၅.၃.၅။ စဳဝရဒါနသိက္ခာပိုဒ်
169) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳမွဲဇကု ဂေတ်ဂ္ၚေၚ်တၞဟ်နပိဏ္ဍပါတ် ပ္ဍဲသဗာန်ဍာန်ဇၞော်မွဲ အပ္ဍဲဍုၚ်သာရဝှ်ရ၊ ခမဳဗြဴမွဲဇကုလေဝ် ဂေတ်ဂ္ၚေၚ်တၞဟ်နပိဏ္ဍပါတ် ပ္ဍဲသဗာန်ဍာ်ဇၞော်ဂှ်ရ။ ပ္ဍဲအခိၚ်ဂှ် “ယွံဒေံဗြဴ ဩဝ်က္ညအာညိ၊ ပ္ဍဲဌာန်အရာပ်မၞုံယၟုဝွံ လံၚ်ဒၟံၚ်ပိဏ္ဍပါတ်ရ” ရဴဝွံ သ္ဂးကဵုခမဳဗြဴဂှ်ရ။ ခမဳဗြဴမွဲဇကုဂှ်လေဝ် “ယွံတဳလပိုဉ် ဩဝ်က္ညအာညိ၊ ပ္ဍဲဌာန်အရာပ်မၞုံယၟုဝွံ လံၚ်ဒၟံၚ်ပိဏ္ဍပါတ်ရ” ရဴဝွံ သ္ဂးကဵုခမဳဂှ်ရ။ ခမဳတြုံ ခမဳဗြဴဂမၠိုၚ်ဂှ် နမဂွံညာတ်ဒၟံၚ်ဟွံပိုတ်ဂှ် ဒှ်အာမိတ်ပြဝါ မကေၚ်ဆဵုညာတ်အိုတ်ရ။ ပ္ဍဲအခိၚ်ဂှ် သၚ် ပါ်ပရအ်သ္ၚာရ။ ပ္ဍဲအခိၚ်ဂှ် ခမဳဗြဴဂှ် က္ညအာဌာန်ဒုၚ်ဂိုၚ်ကေတ်ဒၠောံဗတောန်တုဲ ပြာပ်အာဇရေၚ်ခမဳဂှ်တုဲမ္ဂး လ္ၚောဝ်သ္ပဝတ်ခမဳဂှ်တုဲ ဒတူဒၟံၚ်ပ္ဍဲဒၞဲါမွဲရ၊ ခမဳဗြဴမဒတူဒၟံၚ်ပ္ဍဲဒၞဲါမွဲတုဲဂှ် “ယွံဒေံဗြဴ ကြက်သာယျေန်တဴ သ္ၚာမပါ်ပရအ်သွက်အရၚ်အဲဟာ” ရဴဝွံ ခမဳဂှ် သ္ဂးရ။ ယွံတဳလပိုဉ် သာယျေန်ရ၊ အဲဍိက်ဗြဴ မၞုံကဵုသ္ၚာၚေတ်တြေံရ ရဴဝွံ သ္ဂးရ။ ပ္ဍဲအခိၚ်ဂှ် ခမဳဂှ် ကဵုထောံသ္ၚာကုခမဳဗြဴဂှ်ရ၊ အဲဍိက်ဗြဴ မၞုံကဵုသ္ၚာၚေတ်တြေံရ။ ခမဳဂမၠိုၚ် “ယွံကောန်တၠ ပ္ဍဲအခိၚ်လၟုဟ် ဩဝ်ဇိၚ်သ္ပသ္ၚာတၠအဲညိ” ဟီုသ္ဂးကဵုခမဳဂှ်အိုတ်ရ။ ပ္ဍဲအခိၚ်ဂှ် ခမဳဂှ် ဟီုလဴဗ္စဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် သ္ဂောံကဵုထောံသ္ၚာ ကုခမဳဗြဴရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳ တၠအဲ ကဵုထောံသ္ၚာကုခမဳဗြဴရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံခမဳ ဒှ်ကဠောမသ ကေုာံတၠအဲဟာ၊ ဟွံဒှ်ကဠောမသဟာ ရဴဝွံ (သၟာန်တိုန်ဂှ်) ယွံကျာ်မၞုံပိုဉ် ဟွံဒှ်ကဠောမသရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) ခမဳဟွံသေၚ် ကဵုကဠောမသဂှ် နမကဵုသ္ၚာကုခမဳဗြဴ ဟွံသေၚ်ကဵုကဠောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု နွံပြာကဋ်ကီု ဟွံမွဲပြာကဋ်ကီု တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ကဵုထောံသ္ၚာကုခမဳဗြဴ ဟွံသေၚ်ကဵုကဠောမသရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ကဵုထောံသ္ၚာ ကုခမဳဗြဴဟွံသေၚ်ကဵုကဠောမသမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
170) ပ္ဍဲအခိၚ်ဂှ် ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဂမၠိုၚ်ဒှ်တုဲ ဟွံဂံၚ်ကဵုသ္ၚာ မလှာဲဂတး ကုခမဳဗြဴဂမၠိုၚ်အိုတ်ရ ‘ဟွံဂံၚ်လှာဲသ္ၚာရၚ်သကအ်အိုတ်ရ’။ ခမဳဗြဴဂမၠိုၚ် “မုဟိုတ် တဳလပိုဉ်မဆာဲဂမၠိုၚ် ဟွံဂံၚ်ကဵုသ္ၚာ မလှာဲဂတး ကုပိုဲညးဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်ခမဳဗြဴဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ် ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ၊ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံဂလာန်ဓရ်တုဲ “ယွံခမဳတအ် တၞဟ်နကဵုသ္ၚာ မလှာဲဂတး သဟဓရ်ဂမၠိုၚ် မသုန်မတွံဂးကုခမဳတြုံကီု ကုခမဳဗြဴကီု ကုသိက္ခာမာန်ကီု ကုသာမဏဳတြုံကီု ကုသာမဏဳဗြဴကီုဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 171) “ယြဴခမဳမွဲ ဝေၚ်ကၠေံ ပွမလှာဲဂတးတုဲ ကဵုထောံသ္ၚာ ကုခမဳဗြဴဟွံသေၚ်ကဵုကဠောမသမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
