၅.၄.၁၀.၁။ ပွံက်ဒန္တပေါနသိက္ခာပိုဒ်

266) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မဟဂပ်ဝ်ကဵု မ္ဂးဂှ် သ္ဂးတဴ စၞစဘောဇိုန် မဟဂပ်ဝ်ဒုၚ်ဗဂိန်ရ။ ဟဂပ်ဝ်ကဵု မ္ဂးဂှ် နကဵုဇကုကီု နဝတ္ထုမစပ်ကေုာံဇကုကီု နမသောၚ်ဗလးနၚ်ကီု ကဵုတဴမ္ဂး တန်တဴဒၟံၚ် ပ္ဍဲအပ္ဍဲဟတ္ထပါသ်ၜါဟတ်မွဲဍတုဲ နကဵုဇကုကီု နကဵုဝတ္ထုမစပ်ကေုာံဇကုကီု ဒုၚ်ဂိုၚ်ကေတ်မ္ဂး၊ ဣဝွံတုန် မဂပ်ဝ်ကဵုမ္ဂးရ။ အာဟာရ မ္ဂးဂှ် ပါဲကၠေံ ဍာ်ဆုဒကတုဲ ဝတ္ထုမဂပ်ဝ်စၚိတ်အလုံအိုတ်သီုဂှ် အာဟာရမ္ဂးရ။ ဝေၚ်ကၠေံဍာ်ဆုဒကတုဲ မ္ဂးဂှ် ပါဲကၠေံ ဍာ်ဆုဒကတုဲ။ “ကြက်သ္ၚာဲရ ကြက်ပြဘိုဂ်ရ” ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ၊ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ပါဲစိုတ်ရ။

267) ပ္ဍဲစၞစဘောဇိုန် မဟဂပ်ဝ်ဒုၚ်ဗဂိန် မၞုံကဵုစၟတ်သမ္တီ စၞစဘောဇိုန် မဟဂပ်ဝ်ဒုၚ်ဗဂိန်ဒှ်တုဲ ဝေၚ်ကၠေံဍာ်ဆုဒကတုဲ ရၚ်တၠုၚ်အာဟာရမဟဂပ်ဝ်ကဵု အပ္ဍဲတြၚ်ပါၚ်မ္ဂး၊ ဒးအာပတ်ပါဲစိုတ်ရ။ ပ္ဍဲစၞစဘောဇိုန် မဟဂပ်ဝ်ဒုၚ်ဗဂိန် မၞုံကဵုသၠေဟ်ပၟာဒှ်တုဲ ဝေၚ်ကၠေံဍာ်ဆုဒကတုဲ ရၚ်တၠုၚ်အာဟာရ မဟဂပ်ဝ်ကဵု အပ္ဍဲတြၚ်ပါၚ်မ္ဂး၊ ဒးအာပတ်ပါဲစိုတ်ရ။ ပ္ဍဲစၞစဘောဇိုန် မဟဂပ်ဝ်ဒုၚ်ဗဂိန် မၞုံကဵုစၟတ်သမ္တီ စၞစဘောဇိုန် မဂပ်ဝ်ဒုၚ်ဗဂိန်တုဲ ဝေၚ်ကၠေံဍာ်ဆုဒကတုဲ ရၚ်တၠုၚ်အာဟာရ မဟဂပ်ဝ်တုဲ အပ္ဍဲတြၚ်ပါၚ်မ္ဂး၊ ဒးအာပတ်ပါဲစိုတ်ရ။ ပ္ဍဲစၞစဘောဇိုန် မဂပ်ဝ်ဒုၚ်ဗဂိန် မၞုံကဵုစၟတ်သမ္တီ စၞစဘောဇိုန်မဟဂပ်ဝ်ဒုၚ်ဗဂိန်မ္ဂး၊ ဒးအာပတ်ဒုက္ကဋ်ရ။ ပ္ဍဲစၞစဘောဇိုန် မဂပ်ဝ်ဒုၚ်ဗဂိန်ဏီ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲစၞစဘောဇိုန် မဂပ်ဝ်ဒုၚ်ဗဂိန် မၞုံကဵုစၟတ်သမ္တီ စၞစဘောဇိုန် မဂပ်ဝ်ဒုၚ်ဗဂိန်မ္ဂး၊ ဟွံဒးအာပတ်ရ။

268) ဍာ်ဆုဒကဂမၠိုၚ်ကီု ဂဥုဲဇၞော်ဂမၠိုၚ်ပန်ပြကာ (မတွံဂးတရဴဇၞော်တရဴသၟတ် ပတေၚ်တိကမၠေတ်) ကီု ဟိုတ် (မတွံဂးဇြုံဒွံဒး) နွံမ္ဂး ကပ္ပိယကာရက ‘ညးမသ္ပညံၚ်ဂပ်ဝ်’ ဟွံမွဲမ္ဂး ဂိုၚ်ကေတ်အလဵုဇကုတုဲ သ္ပပြဘိုဂ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောကၠာတဲဂှ် ဟွံဒးအာပတ်ရ။ ဒန္တပေါနသိက္ခာပိုဒ် ဒသမတုဲဒရ။ ဘောဇနဝဂ် စတုတ္ထတုဲရ။