၅.၃.၈.၁။ ပွံက်နာဝါဘိရုဟနသိက္ခာပိုဒ်
189) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲဥဘတောသၚ်ရောၚ်။ မွဲစွံ မ္ဂးဂှ် မွဲဂကောံဓဝ်ရောၚ်။ ကသေံကၟဝ်တုဲ မ္ဂးဂှ် “ယွံဒေံဗြဴ ဍိုက်အိုတ်ရ ယွံတဳလပိုဉ် ဍိုက်အိုတ်ရ၊ ယွံတဳလပိုဉ် ဍိုက်အိုတ်ရ ယွံဒေံဗြဴ ဍိုက်အိုတ်ရ၊ ပ္ဍဲတ္ၚဲဏအ်ကီု ပ္ဍဲတ္ၚဲယးကီု ပ္ဍဲကလဳတေံကီု ဍိုက်အိုတ်ရ” ရဴဝွံ ကသေံကၟဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာခမဳဗြဴဍိုက်ဂှ် ခမဳတြုံဍိုက်မ္ဂး၊ ဒးအာပတ်ပဲါစိုတ်ရ၊ ပ္ဍဲအရာခမဳတြုံဍိုက်ဂှ် ခမဳဗြဴဍိုက်မ္ဂး၊ ဒးအာပတ်ပဲါစိုတ်ရ၊ သီုညးၜါတၠလေဝ် ဍိုက်အိုတ်မ္ဂး၊ ဒးအာပတ်ပဲါစိုတ်ရ။ ဍေံမဒးစးတိုန်လတူ မ္ဂးဂှ် နဂၠုၚ် မဒးတိုန်လပါ်လတူ။ ဍေံမတသောဝ်ဗက်စှ်ေဗလဲသၟဝ် မ္ဂးဂှ် နဂၠုၚ် မတသောဝ်စှ်ေဗလဲဍာ်သၟဝ်။ ဝေၚ်ကၠေံ ပွမတက်ကၠောံ ဗွဲလၞၚ်တုဲ မ္ဂးဂှ် ပါဲကၠေံ ပွမတတ်ကၠောံၜဳ ဗွဲလၞၚ်တုဲ။ ပ္ဍဲကွာန်မသ္ၚောဲခရာမွဲစာၚ်ပဝ် ဇၟာပ်ကွာန်မွဲ ဇၟာပ်ကွာန်မွဲ ‘ရိုဟ်ကွာန်မွဲ ရိုဟ်ကွာန်မွဲ’ ဒးအာပတ်ပဲါစိုတ်ရ။ ပ္ဍဲဂြိုပ် မဟွံသေၚ်ကဵုကွာန်ဂှ် ဇၟာပ်ကဝက်ယောဇနာ ဇၟာပ်ကဝက်ယောဇနာ ဒးအာပတ်ပဲါစိုတ်ရ။
190) ပ္ဍဲအရာကသေံကၟဝ် မၞုံကဵုစၟတ်သမ္တီကသေံကၟဝ်ဒှ်တုဲ ဝေၚ်ကၠေံပွမတတ်ကၠောံဗွဲလၞၚ်တုဲ ဍိုက်မွဲဂၠုၚ်ဓဝ် ဍေံလေဝ်မဒှ်ဒစးတိုန်ဗွဲလတူ ဍေံလေဝ်မဒှ်တသောဝ်ဗက်စှေ်ဗလဲဍာ်မ္ဂး၊ ဒးအာပတ်ပဲါစိုတ်ရ။ ပ္ဍဲအရာကသေံကၟဝ် မၞုံကဵုသၠေဟ်ပၟာဒှ်တုဲ ဝေၚ်ကၠေံပွမတတ်ကၠောံဗွဲလၞၚ်တုဲ ဍိုက်မွဲဂၠုၚ်ဓဝ် ဍေံလေဝ်မဒှ်ဒစးတိုန်ဗွဲလတူ ဍေံလေဝ်မဒှ်တသောဝ်ဗက်စှေ်ဗလဲဍာ်မ္ဂး၊ ဒးအာပတ်ပဲဲါစိုတ်ရ။ ပ္ဍဲအရာကသေံကၟဝ် မၞုံကဵုစၟတ်သမ္တီဟွံကသေံကၟဝ်ဒှ်တုဲ ဝေၚ်ကၠေံပွမတတ်ကၠောံ ဗွဲလၞုၚ်တုဲ ဍိုက်မွဲဂၠုၚ်ဓဝ် ဍေံလေဝ်မဒှ်ဒစးတိုန်ဗွဲလတူ ဍေံလေဝ်မဒှ်တသောဝ်ဗက်စှ်ေဗလဲဍာ်မ္ဂး၊ ဒးအာပတ်ပဲါစိုတ်ရ။ ခမဳတြုံ ကသေံကၟဝ်ရ၊ ခမဳဗြဴ ဟွံကသေံကၟဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံကသေံကၟဝ် မၞုံကဵုစၟတ်သမ္တီကသေံကၟဝ်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံကသေံကၟဝ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာဟွံကသေံကၟဝ် မၞုံကဵုစၟတ်သမ္တီ ဟွံကသေံကၟဝ်မ္ဂး၊ ဟွံဒးအာပတ်ရ။ 191) ပွမတတ်ကၠောံအာ နပွမတတ်ကၠောံ ဗွဲလၞၚ်ၜဳမ္ဂး၊ ဟွံကသေံကၟဝ်တုဲ ဍိုက်အိုတ်မ္ဂး၊ ခမဳဗြဴ ကသေံကၟဝ်ရ၊ ခမဳတြုံ ဟွံကသေံကၟဝ်မ္ဂး၊ ပွမချိၚ်ဖာပ်ဆောတ်ယောၚ်တုဲ ဍိုက်အိုတ်မ္ဂး၊ ပရိုက်ဘဲနွံတုဲ ဍိုက်မ္ဂး ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ နာဝါဘိရုဟနသိက္ခာပိုဒ် အဋ္ဌမတုဲရ။
