၅.၃.၂။ အတ္ထၚ်္ဂတသိက္ခာပိုဒ်
153) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ် မဒှ်ထေရ်ဇၞော်ဂှ် ဒၠောံဗတောန်ခမဳဗြဴဂမၠိုၚ် ဗွဲလၟေၚ်အလန်အိုတ်ရ။ ပ္ဍဲအခိၚ်ဂှ် တၞဟ်နဒၠောံဗတောန်ခမဳဗြဴဂမၠိုၚ် ဒှ်အလန်တဳလပိုဉ်စူဠပန္ထကရ။ ခမဳဗြဴဂမၠိုၚ် “ပ္ဍဲအခိၚ်လၟုဟ်ဝွံ ဒၠောံဗတောန်တ္ၚဲဏံဂှ် ကြက်ဟွံဍိုက်ပေၚ်ရ၊ ပ္ဍဲအခိၚ်လၟုဟ်ဝွံ ဥဒါန်ဂှ်ဟေၚ် တဳလပိုဉ်စူဠပန္ထက ကြက်ဖ္ဍောတ်ဂၠိုၚ်ဂၠိုၚ်ကဵုဝါရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ပြာပ်အာဇရေၚ်တဳလပိုဉ်စူဠပန္ထကအိုတ်တုဲ လ္ၚောဝ်သ္ပဝတ် တဳလပိုဉ်စူဠပန္ထကတုဲမ္ဂး ဂဇအ်ဒၟံၚ်ပ္ဍဲဒၞဲါမွဲအိုတ်ရ၊ “ယွံဒေံဗြဴတအ် ညဳသာသၟဟ်သၟန်အိုတ်ရဟာ” ရဴဝွံ သၟာန်ခမဳဗြဴဂမၠိုၚ် မဂဇအ်ဒၟံၚ်ပ္ဍဲဒၞဲါမွဲဂှ်ရ။ “ညဳသာသၟဟ်သၟန်အိုတ်ရ ယွံတဳလပိုဉ်” ရဴဝွံ (ဂရၚ်ပတီအိုတ်ရ)။ “ယွံဒေံဗြဴတအ် ဂရုဓရ်ဒ္စာံသာ်ဂမၠိုၚ် ကၠုၚ်တဴပ္ဍဲပါၚ် (ဂွံလဝ်ပါၚ်တိုက်) အိုတ်ရဟာ” ရဴဝွံ သၟာန်ပၠန်ရ၊ “ဂရုဓရ်ဒ္စာံသာ်ဂမၠိုၚ် ကၠုၚ်တဴပ္ဍဲပါၚ်အိုတ်ရ ယွံတဳလပိုဉ်” ရဴဝွံ (ဂရၚ်ပတီအိုတ်ရ)။ “ယွံဒေံဗြဴတအ် ဣဝွံတုန် ဒှ်ဒၠောံဗတောန်ရ” ရဴဝွံ ဇိုန်ဏှၚ်အပ်ပြာပ်ကဵုတုဲ ဖ္ဍောတ်တိုန်ဥဒါန်ဝွံဂၠိုၚ်ဂၠိုၚ်ကဵုဝါရ− “ကုပူဂိုလ်တၠအရှန် မၞုံကဵု ‘အရဟတ္တဖိုလ်’ စိုတ်မလောန်ကာဲ မဟွံဝိဝိၚ်ဟိုတ်မာဲ မဒ္ဂေတ်လ္ၚတ် ပ္ဍဲဓရ် (ဗောဓိပက္ခိယ) ဂမၠိုၚ် မဒှ်ဟိုတ် (အရဟတ္တမဂ် အရဟတ္တဖိုလ်) ဉာဏ် မဍိုက်ပေၚ်တဴကေုာံတာဒိဂုဏ် ‘ဂုဏ်မဟွံချဳဇတဝ် မပ္တံပွမအေၚ်ဒုၚ်’ မၜိုဟ်လလမ် (နူမပ္တံရာဂ) တုဲ မၞုံကဵုသတိအခါကာလအိုတ်သီုဂှ် ပွမဂွိၚ်စံၚ်တူဂမၠိုၚ် ဟွံဒှ်အိုတ်ရ” ရဴဝွံ (ဖ္ဍောတ်တိုန် ဥဒါန်ဝွံ ဂၠိုၚ်ဂၠိုၚ်ကဵုဝါရ)။ ခမဳဗြဴဂမၠိုၚ် “ပ္ဍဲအခိၚ်လၟုဟ်ဝွံ ဒၠောံဗတောန်တ္ၚဲဏအ်ဂှ် ကြက်ဟွံဍိုက်ပေၚ်ရ၊ ပ္ဍဲအခိၚ်လၟုဟ်ဝွံ ဥဒါန်ဂှ်ဟေၚ် တဳလပိုဉ်စူဠပန္ထက ကြက်ဖ္ဍောတ်ဂၠိုၚ်ဂၠိုၚ်ကဵုဝါရ ရဴဝွံ ဟီုကၠုၚ်လဝ်ရ ဟွံသေၚ်ဟာ” ရဴဝွံ ဟီုသ္ဂးအိုတ်ရ။ တဳလပိုဉ်စူဠပန္ထက သ္ဂောံမိၚ်ကေတ် ပွမဟီုသ္ဂးဂလာန်ခမဳဗြဴဂမၠိုၚ်ဂှ်ဟေၚ်ရ။ ပ္ဍဲအခိၚ်ဂှ် တဳလပိုဉ်စူဠပန္ထက ကဠာၚ်တိုန်အကးတုဲ ပ္ဍဲအကးမဂပ်ဝ်ဟီုဂးမ္ၚးဂၠးဂှ်ကွာ်လေဝ် ကွာ်စၚ်္ကြမ်ရ၊ ဒတူလေဝ် ဒတူရ၊ ဂဇအ်လေဝ် ဂဇအ်ရ၊ တိက်လေဝ် တိက်ရ၊ ယေက်လေဝ် ဗလးပတိတ်ရ၊ သၞပၟတ်လေဝ် ဗလးပတိတ်ရ၊ ပ္ဍဲအကြာအကြာဂှ်လေဝ် ကၠေံဗ္ဒန်အာရ၊ ဥဒါန်ဂှ်လေဝ် ဖ္ဍောတ်ရ၊ ဂလာန်ကျာ်ဗွဲမဂၠိုၚ် မွဲသအာၚ်လေဝ် ဖ္ဍောတ်ရ။ ခမဳဗြဴဂမၠိုၚ် “ဩ ထေက်ကဵုအမ်သဝ်ကွေံ ယွံသကအ်တအ်၊ ဟွံကေၚ်ဒှ်မွဲလှေ်ဂှ် ဒှ်ကၠုၚ်ရ ယွံသကအ်တအ်၊ ဒၠောံဗတောန်တဳလပိုဉ်စူဠပန္ထက သၟဟ်ညံၚ်ရဴဍိုက်ပေၚ်ကီု တုပ်သၟဟ်သာ်ဂှ် ပ္ဍဲကာလကိုပ်ကၠာ နူအခိၚ်ဝွံ ဒၠောံဗတောန်ဟွံဍိုက်ပေၚ်ကၠုၚ် ကုပိုဲညးဂမၠိုၚ်မွဲလှေ်ရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် တဳလပိုဉ်စူဠပန္ထကဂှ် စဵုကဵုတ္ၚဲဂၠု ကဵုဒၠောံဗတောန်ကဵုခမဳဗြဴဂမၠိုၚ်ဂှ်တုဲ “ယွံဒေံဗြဴတအ် ဩဝ်အာအိုတ်ညိ” ရဴဝွံ ဗလးဏာအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ဟိုတ်နူပါၚ်တြၚ်ဍုၚ်ကၟာတ်အာဂှ်ရ ပဒတဴပ္ဍဲမ္ၚးဍုၚ်တုဲ နူဂယးပြဟ်ဟေၚ် လုပ်အာဍုၚ်အိုတ်ရ၊ မၞိဟ်ဂမၠိုၚ် “ခမဳဗြဴဂမၠိုၚ် မဒ္ဂေတ်တဴ ဒ္ဂေတ်မယုတ်မာဝွံ ပဒတဴမွဲစွံ ကေုာံခမဳတြုံဂမၠိုၚ် ပ္ဍဲအာရှာမ်ဘာတုဲ အခိၚ်လၟုဟ်ဝွံ လုပ်ဍုၚ်အိုတ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်စူဠပန္ထက စဵုကဵုတ္ၚဲပၠိုတ် သ္ဂောံဒၠောံဗတောန်ခမဳဗြဴဂမၠိုၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံစူဠပန္ထက တၠအဲ စဵုကဵုတ္ၚဲပၠိုတ် ဒၠောံဗတောန်ခမဳဗြဴဂမၠိုၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံစူဠပန္ထက မုဟိုတ် တၠအဲ စဵုကဵုတ္ၚဲပၠိုတ် ဒၠောံဗတောန်ခမဳဗြဴဂမၠိုၚ်ရော? (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
154) “ၜိုန်ရခမဳမကလိဂွံသၟိတ်လေဝ် စဵုကဵုတ္ၚဲပၠိုတ် ယဝ်ဒၠောံဗတောန်ခမဳဗြဴဂမၠိုၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
