၅.၄.၄.၁။ ပွံက်ကာဏမာတုသိက္ခာပိုဒ်
233) ခမဳမပြာပ်စဴသ္ၚိဒကာဟေၚ် မ္ဂးဂှ် ဂကူ (ဒကာ) မ္ဂးဂှ် ဂကူသၟိၚ် ဂကူဗဗၞး ဂကူညးဗၞိက် ဂကူညးဒိုက်ဂတ် ရဴဝွံ နွံပန်ဂကူအိုတ်ရ။ ဍေံမပြာပ်စဴ မ္ဂးဂှ် ဍေံမပြာပအ်အာသ္ၚိဒကာဂှ်။ ကွာၚ်ခၞါ မ္ဂးဂှ် ကွာၚ်အိုတ်သီု မဂပ်ဝ်စဳရေၚ်လဝ် တၞဟ်နဖဵုပရၚ်ရောၚ်။ ကွာၚ်ဗဗိုဟ်ကၞိ မ္ဂးဂှ် ကွာၚ်အိုတ်သီု မဂပ်ဝ်စဳရေၚ်လဝ် တၞဟ်နဖဵုဇွောံမရောၚ်။ ရၚ်တၠုၚ်နၚ်တူရူတုဲ ဘိက်နိမန်မ္ဂး မ္ဂးဂှ် ဩဝ်ဒုၚ်ဂိုၚ်ကေတ် အတိုၚ်နွံပၟိက်ညိ ရဴဝွံ ဘိက်နိမန်မ္ဂး။ ခမဳမၞုံပၟိက် မ္ဂးဂှ် ခမဳမရာဒနာစၟဳဒၟံၚ်။ ဂပ်ဝ်ဒုၚ်ဂိုၚ်ကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗဗေၚ်အိုတ်ရ မ္ဂးဂှ် ဂပ်ဝ်ဒုၚ်ဂိုၚ်ကေတ်ကွာၚ်ဂမၠိုၚ် စဵုကဵုပေၚ်ဗဗေၚ်ၜါမ ဗဗေၚ်ပိမအိုတ်ရ။ လောန်လတူဂှ် ဒုၚ်ဂိုၚ်ကေတ်မ္ဂး မ္ဂးဂှ် ဒုၚ်ဂိုၚ်ကေတ် လောန်လတူၜါဗဗေၚ် ပိဗဗေၚ်ဂှ်မ္ဂး၊ ဒးအာပတ်ပါဲစိုတ်ရ။ ဒုၚ်ဂိုကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗဗေၚ်တုဲ မ္ဂးဂှ် ခမဳမတိတ်ကၠုၚ်နူသ္ၚိဂှ် ညာတ်ဒးခမဳမ္ဂး “ပ္ဍဲသ္ၚိဝွံ အဲ ဂပ်ဝ်ဒုၚ်ဂိုၚ်ကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗဗေၚ်တုဲအိုတ်ရ၊ နူသ္ၚိဂှ် လ္ပဒုၚ်ဂိုၚ်ကေတ်ရ” ရဴဝွံ ဂပ်ဝ်ဒးဟီုလဴဗ္စရ၊ ညာတ်ဖိုဟ် ယဝ်ဟွံဟီုလဴဗ္စမ္ဂး၊ ဒးအာပတ်ဒုက္ကဋ်ရ၊ သီုမဟီုလဴဗ္စဖိုဟ် ယဝ်ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ။ ရၚ်တၠုၚ်နၚ် နူဌာန်မဒုၚ်ဂိုၚ်ကေတ်တုဲ ဂပ်ဝ်ပါဲပရအ်စကေုာံခမဳဂမၠိုၚ်ရ မ္ဂးဂှ် ရၚ်တၠုၚ်ပတိတ် ဇြပ်ကဵုပိုဉ်တုဲ ဂပ်ဝ်ပါ်ပရအ်စရ။ ပွမပါ်ပရအ်စဝွံ ပ္ဍဲအရာဒုၚ်ဂိုၚ်ကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ဂှ် ဒှ်ဒ္ဂေတ်ဝတ်ရောၚ် မ္ဂးဂှ် ပွမပါ်ပရအ်စဝွံ ပ္ဍဲအရာဒုၚ်ဂိုၚ်ကေတ် ကွာၚ်ဂမၠိုၚ်ဂှ် ဒှ်ဒ္ဂေတ်ဝတ်မဗဗွဲကဵုဓရ်ရောၚ်။
234) ပ္ဍဲကွာၚ်မပဵုလောန် လတူမပေၚ်ၜါဗဗေၚ်ပိဗဗေၚ်ဂှ် မၞုံကဵုစၟတ်သမ္တီပဵုလောန်ဒှ်တုဲ ဒုၚ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ပ္ဍဲကွာၚ်မပဵုလောန် လတူမပေၚ်ၜါဗဗေၚ်ပိဗဗေၚ်ဂှ် မၞုံကဵုသၠေဟ်ပၟာဒှ်တုဲ ဒုၚ်ဂိုက်ကေတ်မ္ဂး၊ ဒးအာပတ်ပါဲစိုတ်ရ။ ပ္ဍဲကွာၚ်မပဵုလောန် လတူမပေၚ်ၜါဗဗေၚ်ပိဗဗေၚ်ဂှ် မၞုံကဵုစၟတ်သမ္တီယုတ်ဒေက်ဒှ်တုဲ ဒုၚ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ပ္ဍဲကွာၚ်မယုတ်ဒေက် ဟွံပေၚ်ၜါဗဗေၚ်ဂှ် မၞုံကဵုစၟတ်သမ္တီပဵုလောန်မ္ဂး၊ ဒးအာပတ်ဒုက္ကဋ်ရ။ ပ္ဍဲကွာၚ်မယုက်ဒေက် ဟွံပေၚ်ၜါဗဗေၚ်ပိဗဗေၚ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲကွာၚ်မယုတ်ဒေက် ဟွံပေၚ်ၜါဗဗေၚ်ပိဗဗေၚ်ဂှ် မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။
235) ဒုၚ်ဂိုၚ်ကေတ်ကွာၚ်ဂမၠိုၚ် မပေၚ်ၜါဗဗေၚ်ပိဗဗေၚ်မ္ဂး၊ ဒုၚ်ဂိုၚ်ကေတ်ကွာၚ်ဂမၠိုၚ် မယုက်ဒေက်ဟွံပေၚ်ၜါဗဗေၚ်ပိဗဗေၚ်မ္ဂး၊ ကဵုဒါန်ကွာၚ်မဟွံစဳရေၚ်လဝ် တၞဟ်နဖဵုပရၚ် မဟွံစဳရေၚ်လဝ် တၞဟ်နဖဵုဇွောံအိုတ်မ္ဂး၊ ကဵုဒါန်ကွာၚ်မသှေ်သၟေဟ် နူကွာၚ်ဂမၠိုၚ်မစဳရေၚ်လဝ်တၞန ဖဵုပရၚ်မစဳရေၚ်လဝ် တၞဟ်နဖဵုဇွောံအိုတ်မ္ဂး၊ ပွမကွာ်တရဴလလမ်တုဲ ကဵုဒါန်အိုတ်မ္ဂး၊ ဒုၚ်ဂိုၚ် ကေတ် ကွာၚ်ကဠောမသဂမၠိုၚ်ကီု ညးဘိက်နိမန်လဝ်ဂမၠိုၚ်ကီုမ္ဂး၊ ဒုၚ်ဂိုၚ်ကေတ်တၞဟ်နဖဵု ညးသအာၚ်မ္ဂး၊ ဒုၚ်ဂိုၚ်ကေတ် (မပ္တံကဵုကွာၚ်ဂမၠိုၚ်မကၠောန်သ္ပ) နဂြပ်ဇကုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ကာဏမာတုသိက္ခာပိုဒ် စတုတ္ထတုဲရ။
