတုဲ (ဒေပ်) စွံလဝ်ရ၊ ပ္ဍဲအခိၚ်နွံပၟိက်ကဵု အာဟာရဂှ် ဖ္ဍုက်နဍာ်တုဲ ဖ္ဍုက်တုဲ သ္ပပြဘိုဂ်ရ။ ခမဳဂမၠိုၚ် “ယွံကောန်တၠ မုဟိုတ် တၠအဲ လအ်လကာဖာမှ လုပ်ကွာန်တၞဟ်နဂ္ၚေၚ်ပိဏ္ဍပါတ်ရော?” ရဴဝွံ သ္ဂးကဵုတၠဳပိုဉ်ဗေလဋ္ဌသဳလအိုတ်ရ။ ပ္ဍဲအခိၚ်ဂှ် တဳလပိုဉ်ဗေလဋ္ဌသဳသ ဟီုလဴဗ္စ ဟိုတ်ပရူပရာဂှ် ကုခမဳဂမၠိုၚ်ရ။ ယွံကောန်တၠ ပသာ်ရော တၠအဲ သ္ပပွမတိုပ်ဒေပ်လဝ်တုဲ စတဴဘောဇိုန်ဟာ ရဴဝွံ (သၟာန်အိုတ်ရ)။ ဍာံပြရ ယွံကောန်တၠတအ် ရဴဝွံ (သ္ဂးရ)။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဗေလဋ္ဌသဳသ သ္ပပွမတိုပ်ဒေပ်လဝ်တုဲ စတဴဘောဇိုန်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဗေလဋ္ဌသဳသ တၠအဲ သ္ပပွမတိုပ်ဒေပ်လဝ်တုဲ စတဴ ဘောဇိုန်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံဗေလဋ္ဌသဳသ (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

253) “ယြဴခမဳမွဲ သ္ပပွမတိုပ်ဒေပ်တုဲ စၞစကီု ဘောဇိုန်ကီု သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။