၅.၄.၆။ ဒုတိယပဝါရဏာသိက္ခာပိုဒ်
242) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှ်ာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ်ၜါဇကု သွိုန်ဗပိုန်တဴ တရဴအဓာန်မဂၠိၚ်သ္ၚောဲ ဍုၚ်သာရဝှ်ဂှ် ပ္ဍဲဇနပိုဒ်ကောသသရးအိုတ်ရ။ ခမဳမွဲဇကုဂှ် ဒ္ဂေတ်သ္ပ ဒ္ဂေတ်ဟွံထေက်ကဵုဒ္ဂေတ်သ္ပရ၊ ခမဳမဒှ်သကအ်ပွံၚ်ဂှ် “ယွကောန်တၠ လ္ပပကမၠောန်မၞုံသဘဴရဴဝွံညိ၊ ကမၠောန်ဝွံ ဟွံဂပ်ဝ်ရ” ရဴဝွံ သ္ဂးကဵုခမဳဂှ်ရ၊ ခမဳဂှ် ဒက်လဝ်ဝဲ ပ္ဍဲခမဳမဟီုဒၠောံဗတောန်ဂှ်ရ။ ပ္ဍဲကြဴနူဂှ် ခမဳဂမၠိုၚ် အာဍုၚ်သာရဝှ်အိုတ်ရ။ ပ္ဍဲအခိၚ်ဂှ် ပ္ဍဲဍုၚ်သာရဝှ် ဂကောံမွဲဂှ် ကဵုဒါန်ပိဏ္ဍပါတ် ကုသၚ်ရ၊ ခမဳမဒှ်ကသအ်ပွံၚ်ဂှ် ဃောကဵုပိုဉ် ဒေါံရ ရဴဝွံ ဆေဝ်ဒဝ်ဒးရ၊ ခမဳမဒက်လဝ်ဝဲဂှ် က္ညအာသ္ၚိကဠောမသ ဂိုၚ်ကေတ်ပိဏ္ဍပါတ်တုဲ ပြာပ်အာဇရေၚ်ခမဳဂှ်တုဲမ္ဂး “ယွံကောန်တၠ ဩဝ်စညိ” ရဴဝွံ သ္ဂးကဵုခမဳဂှ်ရ။ ယွံကောန်တၠ ဒေါံရ ဍိုက်ပေၚ်တုဲရ ရဴဝွံ (သ္ဂးရ) ။ ယွံကောန်တၠ ပိဏ္ဍပါတ်ဂှ် ခိုဟ်ကွေံရ ဩဝ်စညိ ရဴဝွံ (ကလေၚ်သ္ဂးရ)။ ပ္ဍဲအခိၚ်ဂှ် ခမဳဂှ် ဟိုတ်နူခမဳမဒက်လဝ်ဝဲဂှ် ကရေပ်ကရောတ် စကာတေၚ်ဂှ်ရ သ္ဒးစထောံ ပိဏ္ဍပါတ်ဂှ်ရ။ ခမဳမဒက်လဝ်ဝဲဂှ်— “ယွံကောန်တၠ ညးမဖှ်ညံၚ်ရဴတၠအဲဂှ် ဂပ်ဝ်ဒၠောံဗတောန်အဲရ ရဴဝွံဲ သမ္တီထေၚ်ကေတ်ရသွံ၊ တၠအဲ ဃောကဵုပိုဉ် ဒေါဴရ ရဴဝွံ သီုမဆေဝ်ဒဝ်ဒးတုဲဂှ် စတဴဘောဇိုန် မဟဂွံသ္ပအတိရိတ်ဝိနယ်ကမ် ရသွံ” ရဴဝွံ သ္ဂးကဵုခမဳဂှ်ရ။ ယွံကောန်တၠ ထေက်ကဵုဟီုလဴဗ္စရ ဟွံသေၚ်ဟာ ရဴဝွံ (ခမဳပဌမဂှ် သ္ဂးရ)။ ယွံကောန်တၠ ထေက်ကဵုဒးသၟာန်ဏီရ ဟွံသေၚ်ဟာ ရဴဝွံ (ခမဳဒုတိယဂှ် သ္ဂးရ)။ ပ္ဍဲအခိၚ်ဂှ် ခမဳဂှ် ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ခမဳဃောကဵုပိုဉ် မဆေဝ်ဒဝ်ဒးဒေါံရတုဲဂှ် ရၚ်တၠုၚ်နၚ်တူရူ နကဵုဘောဇိုန် မဟဂွံသ္ပအတိရိတ်ဝိနယ်ကမ်ဏီတုဲ ဘိက်နိမန်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳ တၠအဲ ခမဳဃောကဵုပိုဉ် မဆေဝ်ဒဝ်ဒးဒေါံရတုဲဂှ် ရၚ်တၠုၚ်တူရူ နကဵုဘောဇိုန် မဟဂွံသ္ပအတိရိတ်ဝိနယ်ကမ်ဏီတုဲ ဘိက်နိမန်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ ခမဳဃောကဵုပိုဉ် မဆေဝ်ဒဝ်ဒးဒေါံရတုဲဂှ် ရၚ်တၠုၚ်နၚ်တူရူ နကဵုဘောဇိုန် မဟဂွံသ္ပအတိရိတ်ဝိနယ်ကမ်ဏီတုဲ ဘိက်နိမန်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
243) “ယြဴခမဳမွဲ ခမဳဃောကဵုပိုဉ် မဆေဝ်ဒဝ်ဒးဒေါံရတုဲဂှ် ရၚ်တၠုၚ်နၚ်တူရူ နကဵုစၞစကီု နကဵုဘောဇိုန်ကီု မဟဂွံသ္ပအတိရိတ်ဝိနယ်ကမ်ဏီတုဲ ‘ယွံခမဳ ဟေအ် ဩဝ်သ္ပပြဘိုဂ်လေဝ်သ္ပပြဘိုဂ်ညိ’ ရဴဝွံ သီုကဵုမတီတဴ (ခမဳဒးပဝါရိတ်တုဲ) ဂှ် မၞုံပၟိက်ကဵုမသက္ကု အသိၚ်ကြဳဇှ် ပရိုၚ်ဂုဏ်လီုလာ်ဒှ်တုဲ ဘိက်နိမန်မ္ဂး၊ သ္ပပြဘိုဂ်မ္ဂး (ကုခမဳမဘိက်ဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
