၅.၃.၆.၁။ ပွံက်စဳဝရသိဗ္ဗရသိက္ခာပိုဒ်

177) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဍေံဟွံသေၚ်ကဵုကဠောမသ မ္ဂးဂှ် နူလပါ်မိအံက်ကီု နူလပါ်မအံက်ကီု စဵုကဵုစိုပ်လ္ၚဝ်အပါဇၞော် အပါနက်ထပှ်ဒတောဝ်ဂှ် ဟွံဆက်စပ်ရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲဥဘတောသၚ်ရောၚ်။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂကူ ဗွဲတွဵုမယုတ် သ္ၚာမွဲမွဲဂကူ မရုမ်ဂပ်ကဵုဝိကပ္ပနရောၚ်။ ဇိၚ် မ္ဂးဂှ် အလဵုဇကု ဇိၚ်မ္ဂး၊ ဇၟာပ်ၜေါတ်တၞိၚ် ဇၟာပ်ၜေါတ်တၞိၚ်၊ ဒးအာပတ်ပဲါစိုတ်ရ။ ဖအောဝ်ကဵုဇိၚ် မ္ဂးဂှ် ဖအောဝ်ကဵုညးသအာၚ် ဇိၚ်မ္ဂး၊ ဒးအာပတ်ပဲါစိုတ်ရ။ ဖအောဝ်စကာမွဲအလန်တုဲ ဗွဲမဂၠိုၚ်ကဵုဝါလေဝ် ဇိၚ်မ္ဂး၊ ဒးအာပတ်ပဲါစိုတ်ရ။

178) ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုစၟတ်သမ္တီ ဇိၚ်လေဝ်ဇိၚ်ကဵုသ္ၚာမ္ဂး၊ ဖအောဝ်လေဝ် ဖအောဝ်ကဵုဇိၚ်မ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုသၠေဟ်ပၟာဒှ်တုဲ ဇိၚ်လေဝ်ဇိၚ်ကဵုသ္ၚာမ္ဂး၊ ဖအောဝ်လေဝ်ဖအောဝ်ကဵုဇိၚ်မ္ဂး၊ ဒးအာပတ်ပဲါစိုတ်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုစၟတ်သမ္တီကဠောမသဒှ်တုဲ ဇိၚ်လေဝ်ဇိၚ်ကဵုသ္ၚာမ္ဂး၊ ဖအောဝ်လေဝ်ဖအောဝ်ကဵုဇိၚ်မ္ဂး၊ ဒးအာပတ်ပဲါစိုတ်ရ။ သ္ၚာခမဳဗြဴ မဒှ်ပယျၚ် ပ္ဍဲသၚ်မွဲလပါ်မ္ဂး၊ ဇိၚ်လေဝ်ဇိၚ်ကဵုသ္ၚာမ္ဂး၊ ဖအောဝ်လေဝ်ဖအောဝ်ကဵုဇိၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသမ္ဂး၊ ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသမ္ဂး၊ ဟွံဒးအာပတ်ရ။

179) (ဇိၚ်ကဵုသ္ၚာ) ခမဳဗြဴကဠောမသမ္ဂး၊ ပဲါကၠေံသ္ၚာတုဲ ပရိက္ခရာမွဲသအာၚ်ဂှ် ဇိၚ်လေဝ်ဇိၚ်ကဵုမ္ဂး၊ ဖအောဝ်လေဝ်ဖအောဝ်ကဵုဇိၚ်မ္ဂး၊ ဟွံဒးအာပတ်ရ၊ (ဇိၚ်ကဵုသ္ၚာ) သိက္ခမာန် သာမဏဳဗြဴမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ စဳဝရသိဗ္ဗနသိက္ခာပိုဒ် ဆဋ္ဌတုဲရ။