၅.၄.၁၀။ ဒန္တပေါနသိက္ခာပိုဒ်
263) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာပြာသာဒ် မၞုံကဵုဓပ်ပြကာ အပ္ဍဲဂြိုပ်မဟာဝိုန် ဇရေၚ်ဍုၚ်ဝေသာလဳဂှ် ခမဳမွဲဇကု ပကၚ်ရၚ်ဓုတၚ်ပံသုကူ (ကပေါတ်) အိုတ်သီုတုဲ ပဒတဴဒၟံၚ်ပ္ဍဲသုသာန်ရ။ ခမဳဂှ် ဟွံမွဲပၟိက် တၞဟ်နဒုၚ်ဂိုၚ်ကေတ် မၞိဟ်မဂမၠိုၚ် မကဵုဒါန်ရ၊ အလဵုဇက လပှ်ကေတ်စၞစဘောဇိုန်ဂမၠိုၚ် မသၠးထောံလဝ် တၞဟ်နဖဵုမပ္တံမိမယာဲနော်အပါနော် မစုတိကလိလောန်စဴတုဲဂမၠိုၚ် ပ္ဍဲသုသာန်ကီု ပ္ဍဲသၟတ်တမ်ဆုကီု ပ္ဍဲဒၟုၚ်တြၚ်ကီုတုဲ စတဴရ။ မၞိဟ်ဂမၠိုၚ် “မုဟိုတ် ခမဳဝွံ အလဵုဇကု လပှ်ကေတ်စၞစဘောဇိုန်ဂမၠိုၚ် မသၠးထောံလဝ် တၞဟ်နဖဵုမပ္တံမိမယာဲနော်အပါနော်ပိုဲတအ် မစုတိကလိလောန်စဴတုဲဂမၠိုၚ် ပ္ဍဲသုသာန်ကီု ပ္ဍဲသၟဝ်တမ်ဆုကီု ပ္ဍဲဒၟုၚ်တြၚ်ကီုတုဲ စတဴရော? ခမဳဝွံ ကြိုအ်အုဟ်ဒၟံၚ်ရ၊ စတဴဖျုန်မၞိဟ်ရောၚ် ထေၚ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ်သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုဂှ် “မုဟိုတ် ခမဳဂှ် ရၚ်တၠုၚ်အာဟာရ မဟဂပ်ဝ်ကဵု ‘မဟဂွံဒုၚ်ဗဂိန်ဏီ’ အပ္ဍဲတြၚ်ပါၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳ တၠအဲ ရၚ်တၠုၚ်အာဟာရ မဟဂပ်ဝ်ကဵု ‘မဟဂွံဒုၚ်ဗဂိန်ဏီ’ အပ္ဍဲတြၚ်ပါၚ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ်တၠအဲ ရၚ်တၠုၚ်အာဟာရ မဟဂပ်ဝ်ကဵု ‘မဟဂွံဒုၚ်ဗဂိန်ဏီ’ အပ္ဍဲတြၚ်ပါၚ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ယြံခမဳမွဲ ရၚ်တၠုၚ်အာဟာရ မဟဂပ်ဝ်ကဵု ‘မဟဂွံဒုၚ်ဗဂိန်ဏီ’ အပ္ဍဲတြၚ်ပါၚ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
264) ပ္ဍဲအခိၚ်ဂှ် ခမဳဂမၠိုၚ် မၞုံကဵု’သံသယကုက္ကုစ္စ’ ပွမချပ်သၠေဟ်ပၟာ ရဴဝွံမ္ဂးဍာ်ဆုဒကဂမၠိုၚ် ဟွံဂပ်ဝ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ “ယွံခမဳတအ် ဍာ်ဍုဒကဂှ် ဂိုၚ်ကေတ် အလဵုဇကုတုဲ တၞဟ်နသ္ပပြဘိုဂ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
265) “ယြဴခမဳမွဲ ဝေၚ်ကၠေံ ဍာ်ဆုဒကတုဲ ရၚ်တၠုၚ်အာဟာရ မဟဂပ်ဝ်ကဵု ‘မဟဂွံဒုၚ်ဗဂိန်ဏီ’ အပ္ဍဲတြၚ်ပါၚ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
