၅.၃.၉။ ပရိပါစိတသိက္ခာပိုဒ်
192) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ခမဳဗြဴထုလ္လနန္ဒာ ဒှ်အ္စာမပြာပ်စဴသ္ၚိ ဂကူမွဲတၠဒှ်တုဲ မၞုံအလေံဒုၚ်ပိဏ္ဍပါတ် (ကဵုပိုဉ်) လၟိုန်ရ၊ သမ္ၚေဟ်ဂှ်လေဝ် ဘိက်နိမိန်လဝ် ခမဳဂမၠိုၚ် မဒှ်ထေရ်အိုတ်ရ။ ပ္ဍဲအခိၚ်ဂှ် ခမဳဗြဴထုလ္လနန္ဒာ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲမ္ဂး ဂိုၚ်ထ္ၜကေတ် ဗဗေၚ်သ္ၚာတုဲ ပြာပ်စဴအာသ္ၚိဂကူဂှ်တုဲမ္ဂး— “ယွံသမ္ၚေဟ် မုရဴတၞဟ်နဖဵုမွဲ စဳရေၚ်လဝ်စၞအာဟာဘောဇိုန်ဂမၠိုၚ်ဂလိုၚ်ဝွံရော?” ရဴဝွံ သၟာန်သမ္ၚေဟ်ဂှ်ရ။ ယွံနာဲဗြဴ အဲဍိက်ဘိက်နိမန်လဝ် မှာထေရ်ဇၞော်ဂမၠိုၚ်ရ ရဴဝွံ (ဂရၚ်ပတီရ)။ ယွံသမ္ၚေဟ် မှာထေရ်ဇၞော်ဂမၠိုၚ်ဂှ် မ္ဂးဂှ် ပူဂိုလ်လဵုဂမၠိုၚ်ရော? ရဴဝွံ (သၟာန်တိုန်ဂှ်)— တဳလပိုဉ်သာရိပိုတ် တဳလပိုဉ်မဟာမောဂ္ဂလာန် တဳလပိုဉ်မဟာကစ္စာယ် တဳလပိုဉ်မဟာကောဋ္ဌိက တဳလပိုဉ်မဟာကပ္ပိန တဳလပိုဉ်မဟာစုန္ဒ တဳလပိုဉ်အနုရုဒ္ဓ တဳလပိုဉ်ရေဝတ တဳလပိုဉ်ဥပါလိ တဳလိပိုဉ်အာနန္ဒ တဳလပိုဉ်ရာဟုလဂမၠိုၚ်ရောၚ် ရဴဝွံ (ဂရၚ်ပတီရ)။ ယွံသမ္ၚေဟ် ပူဂိုလ်တၠအရှန်ဇၞော်ဂမၠိုၚ် သီုကဵုနွံပြာကဋ်အိုတ်ဂှ် မုဟိုတ် တၠအဲဘိက်နိမန်တဴ ခမဳသၟတ်ဂမၠိုၚ်ရော? ရဴဝွံ (သ္ဂးတိုန်ပၠန်မ္ဂး)— ယွံနာဲဗြဴ ပူဂိုလ်တၠအရှန်ဇၞော်ဂမၠိုၚ် တၠအဲ မ္ဂးဂှ် ညးဍေံအိုတ်ရော? ရဴဝွံ (ဂရၚ်ပတီသၟာန်ရ)။ တဳလပိုဉ်ဒေဝဒတ် တဳလပိုဉ်ကောကာလိက တဳလပိုဉ်ကဋမောဒကတိဿ တဳလပိုဉ်ခဏ္ဍဒေဝိပုတ္တ တဳလပိုဉ်သမုဒ္ဒဒတ္တဂမၠိုၚ်ရောၚ် ရဴဝွံ (သ္ဂးရ)။ ဂလာန်ခမဳဗြဴထုလ္လနန္ဒာဝွံ ကိုပ်ကၠာဟွံစိုပ်ဒတုဲဏီ ခမဳထေရ်ဇၞော်ဂမၠိုၚ် လုပ်ကၠုၚ်အိုတ်ရ၊ ယွံသမ္ၚေဟ် ပူဂိုလ်တၠအဲဘိက်နိမန်လဝ်ဂမၠိုၚ်ဂှ် တၠအရှန်ဇၞော်ဂမၠိုၚ် ဍာံပြအိုတ်ရ (သ္ဂးတိုန်ပၠန်ဂှ်)— “တၠအဲဂှ် လၟုဟ်ဝွံဟေၚ် သ္ပတဳလပိုဉ်ဂမၠိုၚ် ခမဳသၟတ်တုဲ လၟုဟ်မွဲဝါပၠန် တၠအရှန်ဇၞော်ဂမၠိုၚ်ရ ရဴဝွံ ဟီုသ္ဂးပၠန်ရ” (သီုဟီုဂးဂှ်) ဗက်ဗ္ဒဴထောံခမဳဗြဴထုလ္လနန္ဒာ နူသ္ၚိရ၊ ဝတ်ပိဏ္ဍပါတ်နိစ္စဘတ်လေဝ် ထပိုတ်ထောံရ။ ခမဳပၟိက်အောန်ဂမၠိုၚ်ဂှ် “မုဟိုတ် ဒေဝဒတ် သီုကဵုမတီတဴ ပိဏ္ဍပါတ် ခမဳဗြဴမဂပ်ဝ်ဗတိုက်ဖအောဝ်စဳရေၚ်လဝ်ဂှ် သ္ပပြဘိုဂ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဒေဝဒတ် တၠအဲ သီုကဵုမတီတဴ ပိဏ္ဍပါတ် ခမဳဗြဴမဂပ်ဝ်ဗတိုက်ဖအောဝ်စဳရေၚ်လဝ်ဂှ် သ္ပပြဘိုဂ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုကဵုမတီတဴ ပိဏ္ဍပါတ်ခမဳဗြဴ မဂပ်ဝ်ဗတိုက်ဖအောဝ်စဳရေၚ်လဝ်ဂှ် သ္ပပြဘိုဂ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ သီုကဵုမတီတဴ ပိဏ္ဍပါတ်ခမဳဗြဴ မဂပ်ဝ်ဗတိုက်ဖအောဝ်စဳရေၚ်လဝ်ဂှ် သ္ပပြဘိုဂ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
193) ပ္ဍဲမွဲအခိၚ်တေံ ခမဳမွဲဇကု သ္ပခမဳနူဍုၚ်ရာဇဂြိုဟ်တုဲ က္ညအာဇရေၚ်ကဠောဂမၠိုၚ်ရ။ မၞိဟ်ဂမၠိုၚ် “တဳလပိုဉ်မဆာဲဂှ် လအ်လမှသ္ဂောံက္ညကၠုၚ်ရ” ရဴဝွံ (ပၠုပ်စိုတ်တုဲ) စဳရေၚ်တဴပိဏ္ဍပါတ် ဗွဲမရှေ်သှေ်အိုတ်ရ။ ခမဳဗြဴ မပြာပ်စဴသ္ၚိဂကူဂှ် “ယွံဒကာတအ် ဩဝ်ကဵုဒါန်ပိဏ္ဍပါတ် ကုတဳလပိုဉ်အိုတ်ညိ” ရဴဝွံ သ္ဂးကဵုမၞိဟ်ဂမၠိုၚ်ဂှ်ရ၊ ပ္ဍဲအခိၚ်ဂှ် ခမဳဂှ် ပွမသ္ပပြဘိုဂ်ပိဏ္ဍပါတ်ခမဳဗြဴ မဂပ်ဝ်ဗတိုက်ဖအောဝ်စဳရေၚ်လဝ် သီုကဵုမတီတဴဂှ် တဳလမၞုံပိုဉ်ကျာ်တြဲပဲါကၠေံရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံဒုၚ်ဂိုၚ်ကေတ်ရ၊ တၞဟ်နအာဂ္ၚေၚ်ပိဏ္ဍပါတ်လေဝ် ဟွံသၟဟ်ရထရ၊ ပိုဉ်သကုတ်အာရ ‘ဟဂွံကဵုပိုဉ်ရ’။ ပ္ဍဲအခိၚ်ဂှ် ခမဳဂှ် အာစိုပ်အာရှာမ်ဘာတုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်အိုတ်ရ၊ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ်မၞိဟ်ဂမၠိုၚ် ဂပ်ဝ်စဳရေၚ်လဝ် ပ္ဍဲကိုဟ်ကၠာတုဲမ္ဂး တၞဟ်နသ္ပပြဘိုဂ် ပိဏ္ဍပါတ် ခမဳဗြဴမဂပ်စဳရေၚ်လဝ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 194) “ယြဴခမဳမွဲ ဝေၚ်ကၠေံပိဏ္ဍပါတ်မၞိဟ်ဂမၠိုၚ် မဂပ်ဝ်စဳရေၚ်လဝ် ပ္ဍဲကိုပ်ကၠာ (ခမဳဗြဴမစဳရေၚ်) တုဲ သီုကဵုတီတဴ ပိဏ္ဍပါတ်ခမဳဗြဴ မဂပ်ဝ်ဗတိုက်ဖအောဝ်စဳရေၚ်လဝ်ဂှ် သ္ပပြဘိုဂ်မ္ဂး၊ (ကုခမဳ) ဂှ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
