၅.၃.၆။ စဳဝရသိဗ္ဗနသိက္ခာပိုဒ်
175) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတေဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥဒါယဳ လေပ်စဳကၠးချိုတ်ပၠိုတ် တၞဟ်နသ္ပကမၠောန်ပွမဇိၚ်သ္ၚာရ။ ခမဳဗြဴမွဲဇကု ပြာပ်အာဇရေၚ်တဳလပိုဉ်ဥဒါယဳတုဲမ္ဂး “ယွံတဳလပိုဉ် အာတ်ပါန်အခေါၚ်ရ၊ တဳလပိုဉ် ဩဝ်ဇိၚ်ကဵုသ္ၚာအဲဍိက်ညိ” ရဴဝွံ ဂရၚ်ပတီ တဳလပိုဉ်ဥဒါယဳရ။ ပ္ဍဲအခိၚ်ဂှ် တဳလပိုဉ်ဥဒါယဳ ဇိၚ်သ္ၚာခမဳဗြဴဂှ်တုဲ ဖျောန်ကၠေံဗွဲမဒးရး သ္ပကဠိတ်ကဠောတ်ဗွဲမဒးရးတုဲမ္ဂး ပ္ဍဲလဒေါဝ်ဂှ် သကဵုရုပ် (တြုံဗြဴ) မစိစောန် မကၠောန်သ္ပ နကသပ်ဉာဏ်ဇကု ပြာကဋ်ဗွဲမဒးရးတုဲ ထပ်စွံလဝ်ရ။ ပ္ဍဲအခိၚ်ဂှ် ခမဳဗြဴဂှ် ပြာပ်ကၠုၚ်ဇရေၚ်တဳလပိုဉ်ဥဒါယဳတုဲ “ယွံတဳလပိုဉ် သ္ၚာဂှ် ညးဍေံရော?” ရဴဝွံ ဂရၚ်ပတီသၟာန် တဳလပိုဉ်ဥဒါယဳရ။ “ယွံဒေံဗြဴ ဩဝ်ဂိုၚ်ကေတ်ညိ၊ သ္ၚာဝွံ ရၚ်တၠုၚ်သီဒေပ်စွံလဝ် အတိုၚ်ထပ်လဝ်ဂှ်တုဲ အခိၚ် သၚ်ခမဳဗြဴ ကၠုၚ်ဌာန်ဒုၚ်ဂိုၚ်ကေတ် ဒၠောံဗတောန်ဂှ် သၠောံရုၚ်လတက်သ္ၚာဝွံတုဲ ဩဝ်ဗက်ကၠုၚ် နူလက်ကရဴ နူလက်ကရဴ သၚ်ခမဳဗြဴညိ” ရဴဝွံ (သ္ဂး) ရ။ ပ္ဍဲအခိၚ်ဂှ် ခမဳဗြဴဂှ် ရၚ်တၠုၚ်သီဒေပ်စွံလဝ် သ္ၚာဂှ် အတိုၚ်ထပ်လဝ်ဂှ်တုဲ အခိၚ် သၚ်ခမဳဗြဴ ကၠုၚ်သွက်ဂွံဒုၚ်ဂိုၚ်ကေတ်ဒၠောံဗတောန်ဂှ် သၠောံရုၚ်လတက်ကေတ်သ္ၚာဂှ်တုဲ ဗက်ကၠုၚ် နူလက်ကရဴ နူလက်ကရဴ သၚ်ခမဳဗြဴရ။ မၞိဟ်ဂမၠိုၚ် “ခမဳဗြဴဂမၠိုၚ်ဝွံ လတေၚ်ဖေက်ပါပ်ဂွပါပ် ပိုတ်ဒၟံၚ်ဗွဲလောန်အိုတ်ရ၊ လုလောန်ကဵုမိပ်ဇြိပ် လဟိၚ်လဟာဲအိုတ်ရ၊ ဟွံမွဲကဵုဂဝဂလေံအိုတ်ရ၊ သီုဒှ်တဴခမဳဗြဴဂမၠိုၚ်ဂှ် သကဵုပြာကဋ်တဴ ရုပ်တြုံရုပ်ဗြဴမစိစောန် ပ္ဍဲသ္ၚာအိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဗြဴဂမၠိုၚ် “ကမၠောန်ဝွံ ဒှ်ကမၠောန်မုရဴညးမွဲရော?” ရဴဝွံ ဟီုသ္ဂးအိုတ်ရ၊ ဒှ်ကမၠောန် တဳလပိုဉ်ဥဒါယဳရ ရဴဝွံ ဟီုသ္ဂးတိုန်မ္ဂး ကုညးလတေၚ်ဖေက်ပါပ်ဂွပါပ်ပိုတ် လုလောန်ကဵုမိပ်ဇြိပ် လဟိၚ်လဟာဲ ဟွံမွဲကဵုဂဝဂလေံဂမၠိုၚ်လေဝ် ကမၠောန်ရဴဝွံ ဟွံဆာဲရ၊ ကုတဳလပိုဉ်ဥဒါယဳတုန် ပသာ်သ္ဂောံဆာဲမာန်ရော? ရဴဝွံ (ဟီုသ္ဂးအိုတ်ရ။) ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုခမဳတြုံဂမၠိုၚ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥဒါယဳ သ္ဂောံဇိၚ်သ္ပ သ္ၚာခမဳဗြဴရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံဥဒါယဳ တၠအဲ ဇိၚ်ကဵုသ္ၚာခမဳဗြဴရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံဥဒါယဳ ဒှ်ကဠောမသ ကေုာံတၠအဲဟာ၊ ဟွံဒှ်ကဠောမသဟာ ရဴဝွံ (သၟာန်တိုန်ဂှ်) ယွံကျာ်မၞုံပိုဉ် ဟွံဒှ်ကဠောမသရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) တြုံဟွံသေၚ်ကဵုကဠောမသဂှ် နမဇိၚ်ကဵုသ္ၚာခမဳဗြဴ ဟွံသေၚ်ကဵုကဠောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု မၞုံကဵုလျုၚ်ဇြုၚ်သ္ဍိုက်ကီု ဟွံမွဲကဵုလျုၚ်ဇြုၚ်သ္ဍိုက်ကီု တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ဇိၚ်ကဵုသ္ၚာ ခမဳဗြဴဟွံသေၚ်ကဵုကဠောမသရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
176) “ယြဴခမဳမွဲ သ္ၚာခမဳဗြဴဟွံသေၚ်ကဵုကဠောဂှ် အလဵုဇကုလေဝ် ဇိၚ်မ္ဂး ညးမွဲသအာၚ်လေဝ် ဖအောဝ်ကဵုဇိၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
