၅.၃.၈။ နာဝါဘိရုဟနသိက္ခာပိုဒ်
186) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ်အိုတ်ရ။ မၞိဟ်ဂမၠိုၚ် “ပိုဲညးဂမၠိုၚ် ညံၚ်ရဴဝေၚ်တဴနကဵုဂၠုၚ် မွဲဟာန်ကေုာံသမ္ဘာအိုတ်ကီု တုပ်သၟဟ်သာ်ဝွံဟေၚ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဝေၚ်တဴနဂၠုၚ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်၊ ဟီုထ္ၜးဒုဟ်အိုတ်ရ၊ “ယွံခမဳတအ် မၞးတအ်ညးဂမၠိုၚ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူဂမ်ဖိုလ်) တအ် မၞးတအ်ညးဂမၠိုၚ် မုဟိုတ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ် ဍေံလေဝ်မဒှ်ဒစးတိုန်ဗွဲလတူ ဍေံလေဝ်မဒှ်တသောဝ်ဗက်စှေ်ဗလဲဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
187) ပ္ဍဲမွဲအခိၚ်တေံ ခမဳတြုံ ခမဳဗြဴဂမၠိုၚ်ဗွဲမဂၠိုၚ် နူဍုၚ်သာကေတ သွိုန်ဗပိုန်တဴတရဴအဓာန် မဂၠိၚ်သ္ၚောဲ ဍုၚ်သာရဝှ်အိုတ်ရ။ ပ္ဍဲအကြာဂၠံၚ်တရဴ သ္ဒးတတ်ၜဳရ။ ပ္ဍဲအခိၚ်ဂှ် ခမဳဗြဴဂမၠိုၚ် “ပိုဲဍိက်တအ်ညးဂမၠိုၚ်လေဝ် ကြက်တတ်ကၠောံ ကေုာံတဳလပိုဉ်ဂမၠိုၚ် မွဲစွံအိုတ်ရ” ရဴဝွံ သ္ဂးကဵုခမဳတြုံဂမၠိုၚ်အိုတ်ရ။ ယွံဒေံဗြဴတအ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ တၞဟ်နဍိုက်မွဲဂၠုၚ်ဓဝ်ဂှ် ဟွံဂပ်ဝ်ရ၊ မၞးတအ်ညးဂမၠိုၚ်လေဝ် ဩဝ်တတ်ကၠောံအာဗွဲကိုပ်ကၠာအိုတ်ညိ၊ ပိုဲညးဂမၠိုၚ်လေဝ် ကြက်တတ်ကၠောံအာအိုတ်ရ ရဴဝွံ (ဟီုသ္ဂးအိုတ်ရ)။ ယွံတဳလပိုဉ်တအ် တဳလပိုဉ်တအ်ညးဂမၠိုၚ်ဂှ် ဒှ်တြုံမပြဲဂမၠိုၚ်ရ တဳလပိုဉ်တအ် ညးဂမၠိုၚ်ဟေၚ် ဩဝ်တတ်ကၠောံအာဗွဲကိုပ်အိုတ်ညိ ရဴဝွံ (ဟီုသ္ဂးအိုတ်ရ) ။ ပ္ဍဲအခိၚ်ဂှ် ကုခမဳဗြဴဂမၠိုၚ် မတတ်ကၠောံအာ နူလက်ကရဴဂှ် ပ္ဍဲအကြာဂၠံၚ်တရဴ ကမၠတ်ဒမၠဂမၠိုၚ် ပၠံၚ်ဗတိုက်လေဝ် ပၠံၚ်ဗတိုက်အိုတ်ရ၊ ပလီုပလာ်လေဝ် ပလီုပလာ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိၚ် အာစိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်အိုတ်ရ၊ ခမဳဗြဴဂမၠိုၚ် ဟီုလဴဗ္စ ဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် တတ်ကၠောံအာၜဳ ဗွဲလၞၚ်မ္ဂး ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ တၞဟ်နဍိုက်မွဲဂၠုၚ်ဓဝ်ဂှ် ကဵုအခေါၚ်ရ” ရဴဝွ သ္ဂးကဵု ခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 188) “ယြဴခမဳမွဲ ဝေၚ်ကၠေံပွမတတ်ကၠောံဗွဲလၞၚ်တုဲ ကသေံကၟဝ် ကေုာံခမဳဗြဴဂမၠိုၚ်မွဲစွံတုဲ ဍိုက်မွဲဂၠုၚ်ဓဝ် ဍေံလေဝ်မဒှ်ဒစးတိုန်ဗွဲလတူ ဍေံလေဝ်မဒှ်တသောဝ်ဗက်စှေ်ဗလဲဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ) ။
