၅.၄.၃။ ပရမ္ပရဘောဇနသိက္ခာပိုဒ်
221) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာပြသာဒ်မၞုံကဵုဓုပ်ပြကာ အပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳဂှ် ပ္ဍဲဍုၚ်ဝေသာလဳ စွံပတန်လဝ် အလန်ပိဏ္ဍပါတ် မပြဲပြဲရ။ ပ္ဍဲအခိၚ်ဂှ် ကသပ်ကတဵုဒှ် ကုသၟာကမၠောန်ဒိုက်ဂတ်မွဲရ− “ယြဴနစၟတ်သမ္တီမွဲ ဂကောံမၞိဟ်ဂမၠိုၚ်ဝွံ သ္ပပဠေဝ်ပဠေတ်တဴ ပိဏ္ဍပါတ်ဗွဲမရှေ်သှေ်ရဴဂဴအိုတ်ရ၊ နစၟတ်သမ္တီဂှ် ပွမသ္ပပဠေဝ်ပဠေတ်တဴ ပိဏ္ဍပါတ်ဗွဲမရှေ်သှေ်ဂှ် ကြက်ဒှ်ဟွံယုတ်သဝ်ရ၊ အဲလေဝ် သ္ဂောံပဠေဝ်ပဠေတ်တဴ ပိဏ္ဍပါတ်ဗွဲမရှေ်သှေ်ရဴဂဴမ္ဂး ခိုဟ်သန်ရ” ရဴဝွံ (ကသပ်ဒှ်ရ)။ ပ္ဍဲအခိၚ်ဂှ် သၟာန်ကမၠောန်ဒိုက်ဂတ်ဂှ် ပြာပ်အာဇရေၚ် ညးမၞုံယၟုကိရပတိကတုဲမ္ဂး “ယွံကောန်နာဲ အဲဍိက် မိက်တရာပ်ဖာပ်ဗ္စပိဏ္ဍပါတ် ကုခမဳသၚ် မၞုံပဓာန်တဳလမၞုံပိုဉ်ကျာ်တြဲရ၊ ဩဝ်ကဵုၚုဟ်ဇွောံမ ကုအဲညိ” ရဴဝွံ သ္ဂးကဵုညးမၞုံယၟုကိရပတိကဂှ်ရ။ ညးမၞုံယၟုကိရပတိကဂှ်လေဝ် မၞုံကဵုဓရ်သဒ္ဓါရ၊ လျုၚ်ဇြုၚ်သ္ဍိုက်ရ၊ ညးမၞုံယၟုကိရပတိကဂှ်လေဝ် ကဵုတဴၚုဟ်ဇွောံမပဵုသာလောန် ကုသၟာန်ကမၠောန်ဒိုက်ဂတ်ဂှ်ရ။ ပ္ဍဲအခိၚ်ဂှ် သၟာကမၠောန်ဒိုက်ဂတ်ဂှ် ပြာပ်အာဇရေၚ် တဳလမၞုံပိုဉ်ကျာ်တြဲတုဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး ဂဇအ်ဒၟံၚ်ပ္ဍဲဒၞါဲမွဲရ၊ သၟာကမၠောန်ဒိုက်ဂတ် မဂဇအ်ဒၟံၚ်ပ္ဍဲဒၞါဲမွဲတုဲဂှ် “ယွံတဳလပိုဉ် တဳလမၞုံပိုဉ်ကျာ်တြဲ မွဲဟာန်ကေုာံခမဳသၚ် သွက်တ္ၚဲယး ဩဝ်ဒုၚ်တဲပိဏ္ဍပါတ် အဲဍိက်ညိ” ရဴဝွံ ဂရၚ်ပတီတဳလမၞုံပိုဉ်ကျာ်တြဲရ။ “ယွံဒကာ ခမဳသၚ် နွံဂၠိုၚ်လောန်ရ၊ ဩဝ်ချပ်ထောံကၠာညိ” ရဴဝွံ (သ္ဂးရ) ။ “ယွံတဳလမၞုံပိုဉ် ခမဳသၚ် နွံဂၠိုၚ်လောန် ကဵုဒှ်ကၠာရ၊ အဲဍိက် စဳရေၚ်လဝ် ယိုဟ်ေဗ္ဒရ်ဂမၠိုၚ် ဗွဲမဂၠိုၚ်အိုတ်ရ၊ သွက်ဂွံသုၚ်ဂမၠိုၚ် မဒှ်မွဲဟာန်ကေုာံစၞစ မနှဴရဴကေုာံယိုဟ်ဗ္ဒရ် ကြက်ဍိုက်ပေၚ်အိုတ်ရ” ရဴဝွံ (ဂရၚ်ပတီရ) ။ တဳလမၞုံပိုဉ်ကျာ်တြြ နပွမဒၟံၚ်သ္ၚိတ်သ္ၚိတ်ဂှ် ဒုၚ်ထောံတဲရ။ ပ္ဍဲအခိၚ်ဂှ် သၟာကမၠောန်ဒိုက်ဂတ်ဂှ် တီကေတ်တဳလမၞုံပိုဉ်ကျာ်တြဲ ဒုၚ်တဲတုဲ ဒၠိုက်ကတဵုနူဒၞါဲတုဲမ္ဂး သီုမလ္ၚောဝ်သ္ပဝတ်တဳလမၞုံပိုဉ်ကျာ်တြဲဂှ် သ္ပရှေ်သှေ်ရဴဂဴကၠာ ပါဲစ္ဍးအာရ။ “သၟာကမၠောန်ဒိုက်ဂတ်ဂှ် တၞဟ်နသွက်တ္ၚဲယး ဘိက်နိမန်လဝ် ခမဳသၚ် မၞုံပဓာန်တဳလမၞုံပိုဉ်ကျာ်တြဲ ရဂး၊ သွက်ဂွံသုၚ်ဂမၠိုၚ် မဒှ်မွဲဟာန်ကေုာံစၞစ မနှဴရဴကေုာံယိုဟ်ဗ္ဒရ် ကြက်ဍိုက်ပေၚ်အိုတ်ရ” ရဴဝွံ ခမဳဂမၠိုၚ် သ္ဂောံမိၚ်ကေတ်အိုတ်ဟေၚ်ရ။ ခမဳဂမၠိုၚ်ဂှ် နူဂယးပြဟ်ဟေၚ်ဂေတ်ဂ္ၚေၚ်ပိဏ္ဍပါတ်တုဲ သ္ပပြဘိုဂ်ပိဏ္ဍပါတ်အိုတ်ရ။ “သၟာန်ကမၠောန်ဒိုက်ဂတ်ဂှ် တၞဟ်နသွက်တ္ၚဲယး ဘိက်နိမန်လဝ်ခမဳသၚ် မၞုံပဓာန်တဳလမၞုံပိုဉ်ကျာ်တြဲရ” ရဴဝွံ ဂကောံမၞိဟ်ဂမၠိုၚ် သ္ဂောံမိၚ်ကေတ်အိုတ်ဟေၚ်ရ။ ဂကောံမၞိဟ်ဂမၠိုၚ်ဂှ် (ဘိုၚ်ရီုဗၚ်) ပလံၚ်ဏာ စၞစဘောဇိုန်ဂမၠိုၚ်ဗွဲမဂၠိုၚ် ဇရေၚ်သၟာန်ကမၠောန်ဒိုက်ဂတ်အိုတ်ရ။ ပ္ဍဲအခိၚ်ဂှ် သၟာကမၠောန်ဒိုက်ဂတ်ဂှ် ဗ္တံဂှ်လောန်ၜက်တုဲပ္ဍဲကြဴ သကဵုစဳရေၚ်တဴစၞအာဟာရဘောဇိုန်မပြဲပြဲတုဲ “ယွံတဳလပိုဉ် ဒးအခိၚ်ရ၊ ပဠေဝ်လဝ်ပိဏ္ဍပါတ်တုဲရ” ရဴဝွံ ဂရၚ်ပတီ (အခိၚ်) ကုတဳလမၞုံပိုဉ်ကျာ်တြဲရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ်ဗဗေၚ်သ္ၚာတုဲ က္ညပြာပ်စဴအာသ္ၚိ သၟာန်ကမၠောန်ဒိုက်ဂတ်တုဲမ္ဂး မွဲဟာန်ကေုာံခမဳသၚ်ဂဇအ်ဒၟံၚ်ပ္ဍဲသၞာ မလးပညပ်လဝ်ရ။ ပ္ဍဲအခိၚ်ဂှ် သၟာန်ကမၠောန်ဒိုက်ဂတ်ဂှ် ကၠောန်ၜိုတ်ဥပကာခမဳဂမၠိုၚ် ပ္ဍဲဌာန်ကဵုပိုဉ်ရ။ ခမဳဂမၠိုၚ် “ယွံဒကာ ဩဝ်ကဵုဒါန် ဗၞတ်ညိနာၚ်ဟေၚ်ညိ၊ ဩဝ်ကဵုဒါန် ဗၞတ်ညိနာၚ်ဟေၚ် ညိ” ရဴဝွံ ဟီုသ္ဂးအိုတ်ရ။ ယွံတဳလပိုဉ်တအ် တဳလပိုဉ်တအ်ညးဂမၠိုၚ် ညးဝွံတုန် သၟာန်ကမၠောန်ဒိုက်ဂတ်ရောၚ် ရဴဝွံ (ချပ်ဗှ်ဗၞုဟ်တုဲ) လ္ပဒုၚ်ဂိုၚ်ကေတ် ဗၞတ်ညိည ဗၞတ်ညိညအိုတ်ညိ၊ အဲဍိက်စဳရေၚ်စွံလဝ် စၞအာဟာရဘောဇိုန် ဗွဲမဂၠိုၚ်ရ၊ တၠဳပိုဉ်တအ်ညးဂမၠိုၚ် ဩဝ်ဒုၚ်ဂိုၚ်ကေတ် အတိုၚ်နွံပၟိက်အိုတ်ညိ ရဴဝွံ (ဂရၚ်ပတီရ) ။ ယွံဒကာ ဟိုတ်နူဟိုတ်ဝွံတုဲ ပိုညးဂမၠိုၚ် ဒုၚ်ဂိုၚ်ကေတ် ဗၞတ်ညိည ဗၞတ်ညိညဟေၚ် ဟွံသေၚ်အိုတ်ရ၊ ဗွဲစၟတ်တုန် ပိုဲညးဂမၠိုၚ် နူဂယးပြဟ်ဟေၚ် ဂေတ်ဂ္ၚေၚ်ပိဏ္ဍပါတ်တုဲ သ္ပပြဘိုဂ်ပိဏ္ဍပါတ်တုဲအိုတ်ရ၊ ဟိုတ်ဂှ်ရ ပိုဲညးဂမၠိုၚ် ဒုၚ်ဂိုၚ်ကေတ် ဗၞတ်ညိည ဗၞတ်ညိညဟေၚ်အိုတ်ရ ရဴဝွံ (ဟီုသ္ဂးအိုတ်ရ)။ ပ္ဍဲအခိၚ်ဂှ် သၟာကမၠောန်ဒိုက်ဂတ်ဂှ် “မုဟိုတ် တဳလပိုဉ်မဆာဲဂမၠိုၚ် သီုအဲဘိက်နိမန်လဝ်ဂှ် သ္ဂောံသ္ပပြဘိုဂ် ပ္ဍဲဌာန်မွဲသအာၚ်အိုတ်ရော? အဲ သၟဟ်ရထဒၟံၚ် တၞဟ်နကဵုဒါန် အတိုၚ်နွံပၟိက်ရ ဟွံသေၚ်ဟာ” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်သၟာန်ကမၠောန်ဒိုက်ဂတ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် သီုဘိက်နိမန်လဝ် ပ္ဍဲဌာန်မွဲသအာၚ်ဂှ် သ္ပပြဘိုဂ်ပ္ဍဲဌာန်သအာၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သီုဘိက်နိမန်လဝ် ပ္ဍဲဌာန်မွဲသအာၚ်ဂှ် သ္ပပြဘိုဂ်ပ္ဍဲဌာန်မွဲသအာၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) ။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် သီုဘိက်နိမန်လဝ် ပ္ဍဲဌာန်မွဲသအာၚ်ဂှ် သ္ပပြဘိုဂ်ပ္ဍဲဌာန်မွဲသအာၚ်အိုတ်ရော? ယွံခမဳတအ် (ပွမၞးတအ်ညးဂမၠုိၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဉ်ဝွံအိုတ်ညိ။ “ဟိုတ်နူပွမသ္ပပြဘိုဂ် ပရမ္မရဘောဇိုန် ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
222) ပ္ဍဲအခိၚ်ဂှ် ခမဳမွဲဇကု ဂိယဲဒၟံၚ်ရ၊ ခမဳမွဲဇကုဂှ် ရၚ်တၠုၚ်နၚ် ပိဏ္ဍပါတ်တုဲ ပြာပ်အာဇရေၚ် ခမဳဂှ်တုဲမ္ဂး “ယွံကောန်တၠ ဩဝ်သ္ပပြဘိုဂ်ညိ” ရဴဝွံ သ္ဂးကဵုခမဳဂှ်ရ။ ယွံကောန်တၠဒေါံရ၊ အလယ်သွက်ကလိဂွံပိဏ္ဍပါတ် နွံကုအြရ ရဴဝွံ သ္ဂးရ၊ ပိဏ္ဍပတ်ခမဳဂှ် တ္ၚဲသၠုၚ်မှ ဂွံရၚ်တၠုၚ်နၚ်ရ၊ ခမဳဂှ် အတိုၚ်သဘဴစိုတ်နွံဂှ် စဟွံမာန်ရ၊ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ− “ယွံခမဳတအ် ကုခမဳမဂိယဲဂှ် ကဵုအခေါၚ် တၞဟ်နပွမသ္ပပြဘိုဂ် ပရမ္ပရဘောဇိုန်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ် ပရမ္ပရဘောဇိုန် ဒးအာပတ်ပါဲစိုတ်ရ၊ ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲရ၊ ဣဝွံတုန် ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳတအ်ဂမၠိုၚ်ရ။
223) ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲအခိၚ်ကဵုဒါန်သ္ၚာ စဳရေၚ်လဝ်ပိဏ္ဍပါတ် မွဲဟာန်ကေုာံသ္ၚာတုဲ “ကဵုဒါန်ပိဏ္ဍပါတ်တုဲမ္ဂး ကြက်ကဵုဒါန်သ္ၚာအိုတ်ရ” ရဴဝွံ ဘိက်နိမန်ခမဳဂမၠို်ၚအိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပါဲကၠေံပရမ္ပရဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ကလိဂွံသ္ၚာအောန်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ် ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ကဵုဒါန်သ္ၚာ ကဵုအခေါၚ် တၞဟ်နပွမသ္ပပြဘိုဂ်ပရမ္ပရဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ် ပရမ္ပရဘောဇိုန် ဒးအာပတ်ပါဲစိုတ်ရ၊ ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာရ၊ ဣဝွံတုန် ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
224) ပ္ဍဲအခိၚ်ဂှ် မၞိဟ်ဂမၠိုၚ် ဘိက်နိမန်တဴ ခမဳမဇိၚ်သ္ၚာဂမၠိုၚ် နကဵုပိဏ္ဍပါတ်အုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပါဲကၠေံပရမ္ပရဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတရ ။ ပ ။ “ယွံခမဳတအ် ပ္ဍဲအခိၚ်ဇိၚ်သ္ၚာ ကဵုအခေါၚ် တၞဟ်နပွမသ္ပပြဘိုဂ်ပရမ္ပရဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ 225) “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ပရမ္ပရဘောဇိုန် ဒးအာပတ်ပါဲစိုတ်ရ၊ ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာရ၊ ဣဝွံတုန် ပ္ဍဲအရာသ္ပပြဘိုဂ်ပရမ္ပရဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
226) ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး သီုမဂိုၚ်ထ္ၜကေတ် ဗဗေၚ်သ္ၚာ က္ညပြာပ်စဴအာသ္ၚိဒကာမွဲ မွဲဟာန်ကေုာံတဳလပိုဉ်အာနန္ဒ မဒှ်ခမဳဗွက်ကြဴတုဲ ဂဇအ်ဒၟံၚ်ပ္ဍဲသၞာ မလးပညပ်လဝ်ရ။ ပ္ဍဲအခိၚ်ဂှ် မၞိဟ်ဂမၠိုၚ် ကဵုဒါန်ဘောဇိုန် ကုတဳလမၞုံပိုဉ်ကျာ်တြဲကီု ကတဳလပိုဉ်အာနန္ဒကီုအိုတ်ရ။ တဳလပိုဉ်အာနန္ဒ မၞုံ ‘သံသယကုက္ကုစ္စ’ ပွမချပ်သၠေဟ်ပၟာ ရဴဝွံမ္ဂးဟွံဂပ်ဝ်ဒှ်တုဲ ဟွံဒုၚ်ဂိုၚ်ကေတ်ရ။ တဳလမၞုံပိုဉ်ကျာ်တြဲဂှ် ယွံအာနန္ဒ ဩဝ်ဒုၚ်ဂိုၚ်ကေတ်ညိ ရဴဝွံသ္ဂးရ။ ယွံတဳလမၞုံပိုဉ်ဒေါံရ၊ အလယ်သွက်ကလိဂွံပိဏ္ဍပါတ် နွံကုအဲရ ရဴဝွံ (ဂရၚ်ပတီရ)။ ယွံအာနန္ဒ ယဝ်ဒှ်သာ်ဂှ်မ္ဂး သ္ပဝိကပ္ပနတုဲ ဩဝ်ဒုၚ်ဂိုၚ်ကေတ်ညိ ရဴဝွံ (သ္ဂးရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ − “ယွံခမဳတအ် သ္ပဝိကပ္ပနတုဲ တၞဟ်နပွမသ္ပပြဘိုဂ်ပရမ္ပရဘောဇိုန် ကဵုအခေါၚ်ရ” ရဴဝွံ သ္ဂးကဵုအခဳဂမၠိုၚ်ရ။ ယွံခမဳတအ် ရဴဝွံဟေၚ် ဂပ်ဝ်သ္ပဝိကပ္ပန ရ။ “အလယ်ပိဏ္ဍပါတ်အဲကလိဂွံဂှ် ကဵုတဴဒါန် ကုခမဳမၞုံယၟုဝွံရ” ရဴဝွံ (ဂပ်ဝ်သ္ပဝိကပ္ပနရ) ။
