၅.၄.၂။ ဂဏဘောဇနသိက္ခာပိုဒ်
209) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ဒေဝဒတ် ဟုတ်ယုတ်နူလာဘ်ပူဇဴသက္ကာဒှ်တုဲ မွဲဟာန်ကေုာံပရိသာတ် အာတ်တုဲ အာတ်တဴပ္ဍဲဇရေၚ်ဒကာဂမၠိုၚ်တုဲ သ္ပပြဘိုဂ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကောန်ကျာ်သၟိၚ်သာကျဝၚ် အာတ်တုဲ အာတ်တဴပ္ဍဲဇရေၚ်ဒကာဂမၠိုၚ်တုဲ မုဟိုတ် သ္ပပြဘိုဂ်အိုတ်ရော? မုရဴညးမွဲ ဟွံဒးစိုတ် ရှ်သာဍာတ်ကြိုအ်နွံရော? မုရဴညးမွဲ ဟွံသ္ဍိုက်မၠိုက်ဒ:ဂၞပ် ရှ်သာခိုဟ်ခိုဟ်နွံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ဒေဝဒတ် မွဲဟာန်ကေုာံပရိသာတ် အာတ်တုဲ အာတ်တဴပ္ဍဲဇရေၚ်ဒကာဂမၠိုၚ်တုဲ သ္ပပြဘိုဂ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဒေဝဒတ် တၠအဲ မွဲဟာန်ကေုာံပရိသာတ် အာတ်တုဲ အာတ်တဴပ္ဍဲဇရေၚ်ဒကာဂမၠိုၚ်တုဲ သ္ပပြဘိုဂ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ မွဲဟာန်ကေုာံပရိသာတ် အာတ်တုဲ အာတ်တဴပ္ဍဲဇရေၚ်ဒကာဂမၠိုၚ်တုဲ သ္ပပြဘိုဂ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်သဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဟိုတ်နူပွမသ္ပပြဘိုဂ် ဂဏဘောဇိုန် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
210) ပ္ဍဲအခိၚ်ဂှ် မၞိဟ်ဂမၠိုၚ် ဘိက်နိမန်တဴ ခမဳဂိယဲဂမၠိုၚ် နကဵုပိဏ္ဍပါတ်အိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ကုခမဳမဂိယဲဂှ် ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ။ ပ္ဍဲအရာသ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲရ၊ ဣဝွံတုန် ပ္ဍဲအရာသ္ပပြဘိုဂ် ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။ 211) ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲအခိၚ်ကဵုဒါန်သ္ၚာ စဳရေၚ်လဝ်ပိဏ္ဍပါတ် မွဲဟာန်ကေုာံသ္ၚာတုဲ “ကဵုဒါန်ပိဏ္ဍပါတ်တုဲမ္ဂး ကြက်ကဵုဒါန်သ္ၚာအိုတ်ရ” ရဴဝွံ ဘိက်နိမန်ခမဳဂမၠိုၚ်အိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာန်ဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ကလိဂွံသ္ၚာအောန်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ကဵုဒါန်သ္ၚာ ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ၊ ပ္ဍဲအရာသ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
212) ပ္ဍဲအခိၚ်ဂှ် မၞိဟ်ဂမၠိုၚ် ဘိက်နိမန်တဴ ခမဳမဇိၚ်သ္ၚာဂမၠိုၚ် နကဵုပိဏ္ဍပါတ်အိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ဇိၚ်သ္ၚာ ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ၊ ပ္ဍဲအရာသ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။ 213) ပ္ဍဲအခိၚ် ခမဳဂမၠိုၚ် က္ညအာတဴ တရဴအဓာန်မဂၠိၚ်သ္ၚောဲ မွဲဟာန်ကေုာံမၞိဟ် ‘ဒကာ’ ဂမၠိုၚ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် “ယွံဒကာတအ် ဩဝ်လၟတ်မၚ်လ္ဇဒၟံၚ် ဗၞတ်မွဲခဏဍောတ်အိုတ်ညိ၊ ကြက်ဂေတ်ဂ္ၚေၚ် တၞဟ်နပိဏ္ဍပါတ်အိုတ်ရ” ရဴဝွံ သ္ဂးကဵုမၞိဟ်ဂမၠိုၚ်ဂှ်အိုတ်ရ။ မၞိဟ်ဂမၠိုၚ်ဂှ် “ယွံတဳလပိုဉ်တအ် ပ္ဍဲဌာန်ဝွံဟေၚ် ဩဝ်သ္ပပြဘိုဂ်အိုတ်ညိ” ရဴဝွံ ဂရၚ်ပတီအိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်အာတရဴမဂၠိၚ်သ္ၚောဲ ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ၊ ပ္ဍဲအရာသ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာ၊ အခိၚ်အာတရဴအဓာန်မဂၠိၚ်သ္ၚောဲရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ် ကုခမဳဂမၠိုၚ်ရ။
214) ပ္ဍဲအခိၚ်ဂှ် ခမဳဂမၠိုၚ် က္ညအာတဴ နကဵုဂၠုၚ် မွဲဟာန်ကေုာံမၞိဟ် ‘ဒကာ’ ဂမၠိုၚ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် “ယွံဒကာတအ် ဩဝ်ကာတ်သြၚ် ဗၞတ်မွဲခဏဍောတ်အိုတ်ညိ၊ ကြက်ဂေတ်ဂ္ၚေၚ် တၞဟ်နပိဏ္ဍပါတ်အိုတ်ရ” ရဴဝွံ သ္ဂးကဵုမၞိဟ်ဂမၠိုၚ်ဂှ်အိုတ်ရ။ မၞိဟ်ဂမၠိုၚ်ဂှ် “ယွံတဳလပိုဉ်တအ် ပ္ဍဲ (ဂၠုၚ်) ဝွံဟေၚ် ဩဝ်သ္ပပြဘိုဂ်အိုတ်ညိ” ရဴဝွံ ဂရၚ်ပတီအိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ ‘သံသယကုက္ကုစ္စ’ ပွမချပ်သၠေဟ်ပၟာန်ဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ဍိုက်ဂၠုၚ် ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ၊ ပ္ဍဲအရာ သ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာ၊ အခိၚ်အာတရဴအဓာန်မဂၠိၚ်သ္ၚောဲ၊ အခိၚ်ဍိုက်ဂၠုၚ်ရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
215) ပ္ဍဲအခိၚ်ဂှ် ခမဳဂမၠိုၚ် မဒၠိုက်ကတဵုဒှ်ဝသ် ‘သှ်ပဝါ၊ ဝှ်ကလိုဟ်’ ပ္ဍဲဒိုဟ်ဂမၠိုၚ် တၞဟ်နပွမသ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ က္ညကၠုၚ်ဍုၚ်ရာဇဂြိုဟ်အိုတ်ရ။ မၞိဟ်ဂမၠိုၚ် ဆဵုညာတ်ကေတ်ခမဳဂမၠိုၚ် မပဒတဴပ္ဍဲတွဵုရးဍုၚ်တၞဟ်တၞဟ်ဂမၠိုၚ်တုဲ ဘိက်နိမန်တဴ နကဵုပိဏ္ဍပါတ်အိုတ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ”ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်တ္ၚဲဇၞော် ကဵုအခေါၚ် တၞဟ်နပွမသ္ပပြဘိုဂ်ဂဏဘောဇိုန်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ် ဂဏဘလောဇိုန် ဒးအာပတ်ပဲါစိုတ်ရ၊ ပ္ဍဲအရာသ္ပပြဘိုဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာ၊ အခိၚ်အာတရဴအဓာန်မဂၠိၚ်သ္ၚောဲ၊ အခိၚ်ဍိုက်ဂၠုၚ်၊ အခိၚ်တ္ၚဲဇၞော်ရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
216) ပ္ဍဲအခိၚ်ဂှ် ညးမဒှ်ကဠောသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးမွဲဂှ် သ္ပခမဳ ပ္ဍဲတဳအာဇဳဝကဂမၠိုၚ်ရ။ ပ္ဍဲအခိၚ်ဂှ် တဳအာဇဳဝကဂှ် ပြာပ်အာဇရေၚ်သၟိၚ်ဗိမ္ဗိသာရ မၞုံယၟုသေနိယ တၠညးမဂဓရးတုဲ “ယွံမရာဇ် အဲ မိက်ဖာပ်ဗ္စပုၚ် ကုညးမၞုံကဵုကွေတ်ပါသဏ္ဍဂမၠိုၚ်အိုတ်သီုရ” ရဴဝွံ ဟီုသ္ဂးကဵုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရးရ။ ယွံတဳလပိုဉ် တဳလပိုဉ်တရာပ်ဖာပ်ဗ္စ ခမဳသၚ်မၞုံပဓာန်ဍေံတဳလမၞုံပိုဉ်ကျာ်တြဲ ဗွဲကိုပ်ကၠာမ္ဂး အတိုၚ်တဳလပိုဉ်ဟီုဂှ် ကၠောန်သ္ပရ ရဴဝွံ (သ္ဂးရ)။ ပ္ဍဲအခိၚ်ဂှ် တဳအာဇဳဝကဂှ် “ခမဳဂမၠိုၚ် သွက်တ္ၚဲယး ဩဝ်ဒုၚ်ဂိုၚ်ကေတ် ပိဏ္ဍပါတ်အဲဍိက်အိုတ်ညိ” ရဴဝွံ ဖအောဝ်ဗလးဏာကလုတ် ဇရေၚ်ခမဳဂမၠိုၚ်ရ။ ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂဏဘောဇိုန်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဒုၚ်ဂိုၚ်ကေတ်အိုတ်ရ။ ပ္ဍဲအခိၚ်ဂှ် တဳအာဇဳဝကဂှ် ပြာပ်အာဇရေၚ်တဳလမၞုံပိုဉ်ကျာ်တြဲတုဲ ဟီုဂလာန်မိပ်စိုတ်အိုဟ်တၟိုဟ် (ဆက်မိတ်) ကေုာံတဳလမၞုံပိုဉ်ကျာ်တြဲမွဲစွံရ၊ ဟီုပတုဲကၠေံ ဂလာန်မိပ်စိုတ်အိုဟ်တၟိုဟ် ထေက်ကဵုဗှ်ဗၞုဟ်တုဲ ဂဇအ်ဒၟံၚ်ပ္ဍဲဒၞဲါမွဲရ၊ တဳအာဇဳဝက မဂဇအ်ဒၟံၚ်ပ္ဍဲဒၞဲါမွဲတုဲဒှ်− “တဳလမၞုံပိုဉ်ဂေါတမလေဝ် ဒှ်ခမဳရ၊ အဲဍိက်လေဝ် ဒှ်ခမဳရ၊ ခမဳဂှ် ထေက်ကဵုတၞဟ်နဒုၚ်ဂိုၚ်ကေတ် ပိဏ္ဍပါတ်ခမဳရ၊ တဳလမၞုံပိုဉ်ဂေါတမ မွဲဟာန်ကေုာံခမဳသၚ် သွက်တ္ၚဲယး ဩဝ်ဒုၚ်တဲပိဏ္ဍပါတ်အဲဍိက်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ တဳလမၞုံပိုဉ်ကျာ်တြဲ နပွမဒၟံၚ်သ္ၚိတ်သ္ၚိတ်ဂှ် ဒုၚ်ထောံတဲရ၊ ပ္ဍဲအခိၚ်ဂှ် တဳအာဇဳဝကဂှ် တီကေတ်တဳလမၞုံပိုဉ်ကျာ်တြဲ ဒုၚ်တဲတုဲ ပဲါစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်ပရူပရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ပ္ဍဲအခိၚ်ခမဳကဵုဒါန်ပိဏ္ဍပါတ် ကဵုအခေါၚ် တၞဟ်နပွမသ္ပပြဘိုဂ် ဂဏဘောဇိုန်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
217) “ဝေၚ်ကၠေံအခိၚ်အခါတုဲ ဟိုတ်နူပွမသ္ပပြဘိုဂ်ဂဏဘောဇိုန် ဒးအာပတ်ပဲါစိုတ်ရ၊ ပ္ဍဲအာသ္ပပြဘိုဂ်ဂဏဘောဇိုန်ဂှ် ကြက်သ္ဂးဂတဝွံတုန် အခိၚ်အခါရောၚ်၊ အခိၚ်မဂိယဲ၊ အခိၚ်ကဵုဒါန်သ္ၚာ၊ အခိၚ်ဇိၚ်သ္ၚာ၊ အခိၚ်အာတရဴအဓာန်မဂၠိၚ်သ္ၚောဲ၊ အခိၚ်ဍိုက်ဂၠုၚ်၊ အခိၚ်တ္ၚဲဇၞော်၊ အခိၚ်ခမဳကဵုဒါန်ပိဏ္ဍပါတ်ရ၊ ဣဝွံတုန် ပ္ဍဲအရာသ္ပပြဘိုဂ်ဂဏဘောဇိုန်ဂှ် အခိၚ်အခါရောၚ်” ရဴဝံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
