၅.၃.၉.၁။ ပွံက်ပရိပါစိတသိက္ခာပိုဒ်
195) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ ခမဳဗြဴဂှ်လေဝ် ဟီုလဴကဵုရ။ ခမဳဗြဴ မ္ဂးဂှ် ဗြဴမဒှ်ယျၚ် ပ္ဍဲဥဘတောသၚ်ရောၚ်။ စဳရေၚ်ရ မ္ဂးဂှ် ကုညးဟွံမိက်ကဵုဒါန် ဟွံမိက်သ္ပပ္ဍဲကိုပ်ကၠာဂမၠိုၚ် တဳလပိုဉ်ဂှ် ပကၚ်ရၚ်လဝ် နိကာယ်မသုန်ရ၊ တဳလပိုဉ်ဂှ် မၞုံကဵုဗဟုသုတရ၊ တဳလပိုဉ်ဂှ် ပကၚ်ရၚ်လဝ်သုတ်ရ၊ တဳလပိုဉ်ဂှ် ပကၚ်ရၚ်လဝ် ဝိနယ်ရ၊ တဳလပိုဉ်ဂှ် ပူဂိုလ်တွံဓရ်ရ၊ ဩဝ်ကဵုဒါန် ကုတဳလပိုဉ်ဂှ်အိုတ်ညိ၊ ဩဝ်သ္ပလွဳလွတ် တဳလပိုဉ်ဂှ်အိုတ်ညိ ရဴဝွံ (ဟီုသ္ဂးရ)၊ ဣဝွံတုန် စဳရေၚ်မ္ဂးရ။ ပိဏ္ဍပါတ် မ္ဂးဂှ် ပၞောဝ်ကဵုဘောဇိုန်မသုန်သာ်ဂမၠိုၚ် ဘောဇိုန်မွဲမွဲသာ်ရောၚ်။ ဝေၚ်ကၠေံ ပိဏ္ဍပါတ်မၞိဟ်ဂမၠိုၚ် မဂပ်ဝ်စဳရေၚ်လဝ် ပ္ဍဲကိုပ်ကၠာတုဲ မ္ဂးဂှ် ပဲါကၠေံပိဏ္ဍပါတ်ဂမၠိုၚ် မဂပ်ဝ်စဳရေၚ်လဝ်တုဲ။ မၞိဟ်ဂမၠိုၚ် မဂပ်ဝ်စဳရေၚ် မ္ဂးဂှ် ကဠောဂမၠိုၚ်ကီု ညးဘိက်နိမန်လဝ်ဂမၠိုၚ်ကီု ညးစဳရေၚ်ပကတိဂမၠိုၚ်ကီု ဒှ်အိုတ်ရ။
196) ဝေၚ်ကၠေံပိဏ္ဍပါတ်မၞိဟ်ဂမၠိုၚ် မဂပ်ဝ်စဳရေၚ်လဝ် ပ္ဍဲကိုပ်ကၠာတုဲ သ္ပပြဘိုဂ်ရ ရဴဝွံ ယဝ်ဒုၚ်ဗဂိန်မ္ဂး၊ ဒးအာပတ်ဒုက္ကဋ်ရ။ ဇၟာပ်ၚိတ်ဖျေံ ဇၟာပ်ၚိတ်ဖျေံ ဒးအာပတ်ပဲါစိုတ်ရ။ ပ္ဍဲခမဳဗြဴမစဳရေၚ်ဂှ် မၞုံကဵုစၟတ်သမ္တီစဳရေၚ်ဒှ်တုဲ ဝေၚ်ကၠေံပိဏ္ဍပါတ်မၞိဟ်ဂမၠိုၚ် မစဳရေၚ်လဝ်ပ္ဍဲကိုပ်ကၠာတုဲ သ္ပပြဘိုဂ်မ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴမစဳရေၚ်ဂှ် မၞုံကဵုသၠေဟ်ပၟာဒှ်တုဲ ဝေၚ်ကၠေံပိဏ္ဍပါတ်မၞိဟ်ဂမၠိုၚ် မစဳရေၚ်လဝ် ပ္ဍဲကိုပ်ကၠာတုဲ သ္ပပြဘိုဂ်မ္ဂး၊ ဒးအာပတ်ဒုက္ကဋ်ရ။ ပ္ဍဲခမဳဗြဴမစဳရေၚ်ဂှ် မၞုံကဵုစၟတ်သမ္တီဟွံစဳရေၚ်ဒှ်တုဲ ဝေၚ်ကၠေံပိဏ္ဍပါတ်မၞိဟ်ဂမၠိုၚ် မစဳရေၚ်လဝ် ပ္ဍဲကိုပ်ကၠာတုဲ သ္ပပြဘိုဂ်မ္ဂး၊ ဟွံဒးအာပတ်ရ။ ဝေၚ်ကၠေံပိဏ္ဍပါတ်မၞိဟ်ဂမၠိုၚ် မစဳရေၚ်လဝ် ပ္ဍဲကိုပ်ကၠာတုဲ သ္ပပြဘိုဂ်ပိဏ္ဍပါတ် ခမဳဗြဴ မဒှ်ပယျၚ် ပ္ဍဲသၚ်မွဲလပါ်စဳရေၚ်လဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံစဳရေၚ်ဂှ် မၞုံကဵုစၟတ်သမ္တီစဳရေၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံစဳရေၚ်မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံစဳရေၚ် မၞုံကဵုစၟတ်သမ္တီ ဟွံစဳရေၚ်မ္ဂး၊ ဟွံဒးအာပတ်ရ။ 197) ပ္ဍဲပိဏ္ဍပါတ်မၞိဟ်ဂမၠိုၚ် မစဳရေၚ်လဝ် ပ္ဍဲကိုပ်ကၠာ၊ ဟွံဒးအာပတ်ရ၊ သိက္ခာမာန်စဳရေၚ်မ္ဂး၊ သာမဏဳဗြဴ စဳရေၚ်မ္ဂး၊ ဟွံဒးအာပတ်ရ၊ ပဲါကၠေံဘောဇိုန်မသုန်သာ်ဂမၠိုၚ်တုဲ ပ္ဍဲစၞစဂမၠိုၚ်အိုတ်သီု ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ပရိပါစိတသိက္ခာပိုဒ် နဝမတုဲရ။
