၅.၄.၁။ အာဝသထပိဏ္ဍသိက္ခာပိုဒ်

203) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတေဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ဂကောံဗော်သွးမွဲ သိုၚ်ခၞံလဝ်ဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီု ပ္ဍဲဇရေၚ်ဍုၚ်သာရဝှ်တုဲ ဒုၚ်တၠုၚ်ဗ္စဖျုၚ်ဒၟံၚ် ကုကၟုဲထဳဂမၠိုၚ် နမပ္တံကဵုပုၚ်သွဂမၠိုၚ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ လုပ်ဂ္ၚေၚ်ပိဏ္ဍပါတ် ဍုၚ်သာရဝှ်မ္ဂး ဟိုတ်မဟွံကလိဂွံပိဏ္ဍပါတ်ဂှ်ရ က္ညအာဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဇူဒီုအိုတ်ရ၊ “တဳလပိုဉ်မဆာဲဂမၠိုၚ် လအ်လမှလေဝ် သ္ဂောံက္ညကၠုၚ်အိုတ်ရ” ရဴဝွံ မၞိဟ်ဂမၠိုၚ် ကၠောန်ၜိုတ်ဥပကာဗွဲမရှေ်သှေ်ရဴဂဴအိုတ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲတ္ၚဲဒုတိယလေဝ် ။ ပ ။ ပ္ဍဲတ္ၚဲတတိယလေဝ် ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ လုပ်ဂ္ၚေၚ်ပိဏ္ဍပါတ် ဍုၚ်သာရဝှ်မ္ဂး ဟိုတ်မဟွံကလိဂွံပိဏ္ဍပါတ်ဂှ်ရ က္ညအာဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုတုဲ သ္ပပြဘိုဂ်အိုတ်ရ။ ပ္ဍဲအခိၚ်ဂှ် “ပိုဲညးဂမၠိုၚ် နပွမကလေၚ်အာ အာရှာမ်ဘာဂှ် မုဖဵုနွံရော? တ္ၚဲယးလေဝ် ထေက်ကဵုဒးကၠုၚ် ဇြပ်ဝွံရောၚ်ရ” ရဴဝွံ ကသပ်ဒှ် ကုခမဳတအ်ဂမၠိုၚ်တုဲ ပ္ဍဲဇြပ်ဂှ်ဟေၚ် ပဒတဴဇၟာပ်တ္ၚဲဇၟာပ်တ္ၚဲတုဲ သ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုအိုတ်ရ။ တဳဂမၠိုၚ် ဆုတ်ကလေၚ်ပဲါစ္ဍးတိတ်အိုတ်ရ။ မၞိဟ်ဂမၠိုၚ် “မုဟိုတ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် ပဒတဴဇၟာပ်တ္ၚဲဇၟာပ်တ္ၚဲတုဲ သ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုအိုတ်ရော? တၞဟ်နသွက်ခမဳဂမၠိုၚ်ဝွံဟေၚ် စွံပတန်လဝ်ဝတ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ်သ္ဂောံဇူဒီု ဟွံသေၚ်ရ၊ တၞဟ်နသွက်ညးဂမၠိုၚ်အလုံအိုတ်သီုဟေၚ် စွံပတန်လဝ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် သ္ဂောံဇူဒီုရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပဒတဴဇၟာပ်တ္ၚဲဇၟာပ်တ္ၚဲတုဲ သ္ပပြဘိုဂ်ပိဏ္ဍပါတ် ပ္ဍဲဇြပ် သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ပဒတဴဇၟာပ်တ္ၚဲဇၟာပ်တ္ၚဲတုဲ သ္ပပြဘိုဂ်ပိဏ္ဍပါတ် ပ္ဍဲဇြပ် သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုအိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ပဒတဴဇၟာပ်တ္ၚဲဇၟာပ်တ္ၚဲတုဲ သ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ဗၞတ်မွဲဝါဟေၚ် ဂပ်ဝ်သ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုရ၊ လောန်လတူဗၞတ်မွဲဝါဂှ် ယဝ်သ္ပပြဘိုဂ်မ္ဂး၊ (ကုခမဳ) ဂှ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။

204) ပ္ဍဲအခိၚ်ဂှ် တဳလပိုဉ်သာရိပိုတ် က္ညအာဍုၚ်သာရဝှ်မ္ဂး ပြာပ်စိုပ်အာဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုမွဲ ပ္ဍဲဇနပိုဒ် လုပ်လၟိဟ်ကောသလရးရ၊ “မှာထေရ် လအ်လမှ သ္ဂောံက္ညကၠုၚ်ရ” ရဴဝွံ မၞိဟ်ဂမၠိုၚ် ကၠောန်ၜိုတ်ဥပကာ ဗွဲမရှေ်သှေ်ရဴဂဴအိုတ်ရ။ ပ္ဍဲအခိၚ်ဂှ် ကုတဳလပိုဉ်သာရိပိုတ် မကဵုပိုဉ်တုဲဂှ် ယဲကျာမသကာတ်မြဟ် ကတဵုဒှ်ကၠုၚ်ရ၊ တၞဟ်နပဲါစ္ဍးတိတ်အာ နူဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုဂှ် ဟွံသၟဟ်ရထရ။ ပ္ဍဲအခိၚ်ဂှ် မၞိဟ်ဂမၠိုၚ် ပ္ဍဲတ္ၚဲဒုတိယလေဝ် “ယွံတဳလပိုဉ် ဩဝ်သ္ပပြဘိုဂ်ကဵုပိုဉ်အိုတ်ညိ” ရဴဝွံ ဂရၚ်ပတီတဳလပိုဉ်သာရိပိုတ်အိုတ်ရ။ ပ္ဍဲအခိၚ်ဂှ် တဳလပိုဉ်သာရိပိုတ်ဂှ် “ပဒတဴဇၟာပ်တ္ၚဲဇၟာပ်တ္ၚဲတုဲ ပွမသ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုဂှ် ဟိုတ်နူတဳလမၞုံပိုဉ်ကျာ်တြဲ ပဲါကၠေံဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံဒုၚ်ဂိုၚ်ကေတ်ရ၊ ပိုဉ်သကုတ်အာရ ‘ဟဂွံကဵုပိုဉ်ရ’။ ပ္ဍဲအခိၚ်ဂှ် တဳလပိုဉ်သာရိပိုတ် အာစိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်အိုတ်ရ၊ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ် အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ− “ယွံခမဳတအ် ခမဳမဂိယဲဂှ် ပဒတဴဇၟာပ်တ္ၚဲဇၟာပ်တ္ၚဲတုဲ တၞဟ်နပွမသ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုဂှ် ကဵုအခေါၚ်” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 205) “ခမဳမဟွံဂိယဲဂှ် ဗၞတ်မွဲဝါဟေၚ် ဂပ်ဝ်သ္ပပြဘိုဂ်ပိဏ္ဍပါတ် ပ္ဍဲဇြပ်သွက်ကၟုဲထဳဂမၠိုၚ် ဇၟာပ်မကၠုၚ်စိုပ်ဂွံဇူဒီုရ၊ လောန်လတူဗၞတ်မွဲဝါဂှ် ယဝ်သ္ပပြဘိုဂ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။