၅.၃.၁၀။ ရဟောနိသဇ္ဇသိက္ခာပိုဒ်

198) ပ္ဍဲအခိၚ်တဳလပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သမ္ဘာတြေံ တဳလပိုဉ်ဥဒါယဳ သ္ပခမဳ ပ္ဍဲဇရေၚ်ခမဳဗြဴဂမၠိုၚ်ရ၊ ခမဳဗြဴဂှ် ကၠုၚ်ဇရေၚ်တဳလပိုဉ်ဥဒါယဳ ဟွံပိုတ်ရ၊ တဳလပိုဉ်ဥဒါယဳလေဝ် အာဇရေၚ်ခမဳဗြဴဂှ် ဟွံပိုတ်ရ၊ ပ္ဍဲအခိၚ်ဂှ် တဳလပိုဉ်ဥဒါယဳ ဂဇအ်ဒၟံၚ်ကေုာံခမဳဗြဴဂှ်မွဲစွံ ညးမွဲကေုာံညးမွဲ ပ္ဍဲဌာန်မလ္ၚုရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥဒါယဳ ဂဇအ်ဒၟံၚ်ကေုာံခမဳဗြဴဂှ်မွဲစွံ ညးမွဲကေုာံညးမွဲ ပ္ဍဲဌာန်မလ္ၚုရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥဒါယဳ တၠအဲ ဂဇအ်ဒၟံၚ်ကေုာံခမဳဗြဴဂှ်မွဲစွံ ညးမွဲကေုာံညးမွဲ ပ္ဍဲဌာန်မလ္ၚုရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ဂဇအ်ဒၟံၚ်ကေုာံခမဳဗြဴဂှ်မွဲစွံ ညးမွဲကေုာံညးမွဲ ပ္ဍဲဌာန်မလ္ၚုရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

199) “ယြဴခမဳမွဲ သ္ပတဴပွမဂဇအ် ကေုာံခမဳဗြဴဂှ်မွဲစွံ ညးမွဲကေုာံညးမွဲ ပ္ဍဲဌာန်မလ္ၚုမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။