၅.၄.၇။ ဝိကာလဘောဇနာသိက္ခာပိုဒ်

247) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞါဲကဵုစၞ ကုယန်ခမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ပေါဲသဘၚ်လတူက္ဍဟ်ဒဵု ပ္ဍဲဍုၚ်ရာဇဂြိုဟ်ဒှ်ဒၟံၚ်ရ။ ခမဳသတ္တရသဝဂ္ဂဳ ‘ဂကောံစှ်ထပှ်ဇကု’ ဂမၠိုၚ် အာတဴ တၞဟ်နဗဵုပေါဲသဘၚ်လတူက္ဍဟ်ဒဵုအိုတ်ရ။ မၞိဟ်ဂမၠိုၚ် သ္ဂောံညာတ်ကေတ် ခမဳသတ္တရသဝဂ္ဂဳဂမၠိုၚ်တုဲ ဖုံကဵုဍာ် ကဵုလံက်လေတ်တဴ (စၠန်ဂမၠိုၚ်) တုဲ တရာပ်ဖာပ်ဗ္စပုၚ်တုဲမ္ဂး ကဵုဏာဒါန်စၞစဂမၠိုၚ်အိုတ်ရ။ ခမဳသတ္တရသဝဂ္ဂဳဂမၠိုၚ် ဂိုၚ်ကေတ်နၚ် စၞစတုဲ က္ညအာ အာရှာမ်ဘာတုဲ “ယွံကောန်တၠတအ် ဩဝ်ဂိုၚ်ကေတ်အိုတ်ညိ၊ ဩဝ်သ္ၚာဲတဴ စၞစအိုတ်ညိ” ရဴဝွံ သ္ဂးကဵုခမဳဆဗ္ဗဂ္ဂဳဂမၠိုၚ်အိုတ်ရ။ ယွံကောန်တၠတအ် မၞးတအ် ညးဂမၠိုၚ် ကလိဂွံနၚ်စၞစဝွံ မုရဴနူဌာန်လဵုမွဲရော? ရဴဝွံ (သၟာန်အိုတ်မ္ဂး) ခမဳသတ္တရသဝဂ္ဂဳဂမၠိုၚ် ဟီုလဴကဵုဟိုတ်ဂှ် ကုခမဳ ဆဗ္ဗဂ္ဂဳဂမၠိုၚ်အိုတ်ရ။ ယွံကောန်တၠတအ် ပသာ်ရော? မၞးတအ်ညးဂမၠိုၚ် စတဴဘောဇိုန် ပ္ဍဲအခိၚ်တ္ၚဲစေၚ်အိုတ်ဟာ ရဴဝွံ (သၟာန်အိုတ်ရ)။ ယွံကောန်တၠတအ် စအိုတ်ရ ရဴဝွံ (သ္ဂးအိုတ်ရ)။ ခမဳဆဗ္ဗဂ္ဂဳဂမၠိုၚ် “မုဟိုတ် ခမဳသတ္တရသဝဂ္ဂဳဂမၠိုၚ် စတဴဘောဇိုန် ပ္ဍဲအခိၚ်တ္ၚဲစေၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဟီုလဴဗ္စဟိုတ်ပရူပရာဝွံ ကုခမဳဂမၠိုၚ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳသတ္တရသဝဂ္ဂဳဂမၠိုၚ် စတဴဘောဇိုန် ပ္ဍဲအခိၚ်တ္ၚဲစေၚ်အိုတ်ရော?” ရဴဝွံဲ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် စတဴဘောဇိုန် ပ္ဍဲအခိၚ်တ္ၚဲစေၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မုဟိုတ် မၞးတအ်ညးဂမၠိုၚ် စတဴဘောဇိုန် ပ္ဍဲအခိၚ်တ္ၚဲစေၚ်အိုတ်ရော? ယွံတြုံမလ္ၚုသၟး (နူဂမ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

248) “ယြဴခမဳမွဲ ပ္ဍဲအခိၚ်တ္ၚဲမစေၚ် စၞစကီု ဘောဇိုန်ကီု သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။