၅.၃.၁။ ဩဝါဒသိက္ခာပိုဒ်
144) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ် မဒှ်ထေရ်ဇၞော်ဂှ် ဒၠောံဗတောန်ခမဳဗြဴဂမၠိုၚ်အိုတ်မ္ဂး ကလိဂွံသ္ၚာပိဏ္ဍပါတ် ဘာသၞာသတိက်သၞာဒၟံၚ်ဂဥုဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်အိုတ်ရ။ ပ္ဍဲအခိၚ်ဂှ် “ယွံကောန်တၠတအ် ပ္ဍဲအခိၚ်လၟုဟ် ခမဳဂမၠိုၚ် မဒှ်ထေရ်ဇၞော်ဂှ် ဒၠောံဗတောန်ခမဳဗြဴဂမၠိုၚ်အိုတ်မ္ဂး ကလိဂွံသ္ၚာပိဏ္ဍပါတ် ဘာသၞာသတိက်သၞာဒၟံၚ် ဂဥဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်အိုတ်ရ၊ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ်လေဝ် ဒၠောံဗတောန်ခမဳဗြဴဂမၠိုၚ်အိုတ်ရ” ရဴဝွံ ကသပ်ဒှ် ကုခမဳဆဗ္ဗဂ္ဂဳဂမၠိုၚ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ် ခမဳဗြဴဂမၠိုၚ်တုဲ “ယွံဒေံဗြဴတအ် ဇရေၚ်ပိုဲညးဂမၠိုၚ်လေဝ် ဩဝ်ပြာပ်ခစအိုတ်ညိ၊ ပိုဲညးဂမၠိုၚ်လေဝ် ကြက်ဒၠောံဗတောန်အိုတ်ရ” ရဴဝွံ ဟီုသ္ဂးအိုတ်ရ၊ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ပြာပ်အာဇရေၚ်ခမဳဆဗ္ဗဂ္ဂဳဂမၠိုၚ်အိုတ်တုဲ လ္ၚောဝ်သ္ပဝတ်ခမဳဆဗ္ဗဂ္ဂဳဂမၠိုၚ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲအိုတ်ရ၊ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဟီုတွံဂလာန်ဓရ်ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ “ယွံဒေံဗြဴတအ် ဩဝ်အာအိုတ်ညိ” ရဴဝွံ သ္ဂးတုဲ ဗလးဏာအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ပြာပ်အာဇရေၚ်တဳလမၞုံပိုဉ်ကျာ်တြဲအိုတ်တုဲ လ္ၚောဝ်သ္ပဝတ်တဳလပိုဉ်ကျာ်တြဲတုဲမ္ဂး တန်တဴဒၟံၚ်ပ္ဍဲဒၞဲါမွဲအိုတ်ရ၊ တဳလမၞုံပိုဉ်ကျာ်တြဲဂှ် “ယွံခမဳဗြဴတအ် ဩဝါဒဒၠောံဗတောန် ဍိုက်ပေၚ်တုဲရ ဟွံသေၚ်ဟာ” ရဴဝွံ သ္ဂးကဵုခမဳဗြဴဂမၠိုၚ် မတန်တဴဒၟံၚ်ပ္ဍဲဒၞဲါမွဲဂှ်ရ။ ယွံတဳလမၞုံပိုဉ် ပသာ်ဩဝါဒဒၠောံဗတောန် သ္ဂောံဍိုက်ပေၚ်မာန်ညိရော? တဳလပိုဉ်ခမဳဆဗ္ဗဂ္ဂဳဂမၠိုၚ် ဟီုတွံဂလာန်ဓရ် မဒှ်ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရ ရဴဝွံ (ဂရၚ်ပတီအိုတ်ရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ် ကဵုခမဳဗြဴဂမၠိုၚ် တဳညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် နကဵုဂလာန်ဓရ် တဳလမၞုံကုပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ရဴဂဴကၠာ ပဲါစ္ဍးအာအိုတ်ရ။ ပ္ဍဲအခိၚ်ဂှ် သကဵုဂကောံခမဳကောံဓရီုတုဲ— “ယွံခမဳတအ် မၞးတအ်ညးဂမၠိုၚ် ဟီုတွံဂလာန်ဓရ် ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ(အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရ ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဆဗ္ဗဂ္ဂဳဂမၠိုၚ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဟီုတွံဂလာန်ဓရ် ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ ဟီုတွံကဵုဂလာန်ဓရ်တုဲမ္ဂး — “ယွံခမဳတအ် တၞဟ်နသၟိတ်ပတိုန် ခမဳမလေပ်ဒၠောံဗတောန်ခမဳဗြဴဂမၠိုၚ်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဂပ်ဝ်သၟိတ်ရ၊ ဗွဲကိုပ်ကၠာ သ္ဒးအာတ်ပါန်အခေါၚ်ခမဳဂှ်ရ၊ အာတ်ပါန်အခေါၚ်တုဲ ဗွဲကြဴ ခမဳစဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
145) “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ရ၊ ယြဴတဳလမၞုံပိုဉ်မွဲ သ္ဍိုက်မၠိုက် ပွမသၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ မရနုက်ကဵုၜါဝါလေဝ် ဟီုသ္ဂးဟိုတ်ဝွံရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဝွံရ၊ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ သၚ် သၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ရ၊ ယြဴတဳလပိုဉ်မွဲ သ္ဍိုက်မၠိုက် ပွမသၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် သၟိတ်ပတိုန်ခမဳမၞုံယၟုဝွံ ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်တုဲမ္ဂး ပွမဇြိုၚ်ကဵုသွက်ဂွံလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
146) “ယြဴခမဳမွဲ သီုဟွံကလိဂွံသၟိတ် ဒၠောံဗတောန်ခမဳဗြဴဂမၠိုၚ်မ္ဂး၊ (ကုခမဳ) ဂှ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
147) ပ္ဍဲအခိၚ်ဂှ် ခမဳဂမၠိုၚ် မဒှ်ထေရ်ဇၞော် မကလိဂွံသၟိတ်ဂှ် ဒၠောံဗတောန်ခမဳဗြဴဂမၠိုၚ်အိုတ်မ္ဂး အတိုၚ်ကိုပ်ကၠာဂှ်ဟေၚ် ကလိဂွံသ္ၚာပိဏ္ဍပါတ် ဘာသၞာသတိက်သၞာဒၟံၚ် ဂဥုဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်အိုတ်ရ။ ပ္ဍဲအခိၚ်ဂှ် “ယွံကောန်တၠတအ် ပ္ဍဲအခိၚ်လၟုဟ် ခမဳဂမၠိုၚ် မဒှ်ထေရ်ဇၞော် မကလိဂွံသၟိတ်ဂှ် ဒၠောံဗတောန်ခမဳဗြဴဂမၠိုၚ်အိုတ်မ္ဂး အတိုၚ်ကိုပ်ကၠာဂှ်ဟေၚ် ကလိဂွံသ္ၚာပိဏ္ဍပါတ်ဘာသၞာသတိက်သၞာဒၟံၚ် ဂဥုဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်အိုတ်ရ၊ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ်လေဝ် အာမ္ၚးသိမ်တုဲ ကေုာံရၚ်သကအ် သၟိတ်ပတိုန်ရဴဝွံမ္ဂး ခမဳမလေပ်ဒၠောံဗတောန် ခမဳဗြဴဂမၠိုၚ်တုဲ ဒၠောံဗတောန်ခမဳဗြဴဂမၠိုၚ်အိုတ်ရ” ရဴဝွံ ကသပ်ဒှ်ကုခမဳဆဗ္ဗဂ္ဂဳဂမၠိုၚ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် အာမ္ၚးသိမ်တုဲ ကေုာံရၚ်သကအ် သၟိတ်ပတိုန် ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်တုဲအိုတ်မ္ဂး ပြာပ်အာဇရေၚ်ခမဳဗြဴဂမၠိုၚ်တုဲ “ယွံဒေံဗြဴတအ် ပိုဲညးဂမၠိုၚ်လေဝ် ကလိဂွံသၟိတ်တုဲအိုတ်ရ၊ ဇရေၚ်ပိုဲညးဂမၠိုၚ်လေဝ် ဩဝ်ပြာပ်အခစအိုတ်ညိ၊ ပိုဲညးဂမၠိုၚ်လေဝ် ကြက်ဒၠောံဗတောန်အိုတ်ရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ပြာပ်အာဇရေၚ်ခမဳဆဗ္ဗဂ္ဂဳဂမၠိုၚ်အိုတ်တုဲ လ္ၚောဝ်သ္ပဝတ်ခမဳဆဗ္ဗဂ္ဂဳဂမၠိုၚ်တုဲမ္ဂး ဂဇအ်ဒၟံၚ်ပ္ဍဲဒၞဲါမွဲအိုတ်ရ၊ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ဟီုတွံဂလာန်ဓရ် ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ “ယွံဒေံဗြဴတအ် ဩဝ်အာအိုတ်ညိ” ရဴဝွံ သ္ဂးတုဲ ဗလးဏာအိုတ်ရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် ပြာပ်အာဇရေၚ်တဳလမၞုံပိုဉ်ကျာ်တြဲအိုတ်တုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး တန်တဴဒၟံၚ်ပ္ဍဲဒၞဲါမွဲအိုတ်ရ၊ တဳလပိုဉ်မၞုံကျာ်တြဲ “ယွံခမဳဗြဴတအ် ဩဝါဒဒၠောံဗတောန် ဍိုက်ပေၚ်တုဲရ ဟွံသေၚ်ဟာ” ရဴဝွံ သ္ဂးကဵုခမဳဗြဴဂမၠိုၚ် မတန်တဴဒၟံၚ်ပ္ဍဲဒၞဲါမွဲဂှ်ရ။ ယွံတဳလမၞုံပိုဉ် ပသာ်ဩဝါဒဒၠောံဗတောန်ဂှ် သ္ဂောံဍိုက်ပေၚ်မာန်ညိရော? တဳလပိုဉ်ခမဳဆဗ္ဗဂ္ဂဳဂမၠိုၚ် ဟီုတွံဂလာန်ဓရ် မဒှ်ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရ ရဴဝွံ (ဂရၚ်ပတီအိုတ်ရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲဂှ် နကဵုဂလာန်ဓရ်ကဵုခမဳဗြဴဂမၠိုၚ် တီညာတ်ကေတ် (ဒတုဲဖဵုမြမောဝ်) ကဵုဒဂိုန်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာရ။ ပ္ဍဲအခိၚ်ဂှ် ခမဳဗြဴဂမၠိုၚ်ဂှ် နကဵုဂလာန်ဓရ်တဳလမၞုံပိုဉ်ကျာ်တြဲ ကဵုတီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲဒှ်တုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ကၠာ ပဲါစ္ဍးအာအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျ်တြဲ သကဵုဂကောံခမဳကောံဓရီုတုဲ— “ယွံခမဳတအ် မၞးတအ်ညးဂမၠိုၚ် ဟီုတွံဂလာန်ဓရ် ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဆဗ္ဗဂ္ဂဳဂမၠိုၚ်ရ။ ဍာံပြရ ယွံကျာ်မၞံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဟီုတွံဂလာန်ဓရ် ကုခမဳဗြဴဂမၠိုၚ် ဗၞတ်ညိနာၚ်ဟေၚ်တုဲ လုကဴမွဲတ္ၚဲ (ကၠိုဟ်တ္ၚဲ) သကဵုကလိလောန်အာ (အခိၚ်) နကဵုဂလာန်ဂမၠိုၚ် မဒစဵုဒစးကဵုမဂ်ဖိုလ်တုဲ ဗလးဏာအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျိုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ ဟီုတွံကဵုဂလာန်ဓရ်တုဲမ္ဂး —
အၚ်္ဂဘိက္ခုနောဝါဒကဒ္စာံသာ် ယွံခမဳတအ် တၞဟ်နသၟိတ်တိုန် ခမဳမဍိုက်ပေၚ်တဴကေုာံအၚ်္ဂဂမၠိုၚ်ဒ္စာံသာ် ရဴဝွံမ္ဂး ခမဳမလေပ်ဒၠောံဗတောန်ခမဳဗြဴဂမၠိုၚ်ဂှ် ကဵုအခေါၚ်ရ ရဴဝွံ သ္ဂးကဵုခမဳဂမၠိုၚ်ရ။ (၁) မၞုံကဵုသဳလရ၊ သီုမသ္ၚဳလလမ်မၚ်မွဲ ‘ပါတိမောက္ခသံဝရသဳလ’ ဒ္ဂေတ်လ္ၚတ်မမၚ်မွဲသိက္ခာပိုဒ် ခမဳဂမၠိုၚ်ဂှ်ပဒတဴရ၊ ဍိုက်ပေၚ်တဴကဵုဒ္ဂေတ်လ္ၚတ် အရာဂေတ်ဂ္ၚေၚ်ရ၊ ပ္ဍဲဒုဟ်ဂမၠိုၚ် ဗၞတ်ညိနာၚ်လေဝ် မၞုံအလေံမၠာ်သ္ၚေဝ် ရဴဝွံမ္ဂး ဘဲရ၊ ဒဂိုန်ဂိုၚ်ကေတ် ပ္ဍဲသိက္ခာပိုဒ်ဂမၠိုၚ်တုဲ ဒ္ဂေတ်လ္ၚတ်ရ။ (၂) မၞုံကဵု ‘ဗဟုသုတ’ လမိၚ်လညာတ်ဂၠိုၚ်ရ၊ ပကၚ်ရၚ်လဝ်လၟိၚ်လညာတ်ရ၊ လ္ၚတ်ဆန်ၜန် (ပကောံပကေဝ်) လဝ် လမိၚ်လညာတ်ရ။ ယြဴဓရ်ဂမၠိုၚ် မၞုံကဵုပွမဆာဲတမ် ပွမဆာဲလဒေါဝ် ပွမဆာဲကၞောတ်အိုတ်ရ၊ တွံတဴဒ္ဂေတ်မပြဲ မဍိုက်ပေၚ်တဴကေုာံအရထ မဍိုက်ပေၚ်တဴကေုာံသဒ္ဒါ မဍိုက်ပေၚ်ပွဳပွူအိုတ်သီု မသအးဇ္ၚးပွဳပွူအိုတ်ရ၊ ပ္ဍဲဓရ်ဂမၠိုၚ်မၞုံသဘဴဂကူဂှ် ခမဳဂှ် လမိၚ်လညာတ်ဂၠိုၚ်ရ၊ ပကၚ်ရၚ် ပတိုန်လဝ်ပါၚ်ရ၊ ဖ္ဍောတ်သှ်ၛာယ်လဝ် နပါၚ်ရ၊ ချပ်လ္ၚတ်လဝ် နစိုတ်ရ၊ မၠာ်သ္ၚေဝ်ဂၠိုၚ်ဂၠိုၚ်ကဵုဝါရ၊ ထပက်ခၠၚ်တီကေတ် နကဵုပညာဗွဲမဒးရးရ။ (၃) ကုခမဳဂှ် ပါတိမုက်ဂမၠိုၚ်ၜါ ကၠုၚ်တဴပ္ဍဲပါၚ် (ဂွံလဝ်ပါၚ်တိုက်) ဗွဲတြးအိုတ်ရ၊ ဂပ်ဝ်ပါ်ပရအ်လဝ် ဗွဲမဒးရးအိုတ်ရ၊ မၞုံကဵုပွမကတဵုဒှ်ဗွဲမဒးရးအိုတ်ရ၊ ကဵုကတဵုဒှ် ဗွဲပါဠိအဋ္ဌကထာဗွဲမဒးရး မာန်အိုတ်ရ။ (၄) မၞုံကဵုဂလာန်ခိုဟ်ရ၊ မၞုံကဵုရမျာၚ်ခိုဟ်ရ။ (၅) ဗွဲမဂၠိုၚ်ဂၠၚ် ခမဳဗြဴဂမၠိုၚ် ဂပ်ဝ်သ္ဍိုက်ဆာန် ဂပ်ဝ်သ္ဍိုက်မၠိုက်ဒးဂၞပ်ရ။ (၆) သၟဟ်ရထ တၞဟ်နဒၠောံဗတောန် ခမဳဗြဴဂမၠိုၚ်ရ။ (၇) ပ္ဍဲဗြဴဗိုက်လတက်ယာတ်ဖျောန်ဍာ်လွံက် မရန်တၟံကျာ်တြဲဂှ်တုဲ မသ္ပခမဳဂှ် ဟွံကေၚ်ကလိလောန် အာပတ်မဇၞော်ဇြိုၚ်ရ။ (၈) ကလိၜါစှော်ဝသ်ကီု လောန်လတူၜါစှော်ဝသ်ကီုရ။ ယွံခမဳတအ် တၞဟ်နသၟိတ်ပတိုန် ခမဳမဍိုက်ပေၚ်တဴကေုာံအၚ်္ဂဂမၠိုၚ်ဒ္စာံသာ် ရဴဝွံမ္ဂး ခမဳမလေပ်ဒၠောံဗတောန်ခမဳဗြဴ ဂမၠိုၚ်ဂှ် ကဵုအခေါၚ်ရ ရဴဝွံ သ္ဂးရ။
