၅.၄.၄။ ကာဏမာတုသိက္ခာပိုဒ်
230) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှ်ာမ်အနာထပိဏ္ဍကသေဌဳ ဇရေၚ်ဍုၚ်သာရဝှ်ဂှ် ဥပးဗြဴမိကာဏာဂှ် မၞုံကဵုဓရ်သဒ္ဓါရ၊ လျုၚ်ဇြုၚ်သ္ဍိုက်ရ၊ သၟတ်ဗြဴမၞုံယၟုကာဏာဂှ် သ္ပမ္ၚဵုထပ်တဲၜဲမတ်ကဵုစ ကုတြုံမွဲ ပ္ဍဲကွာန်သၟတ်မွဲရ။ ပ္ဍဲအခိၚ်ဂှ် ကာဏာ နကဵုကိစ္စကေၚ်ကာထေက်ကဵုဒးသ္ပ မမိက်ကဵုမွဲမွဲ အာသ္ၚိမိရ၊ ပ္ဍဲအခိၚ်ဂှ် တြုံတၠသ္ၚိ ကာဏာဂှ် “ကာဏာ ဩဝ်ကလေၚ်စဴကၠုၚ်ညိရ၊ နွံပၟိက်ကဵုကာဏာ ကလေၚ်စဴကၠုၚ်” ရဴဝွံ ဖအောဝ်ဗလးဏာကလုတ် ဇရေၚ်ကာဏာရ။ ပ္ဍဲအခိၚ်ဂှ် ဥပးဗြဴ မိကာဏာဂှ် “ပွမအာတဲသၟးသၟးဂှ် ဒှ်ညံၚ်ရဴဟၟဲကျာ်သြဳဂျ ဒးဂွဂၠေံရ” ရဴဝွံ ခၞါတဴကွာၚ်ရ၊ ကွာၚ်စိန်မ္ဂး ခမဳမဂ္ၚေၚ်ပိဏ္ဍပါတ်မွဲဇကု လုပ်ကၠုၚ်သ္ၚိဥပးဗြဴမိကာဏာရ၊ ပ္ဍဲအခိၚ်ဂှ် ဥပးဗြဴမိကာဏာဂှ် ဖအောဝ်ကဵုကဵုထောံဒါန်ကွာၚ် ကုခမဳဂှ်ရ၊ ခမဳဂှ် တိတ်အာတုဲမ္ဂး ဟီုလဴကဵုခမဳသအာၚ်မွဲဇကုရ၊ ကုခမဳဂှ်လေဝ် ဖအောဝ်ကဵုကဵုထောံဒါန်ကွာၚ်ရ၊ ခမဳ (မက္ညကၠုၚ်မရနုက်ကဵုၜါ) ဂှ် တိတ်အာတုဲမ္ဂး ဟီုလဴကဵုခမဳသအာၚ်မွဲဇကုရ၊ ကုခမဳ (မက္ညကၠုၚ်မရနုက်ကဵုပိ) ဂှ်လေဝ် ဖအောဝ်ကဵု ကဵုထောံဒါန်ကွာၚ်ရ၊ ကွာၚ်အတိုၚ်မစဳရေၚ်လဝ်ဂှ် အိုတ်အးအာရ။ မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် တြုံတၠသ္ၚိ ကာဏာဂှ် “ကာဏာ ဩဝ်ကလေၚ်စဴကၠုၚ်ညိရ၊ နွံပၟိက်ကဵုကာဏာ ကလေၚ်စဴကၠုၚ်ရ၊ ယဝ်ကာဏာ ဟွံကလေၚ်စဴကၠုၚ်မ္ဂး ကြက်ဂိုၚ်ကေတ် သမ္ဘာၚ်သအာၚ်ရ” ရဴဝွံ ဖအောဝ်ဗလးဏာကလုတ် ဇရေၚ်ကာဏာရ။ မရနုက်ကဵုပိဝါလေဝ် ။ ပ ။ ကွာၚ်အတိုၚ်မစဳရေၚ်လဝ်ဂှ် အိုတ်အးအာရ။ ပ္ဍဲအခိၚ်ဂှ် တြုံတၠသ္ၚိကာဏာဂှ် ဂိုၚ်ကေတ်သမ္ဘာသအာၚ်ရ။ “တြုံဂှ် ဂိုၚ်ကေတ်ထောံသမ္ဘာသအာၚ်ရဂး” ရဴဝွံ ကာဏာဂွံမိၚ်ကေတ်ရ၊ သၟတ်ဗြဴဂှ် သ္ဒးလရိုအ်ယာံကရေဝ်ကရောတ်ဒၟံၚ်ရ။ (သမ္တီ − ပ္ဍဲပါဠိဟွံခ္ဍန်တုဲ ပ္ဍဲဗၟာခ္ဍန်လဝ်ရ။ နွံပၟိက်မ္ဂးထၟံက်ပ္တိတ် ။ ပ ။ — ဂှ်ညိ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ က္ညပြာပ်စဴအာသ္ၚိဥပးဗြဴမိကာဏာတုဲ ဂဇအ်ဒၟံၚ်ပ္ဍဲသၞာ မလးပညပ်လဝ်ရ။ ပ္ဍဲအခိၚ်ဂှ် ဥပးဗြဴမိကာဏာဂှ် ပြာပ်အာဇရေၚ်တဳလမၞုံပိုဉ်ကျာ်တြဲတုဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ်ပ္ဍဲဒၞါဲမွဲရ၊ ဥပးဗြဴမိကာဏာ မဂဇအ်ဒၟံၚ်ပ္ဍဲဒၞါဲမွဲတုဲဂှ် “မုဟိုတ် ကာဏာဝွံ လရိုဟ်ယာံဒၟံၚ်ရော?” ရဴဝွံ တဳလမၞုံပိုဉ်ကျာ်တြဲ သၟာန်တိုန်ရ။ ပ္ဍဲအခိၚ်ဂှ် ဥပးဗြဴမိကာဏာဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုဥပးဗြဴမိကာဏာ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာကဵုမြဟ်မြာတုဲမ္ဂး ဒၠိုက်ကတဵုနူဒၞါဲ က္ညပါဲစ္ဍးအာရ။
231) ပ္ဍဲအခိၚ်ဂှ် ညးဗၞိက်မွဲတၠ နူဍုၚ်ရာဇာဂြိုဟ် သၟိက်အာဌာန်ဒိုဟ်ပလိုတ်ရ၊ ခမဳဂ္ၚေၚ်ပိဏ္ဍပါတ်မွဲဇကု လုပ်အာတၞဟ်နပိဏ္ဍပါတ် ဇရေၚ်ညးဗၞိက်ဂှ်ရ၊ ဉပးမွဲဂှ် ဖအောဝ်ကဵုကဵုဒါန်ကွာၚ်ဝိုဟ် ကုခမဳဂှ်ရ၊ ခမဳဂှ် တိတ်အာတုဲမ္ဂး ဟီုလဴကဵုခမဳသအာၚ်မွဲဇကုရ၊ ကုခမဳဂှ်လေဝ် ဖအောဝ်ကဵု ကဵုဒါန်ကွာၚ်ဝိုဟ်ရ၊ ခမဳ (မက္ညကၠုၚ်မရနုက်ကဵုၜါ) ဂှ် တိတ်အာတုဲမ္ဂး ဟီုလဴကဵုခမဳသအာၚ်မွဲဇကုရ၊ ကုခမဳ (မက္ညကၠုၚ်မရနုက်ကဵုပိ) ဂှ်လေဝ် ဖအောဝ်ကဵုကဵုဒါန်ကွာၚ်ဝိုဟ်ရ၊ ဇွောံမအတိုၚ်မစဳရေၚ်လဝ်ဂှ် အိုတ်အးအာရ။ ပ္ဍဲအခိၚ်ဂှ် ဥပးဂှ် “ယွံနာဲတအ် တ္ၚဲဏအ်ဗၞတ်မွဲတ္ၚဲ ဩဝ်လၟတ်မၚ်လ္ဇအိုတ်ညိကၠာ၊ ဇွောံမအတိုၚ်မစဳရေၚ်လဝ်ဂှ် ကဵုထောံဒါန် ကုတဳလပိုဉ်မဆာဲဂမၠိုၚ်ရ၊ ကြက်စဳရေၚ်ဇွောံမဏီရ” ရဴဝွံ သ္ဂးကဵုဂကောံမၞိဟ်ဂမၠိုၚ်ဂှ်ရ။ “ယွံကောန်နာဲ တၞဟ်နလၟတ်မၚ်လ္ဇဒၟံၚ်ဂှ် ဟွံသၟဟ်ရထရ၊ ဂကောံသက်ရဲဗၞိက်ဂမၠိုၚ် တိတ်အာတုဲရ” ရဴဝွံ သ္ဂးတုဲ အာထောံအိုတ်ရ၊ ပ္ဍဲအခိၚ်ဂှ် ဥပးဂှ် စဳရေၚ်ဇွောံတုဲ ဗက်တိတ်အာ နူလက်ကရဴမ္ဂး ကမၠတ်ဒမၠဂမၠိုၚ် ပၠံၚ်ဗတိုက်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ဟွံဗၞတ်ဗ္ၜတ်အိုတ်တုဲ ဒုၚ်ဂိုၚ်ကေတ်အိုတ်ရော? ဥပးညးဗၞိက်ဝွံ ကဵုဒါန်ကုခမဳဂမၠိုၚ်ဝွံတုဲ ဟိုတ်မဗက်တိတ်အာနူလက်ကရဴဂှ်ရ ကမၠတ်ဒမၠဂမၠိုၚ် ပၠံၚ်ဗတိုက်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ— “ယွံခမဳတအ် ဒှ်သာ်ဂှ်မ္ဂး သ္ပဟိုတ်ကဵု ဖဵုတၟေၚ်ဂမၠိုၚ်စှ်ပြကာမတွံဂး (၁) သွက်သ္ဂောံ ဒ္ဂေတ်လ္ၚတ်ဒုၚ်ဝန်မ္ဂး ဒးရးသန်ရ ဒဒက်တဴကဵုသၚ် (၂) သွက်ဂွံကဵုဒှ်သၚ်ဂမၠိုၚ်ဒှ်တသိုခ် ။ ပ ။ ၉၁၀) သွက်ဂွံယိုက်ဒိုက် ‘ဝိနယ်’ စေဝ်ပၞောန်တုဲ ပညပ်တဴ သိက္ခာပိုဒ် ကုခမဳဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
232) “ခမဳမပြာပ်စဴသ္ၚိဒကာဟေၚ် ရၚ်တၠုၚ်နၚ်တူရူ နကွာၚ်ခၞာဂမၠိုၚ်ကီု နကွာၚ်ဗဗိုဟ်ကၞိဂမၠိုၚ်ကီုတုဲ ဘိက်နိမန်မ္ဂး၊ ခမဳမၞုံပၟိက်ဂှ် ဂပ်ဝ်ဒုၚ်ဂိုၚ်ကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗဗေၚ်အိုတ်ရ၊ လောန်လတူၜါဗဗေၚ်ပိဗဗေၚ်ဂှ် ယဝ်ဒုၚ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ၊ ဒုၚ်ဂိုၚ်ကေတ် ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗဗေၚ်တုဲ ရၚ်တၠုၚ်နၚ် နူဌာန်မဒုၚ်ဂိုၚ်ကေတ်တုဲ ဂပ်ဝ်ပါ်ပရအ်စ ကေုာံခမဳဂမၠိုၚ်ရ၊ ပွမပါ်ပရအ်စဝွံ ပ္ဍဲအရာဒုၚ်ဂိုၚ်ကေတ်ကွာၚ်ဂမၠိုၚ် စဵုကဵုပေၚ်ၜါဗဗေၚ်ပိဗေေၚ်ဂှ် ဒှ်ဒ္ဂေတ်ဝတ်ရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
