၅.၃.၇။ သံဝိဓါနသိက္ခာပိုဒ်
180) ပ္ဍဲအခိၚ်တဳလပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတေဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ ‘ချိၚ်ဖာပ်တုဲ’ သွိုန်ဗပိုန်တဴ တရဴအဓာန်မဂၠိၚ်သ္ၚောဲမွဲဂၠံၚ်ဓဝ်အိုတ်ရ။ မၞိဟ်ဂမၠိုၚ် “ပိုဲညးဂမၠိုၚ် ညံၚ်ရဴဂေတ်ဂ္ၚေၚ်အာကၠုၚ် မွဲဟာန်ကေုာံသမ္ဘာအိုတ်ကီု တုပ်သၟဟ်သာ်ဝွံဟေၚ် ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ်ဝွံ ဂေတ်ဂ္ၚေၚ်အာကၠုၚ် ကေုာံခမဳဗြဴဂမၠိုၚ်မွဲစွံအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ကသေံကၟဝ် ကေုာံခမဳဗြဴဂမၠိုၚ်မွဲစွံတုဲ ‘ချိၚ်ဖာပ်တုဲ’ သွိုန်ဗပိုန်တဴ တရဴအဓာန် မဂၠိၚ်သ္ၚောဲမွဲဂၠံၚ်ဓဝ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံခမဳတအ် မၞးတအ်ညးဂမၠိုၚ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ သွိုန်ဗပိုန်တဴ တရဴအဓာန်မဂၠိၚ်သ္ၚောဲမွဲဂၠံၚ်ဓဝ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူဂမ်ဖိုလ်) တအ် မၞးတအ်ညးဂမၠိုၚ် မုဟိုတ် ကသေံကၟဝ် ကေုာံခမဳဗြဴဂမၠိုၚ်မွဲစွံတုဲ သွိုန်ဗပိုန်တဴ တရဴအဓာန် မဂၠိၚ်သ္ၚောဲမွဲဂၠံၚ်ဓဝ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ကသေံကၟဝ် ကေုာံခမဳဗြဴဂမၠိုၚ်မွဲစွံတုဲ သွိုန်ဗပိုန်တဴ တရဴအဓာန်မဂၠိၚ်သ္ၚောဲ မွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
181) ပ္ဍဲမွဲအခိၚ်တေံ ခမဳတြုံ ခမဳဗြဴဂမၠိုၚ်ဗွဲမဂၠိုၚ် နူဍုၚ်သာကေတ သွိုန်ဗပိုန်တဴတရဴအဓာန်မဂၠိၚ်သ္ၚောဲ ဍုၚ်သာရဝှ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် “ပိုဲဍိက်တအ်ညးဂမၠိုၚ်လေဝ် ကြက်အာတဴကေုာံတဳလပိုဉ်ဂမၠိုၚ်မွဲစွံအိုတ်ရ” ရဴဝွံ သ္ဂးကဵုခမဳတြုံဂမၠိုၚ်အိုတ်ရ။ ယွံဒေံဗြဴတအ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ တၞဟ်နသွိုန်ဗပိုန်တဴ တရဴအဓာန်မဂၠိၚ်သ္ၚောဲမွဲဂၠံၚ်ဓဝ်ဂှ် ဟွံဂပ်ဝ်ရ၊ မၞးတအ်ညးဂမၠိုၚ်လေဝ် ဩဝ်အာဗွဲကိုပ်ကၠာအိုတ်ညိ၊ ပိုဲညးဂမၠိုၚ်လေဝ် ကြက်အာအိုတ်ရ ရဴဝွံ (ဟီုသ္ဂးအိုတ်ရ)။ ယွံတဳလပိုဉ်တအ် တဳလပိုဉ်တအ်ညးဂမၠိုၚ်ဂှ် ဒှ်တြုံမပြဲဂမၠိုၚ်ရ တဳလပိုဉ်တအ် ညးဂမၠိုၚ်ဟေၚ် ဩဝ်က္ညအာဗွဲကိုပ်ကၠာအိုတ်ညိ ရဴဝွံ (ဟီုသ္ဂးအိုတ်ရ)။ ပ္ဍဲအခိၚ်ဂှ် ကုခမဳဗြဴဂမၠိုၚ် မက္ညအာနူလက်ကရဴဂှ် ပ္ဍဲအကြာဂၠံၚ်တရဴ ကမၠတ်ဒမၠဂမၠိုၚ် ပၠံၚ်ဗတိုက်လေဝ် ပၠံၚ်ဗတိုက်အိုတ်ရ၊ ပလီုပလာ်လေဝ် ပလီုပလာ်အိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ် အာစိုပ်ဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဗြဴဂမၠိုၚ်အိုတ်ရ၊ ခမဳဗြဴဂမၠိုၚ် ဟီုလဴဗ္စဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ၊ ခမဳတြုံဂမၠိုၚ် ဂရၚ်ပတီဟိုတ်ပရူပရာဝွံ ကုတဳလပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် ပ္ဍဲဂၠံၚ်တရဴမဂပ်ဝ်အာတဴ မွဲဟာန်ကေုာံသာတိုက်သာကွဳ (သကအ်ရဲညးဗၞိက်) မဂပ်ဝ်သၟိတ်ဂးရဴဝွံမ္ဂး မၞုံကဵုသၠေဟ်ပၟာ မဒှ်တဴမွဲဟာန်ကေုာံပရိုက်ဘဲ (အန္တရာယ်ဂၠိုၚ်) ဂှ် ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ တၞဟ်နသွိုန်ဗပိုန်တဴ တရဴအဓာန် မဂၠိၚ်သ္ၚောဲမွဲဂၠံၚ်ဓဝ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 182) “ယြဴခမဳမွဲ ဝေၚ်ကၠေံအခိၚ်အခါတုဲ ကသေံကၟဝ်ကေုာံခမဳဗြဴဂမၠိုၚ်မွဲစွံတုဲ သွိုန်ဗပိုန်တဴ တရဴအဓာန် မဂၠိၚ်သ္ၚောဲမွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ (ကုခမဳဂှ်) ဒးအာပတ်ပဲါစိုတ်ရ၊ ပ္ဍဲအရာမကသေံကၟဝ်တုဲအာဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂၠံၚ်တရဴဂှ် ဂပ်ဝ်အာတဴ မွဲဟာန်ကေုာံသာတိုက်သာကွဳ (သကအ်ရဲညးဗၞိက်) ရ၊ ဣဝွံတုန် ပ္ဍဲအရာမကသေံကၟဝ် တုဲအာဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
