၅.၄.၂.၁။ ပွံက်ဂဏဘောဇနသိက္ခာပိုဒ်
218) ဂဏဘောဇိုန် မ္ဂးဂှ် ယြဴပ္ဍဲဌာန်မွဲ ဟိုတ်မဘိက်နိမန် ခမဳဂမၠိုၚ်ပန်ဇကု ပၞောဝ်ဘောဇိုန်မသုန်သာ် နကဵုဘောဇိုန်မွဲမွဲသာ်ဂှ်ရသ္ပပြဘိုဂ်အိုတ်ရ၊ ဣဝွံဟေၚ် ဂဏဘောဇိုန်မ္ဂးရ။ ဝေၚ်ကၠေံ အခိၚ်အခါတုဲ မ္ဂးဂှ် ပဲါကၠေံ အခိၚ်အခါတုဲ။ အခိၚ်မဂိယဲ မ္ဂးဂှ် ဗွဲတွဵုမယုတ် ဇိုၚ်ဂမၠိုၚ်လေဝ် ဒကးအိုတ်ရ၊ အခိၚ်မဂိယဲ ရဴဝွံ ဂပ်ဝ်သ္ပပြဘိုဂ်ရ။ အခိၚ်ကဵုဒါန်သ္ၚာ မ္ဂးဂှ် ဟွံလလးကထိုန်မ္ဂး လုကဴဂိတုလအိတ်အိုတ်ဥတုဗြဲကီု လလးကထိုန်မ္ဂး လုကဴမသုန်ဂိတုဂမၠိုၚ်ကီု အခိၚ်ကဵုဒါန်သ္ၚာရဴဝွံ ဂပ်ဝ်သ္ပပြဘိုဂ်ရ။ အခိၚ်ဇိၚ်သ္ၚာ မ္ဂးဂှ် ဇိၚ်တဴသ္ၚာမ္ဂး အခိၚ်ဇိၚ်သ္ၚာရဴဝွံ ဂပ်ဝ်သ္ပပြဘိုဂ်ရ။ အခိၚ်အာတရဴအဓာန်မဂၠိၚ်သ္ၚောဲ မ္ဂးဂှ် ကြက်အာတရဴကဝက်ယောဇနာရ ရဴဝွံ ဂပ်ဝ်သ္ပပြဘိုဂ်ရ။ ခမဳ ဃောအာ ဂပ်ဝ်သ္ပပြဘိုဂ်ရ။ ခမဳအာတုဲ ဂပ်ဝ်သ္ပပြဘိုဂ်ရ။ အခိၚ်ဍိုက်ဂၠုၚ် မ္ဂးဂှ် ကြက်ဍိုက်ဂၠုၚ်ရ ရဴဝွံ ဂပ်ဝ်သ္ပပြဘိုဂ်ရ။ ခမဳ ဃောဍိုက် ဂပ်ဝ်သ္ပပြဘိုဂ်ရ။ ခမဳ မစှေ်နူဂၠုၚ် ဂပ်ဝ်သ္ပပြဘိုဂ်ရ။ အခိၚ်တ္ၚဲဇၞော် မ္ဂးဂှ် ယြဴပ္ဍဲဌာန်မွဲ ခမဳဂမၠိုၚ် ၜါဇကုပိဇကု ဂေတ်ဂ္ၚေၚ်ပိဏ္ဍပါတ်တုဲ ယိုပ်ယာပ်အိုတ်ရ၊ ခမဳမရနုက်ကဵုပန်ဇကု ကၠုၚ်မ္ဂး ဟွံယိုပ်ယာပ်အိုတ်ရ၊ (ပ္ဍဲဌာန်ဂှ်) (အခိၚ်ဂကူဂှ်၊ အခိၚ်ခမဳဂမၠိုၚ်ဂှ်) အခိၚ်တ္ၚဲဇၞော်ရဴဝွံ ဂပ်ဝ်သ္ပပြဘိုဂ်ရ။ အခိၚ်ခမဳကဵုဒါန်ပိဏ္ဍပါတ် မ္ဂးဂှ် ညးမမိက်ကဵုမွဲမွဲ အာစိုပ်ဒဒှ်ပြဘာဇ်တုဲ ကၠောန်သ္ပစဳရေၚ်ပိဏ္ဍပါတ်ရ၊ (အခိၚ်ဂကူဂှ်) အခိၚ်ခမဳကဵုဒါန်ပိဏ္ဍပါတ်ရဴဝွံ ဂပ်ဝ်သ္ပပြဘိုဂ်ရ။ ဝေၚ်ကၠေံ အခိၚ်အခါတုဲ သ္ပပြဘိုဂ်ရ ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ။ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ပဲါစိုတ်ရ။
219) ဂဏဘောဇိုန်ဂှ် မၞုံကဵုစၟတ်သမ္တီဂဏဘောဇိုန်ဒှ်တုဲ ဝေၚ်ကၠေံအခိၚ်ခါတုဲ သ္ပပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲဂဏဘောဇိုန်ဂှ် သီုမၞုံကဵုသၠေဟ်ပၟာ ဝေၚ်ကၠေံအခိၚ်အခါတုဲ သ္ပပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲဂဏဘောဇိုန်ဂှ် သီုမၞုံကဵုစၟတ်သမ္တီဂဏဘောဇိုန်ဟွံသေၚ် ဝေၚ်ကၠေံအခိၚ်အခါတုဲ သ္ပပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲအရာဟွံသေၚ်ကဵုဂဏဘောဇိုန် မၞုံကဵုစၟတ်သမ္တီဂဏဘောဇိုန်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံသေၚ်ကဵုဂဏဘောဇိုန် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံသေၚ်ကဵုဂဏဘောဇိုန် မၞုံကဵုစၟတ်သမ္တီဂဏဘောဇိုန်ဟွံသေၚ်မ္ဂး၊ ဟွံဒးအာပတ်ရ။
220) ပ္ဍဲအခိၚ်အခါ ဟွံဒးအာပတ်ရ၊ ခမဳဂမၠိုၚ်ၜါဇကုပိဇကု သ္ပပြဘိုဂ်မွဲဂကောံဓဝ်အိုတ်မ္ဂး၊ ဂေတ်ဂ္ၚေၚ်တၞဟ်န ပိဏ္ဍပါတ်တုဲမ္ဂး ကောံဓရီုမွဲဂကောံဓဝ်တုဲ သ္ပပြဘိုဂ်အိုတ်မ္ဂး၊ ပိဏ္ဍပါတ်မကဵုဒါန်လၟိုန်ကီု၊ ဖျေံမာဲတုဲပိဏ္ဍပါတ်မဂပ်ဝ်ကဵုဒါန်ကီု၊ ပိဏ္ဍပါတ်မဂပ်ဝ်ကဵုဒါန် ပ္ဍဲပက်မံက်ပက်စွေက်ကီု၊ ပိဏ္ဍပါတ်မဂပ်ဝ်ကဵုဒါန် ပ္ဍဲတ္ၚဲဥပေါသ်ကီု၊ ပိဏ္ဍပါတ်မဂပ်ဝ်ကဵုဒါန်ပ္ဍဲပါဋိပါဒိက်ကီု၊ (တ္ၚဲတိတ်၊ မပ္တံတိတ်နူသဳ မွဲမံက်မွဲစွေက်ကေတ်ညိ၊) သ္ပပြဘိုဂ်မ္ဂး၊ ဟွံဒးအာပတ်ရ၊ ပဲါကၠေံဘောဇိုန်ဂမၠိုၚ်မသုန်သာ်တုဲ ပ္ဍဲစၞစဂမၠိုၚ်အိုတ်သီု ဟွံဒးအာပတ်ရ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဂဏဘောဇနသိက္ခာပိုဒ် ဒုတိယတုဲရ။
