၅.၂.၉.၁။ ပွံက်မဟလ္လကဝိဟာရသိက္ခာပိုဒ်
136) ဘာမဇၞော် မ္ဂးဂှ် သ္ဂးတဴဘာမၞုံကဵုတၠ (ဒကာညးမသိုၚ်) ရ။ ဘာ မ္ဂးဂှ် ဘာမဂပ်ဝ်လံက်လေတ်လဝ်ပ္ဍဲအပ္ဍဲကီု ဘာမဂပ်ဝ်လံက်လေတ်လဝ် ပ္ဍဲမ္ၚးကီု ဘာမဂပ်ဝ်လံက်လေတ်လဝ်ပ္ဍဲအပ္ဍဲမ္ၚးကီုရောၚ်။ ဍေံမမိက်ကဵုသိုၚ်ခၞံ မ္ဂးဂှ် သိုၚ်ခၞံကီု ဖအောဝ်ကဵုကဵုသိုၚ်ခၞံကီု။ စဵုကဵုစိုပ်တိုၚ်တြၚ် မ္ဂးဂှ် နူပွဳပွူတိုၚ်တြၚ် စဵုကဵုစိုပ်ဟတ္ထပါသ်ၜါဟတ်မွဲဍ။ တၞဟ်နစွံပတန်သၠတြၚ် မ္ဂးဂှ် တၞဟ်နစွံပတန်သၠတြၚ် ဗွဲမဗိုန်ဗတ်မသက္ကုကသဳ။ တၞဟ်နသ္ပပရိကမ်လံက်လေတ် သၠတြၚ်ဗတၚ်ကျာ မ္ဂးဂှ် တၞဟ်နလံက်လေတ် သၠတြၚ် ဗတၚ်ကျာ သာ်ဗု သာ်လမ္စံက် ပွမကဠိတ်ကဠောတ် နဆီတၟံ (တိကမၠေတ်ဗကေတ်) ကသဴပ္ကဴ ကသဴဇုက် ၚေက်ကမၚ်ကရ် ပွမသ္ပညံၚ်ပၞေတ်တဲမသုန်တၞုၚ်ဂွံပြာကဋ်ဂမၠိုၚ်ရောၚ်။ ပွမစၟဳၜါကွိုန် ပိကွိုန် ဒတူဒၟံၚ်ပ္ဍဲဌာန်ဟၟဲကဵုဩောံၜဲ မလမ္စံက်ဍိုပ်ဍဴတုဲ ဂပ်ဝပ် စဳရေၚ်ရ မ္ဂးဂှ် ဩောံၜဲမလမ္စံက်ဍိုပ်ဍဴမ္ဂးဂှ် ဂကူဩောံ ဂကူၜဲရောၚ်၊ ဒတူဒၟံၚ် ပ္ဍဲဌာန်မၞုံကဵုဩောံၜဲ မလမ္စံက်ဍိုပ်ဍဴတုဲ ဂပ်ဝ်စဳရေၚ်မ္ဂး၊ ဒးအာပတ်ဒုက္ကဋ်ရ။ ကုခမဳမစၟဳ နဂၠံၚ် (ကွိုန်) တပ်တပ် စဳရေၚ်ၜါဂၠံၚ် (ၜါကွိုန်) ဂမၠိုၚ်တုဲ ဂၠံၚ်မရနုက်ကဵုပိကွိုန်ဂှ် (ဩဝ်သ္ပရဴဝွံညိ ရဴဝွံ) ဖအောဝ်စကာတုဲ ဂပ်ဝ်ဒးပဲါစ္ဍးအာရ၊ ကုခမဳ နလၟေၚ်အထပ်မခ္ဍမ်ဂှ် စဳရေၚ် လၟေၚ်အထပ် မခ္ဍမ်ၜါဂမၠိုၚ်တုဲ လၟေၚ်အထပ်မခ္ဍမ်မရနုက်ကဵုပိဂှ် (ဩဝ်သ္ပရဴဝွံညိ ရဴဝွံ) ဖအောဝ်စကာတုဲ ဂပ်ဝ်ဒးပဲါစ္ဍးအာရ။
137) လတူပွမစၟဳၜါကွိုန် ပိကွိုန်ဂှ် ဒတူဒၟံၚ် ပ္ဍဲဌာန်ဟၟဲကဵုဩောံၜဲ မလမ္စံက်ဍိုပ်ဍဴတုဲလေဝ် စဳရေၚ်မ္ဂး မ္ဂးဂှ် ကုခမဳမစၟဳ နကဵုဍိုတ်ဂှ် ဇၟာပ်ဂတှေ်ဍိုတ် ဇၟာပ်ဂတှေ်ဍိုတ် ဒးအာပတ်ပဲါစိုတ်ရ။ ကုခမဳမစၟဳ နကဵုတၟံဂှ် ဇၞာပ်ဂတှေ်တၟံ ဇၟာပ်ဂတှေ်တၟံ ဒးအာပတ်ပဲါစိုတ်ရ။ ကုခမဳမစၟဳ နကဵုအၚ်္ဂဒဵုဂှ် ဇၟာပ်ကဠောံအၚ်္ဂဒဵု ဇၟာပ်ကဠောံအၚ်္ဂဒဵု ဒးအာပတ်ပဲါစိုတ်ရ။ ကုခမဳမစၟဳ နကဵုချောဲဂှ် ဇၟာပ်ကေမ်ချောဲ ဇၟာပ်ကေမ်ချောဲ ဒးအာပတ်ပဲါစိုတ်ရ။ ကုခမဳမစၟဳ နကဵုသၠဆုဂှ် ဇၟာပ်သၠဆု ဇၟာပ်သၠဆု ဒးအာပတ်ပဲါစိုတ်ရ။ ပ္ဍဲအရာလောန်ၜါကွိုန်ပိကွိုန် မၞုံကဵုစၟတ်သမ္တီလောန်ဒှ်တုဲ စဳရေၚ်မ္ဂး၊ ဒးအာပတ်ပဲါစိုတ်ရ။ ပ္ဍဲအရာလောန်ၜါကွိုန် ပိကွိုန် မၞုံကဵုသၠေဟ်ပၟာဒှ်တုဲ စဳရေၚ်မ္ဂး ဒးအာပတ်ပဲါစိုတ်ရ။ ပ္ဍဲအရာလောန်ၜါကွိုန် ပိကွိုန် မၞုံကဵုစၟတ်သမ္တီယုတ်ဒေက်ဒှ်တုဲ စဳရေၚ်မ္ဂး၊ ဒးအာပတ်ပဲါစိုတ်ရ။ ပ္ဍဲအရာယုတ်သၟဝ်ၜါကွိုန် ပိကွိုန် မၞုံကဵုစၟတ်သမ္တီလောန်မ္ဂး၊ ဒးအာပတ်ဒုက္ကဋ်ရ။ ပ္ဍဲအရာ ယုတ်သၟဝ်ၜါကွိုန် ပိကွိုန် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအရာယုတ်သၟဝ်ၜါကွိုန် ပိကွိုန် မၞုံကဵုစၟတ်သမ္တီယုတ်ဒေက်မ္ဂး၊ ဟွံဒးအာပတ်ရ။ 138) ပ္ဍဲပွမမစၟဳၜါကွိုန်ပိကွိုန် ပ္ဍဲပွမစၟဳယုတ်ဒေက်သၟဝ်ၜါကွိုန်ပိကွိုန် ပ္ဍဲလိုဏ် ပ္ဍဲဂိုဟ်ထီု ပ္ဍဲဘာကုဋ်စၟဳသၠ ဟွံဒးအာပတ်ရ၊ ခမဳမသ္ပတၞဟ်နသွက်ညးသအာၚ် ကုခမဳမသ္ပနဂြပ်ဇကု ဟွံဒးအာပတ်ရ၊ ပဲါကၠေံ ဘာသွက်ဂွံပဒတဴတုဲ ပ္ဍဲမပ္တံကဵုရုၚ်ဥပေါသ်အိုဿီု ဟွံဒးအာပတ်ရ၊ ကုခမဳ ကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ မဟလ္လကဝိဟာရသိက္ခာပိုဒ် နဝမတုဲရ။
