၅.၃.၁၀.၁။ ပွံက်ရဟောနိသဇ္ဇသိက္ခာပိုဒ်

200) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲဥဘတောသၚ်ရောၚ်။ မွဲစွံ မ္ဂးဂှ် မွဲဂကောံဓဝ်ရောၚ်။ ညးမွဲကေုာံညးမွဲ မ္ဂးဂှ် ခမဳတြုံကီု ခမဳဗြဴကီု ဒှ်ရ။ ဌာန်လ္ၚု မ္ဂးဂှ် ဌာန်လ္ၚဂြောပ်ဗ္ဒန်မတ် ဌာန်လ္ၚုဂြောပ်ဗ္ဒန်ကတောဝ်ရောၚ်။ ဌာန်လ္ၚုဂြောပ်ဗ္ဒန်မတ် မ္ဂးဂှ် ဌာန်ဟွံသၟဟ်စောံ တၞဟ်နညာတ် ပွမထ္ၜေက်ထ္ၜးမတ်ကီု ပွမပချဳထ္ၜးတၞေၚ်မတ်ကီု ပွမဓညိက်ထ္ၜးက္ဍိုပ်ကီုရောၚ်။ ဌာန်လ္ၚုဂြောပ်ဗ္ဒန်ကတောဝ် မ္ဂးဂှ် ဌာန်ဟွံသၟဟ်စောံ တၞဟ်နမိၚ်ဂလာန်ဟီုပကတိရောၚ်။ ဂဇအ်ဒၟံၚ်မ္ဂး မ္ဂးဂှ် ခမဳဗြဴဂှ် ဂဇအ်မ္ဂး ခမဳဂှ် ပြာပ်အာတုဲလေဝ်ဂဇအ်ကီု ပြာပ်အာတုဲလေဝ်တိက်ကီု ဒးအာပတ်ပဲါစိုတ်ရ။ ခမဳဂှ် ဂဇအ်မ္ဂး ခမဳဗြဴဂှ် ပြာပ်အာတုဲလေဝ်ဂဇအ်ကီု ပြာပ်အာတုဲလေဝ်တိက်ကီု ဒးအာပတ်ပဲါစိုတ်ရ။ သီုညးၜါလေဝ်ဂဇအ်အိုတ်ကီု သီုညးၜါလေဝ်တိက်အိုတ်ကီု ဒးအာပတ်ပဲါစိုတ်ရ။

201) ပ္ဍဲဌာန်လ္ၚုဂြောပ်ဗ္ဒန် မၞုံကဵုစၟတ်သမ္တီလ္ၚုဂြောပ်ဗ္ဒန်ဒှ်တုဲ ဂဇအ်ညးမွဲကေုာံညးမွဲမ္ဂး၊ ဒးအာပတ်ပဲါစိုတ်ရ။ ပ္ဍဲဌာန်လ္ၚုဂြောပ်ဗ္ဒန် မၞုံကဵုသၠေဟ်ပၟာဒှ်တုဲ ဂဇအ်ညးမွဲကေုာံညးမွဲမ္ဂး၊ ဒးအာပတ်ပဲါစိုတ်ရ။ ပ္ဍဲဌာန်လ္ၚုဂြောပ်ဗ္ဒန် မၞုံကဵုစၟတ်သမ္တီဟွံလ္ၚဂြောပ်ဗ္ဒန်ဒှ်တုဲ ဂဇအ်ညးမွဲကေုာံညးမွဲမ္ဂး၊ ဒးအာပတ်ပဲါစိုတ်ရ။ ပ္ဍဲဌာန်ဟွံလ္ၚုဂြောပ်ဗ္ဒန် မၞုံကဵုစၟတ်သမ္တီလ္ၚုဂြောပ်ဗ္ဒန်မ္ဂး၊ ဒးအာပတ်ဒုက္ကဋ်ရ။ ပ္ဍဲဌာန်ဟွံလ္ၚုဂြောပ်ဗ္ဒန် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲဌာန်ဟွံလ္ၚုဂြောပ်ဗ္ဒန် မၞုံကဵုစၟတ်သမ္တီဟွံလ္ၚုဂြောပ်ဗ္ဒန်မ္ဂး၊ ဟွံဒးအာပတ်ရ။

202) သကအ်ပွံၚ် ညးမတီကၠိုဟ်ခၠၚ် မမိက်ကဵုမွဲမွဲနွံမ္ဂး၊ ၜိုန်တန်တဴလေဝ် ဟွံဂဇအ်မ္ဂး၊ ဟွံသ္ၚေဝ်မဲ ကဵုပွမလ္ၚုဂြောပ်ဗ္ဒန်မ္ဂး၊ သ္ပအာရီုမွဲသအာၚ်တုဲ ဂဇအ်ဒၟံၚ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ရဟောနိသဇ္ဇသိက္ခာပိုဒ် ဒသမတုဲရ။ ဩဝါဒဝဂ် တတိယတုဲရ။