၅.၂.၉။ မဟလ္လကဝိဟာရသိက္ခာပိုဒ်
134) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဃောသိတာရာမ် ဇရေၚ်ဍုၚ်ကောသမ္ဗဳဂှ် အမာတ်ဇၞော် မဒှ်ညးကၠောန်ၜိုတ်ဥပကာ တဳလပိုဉ်ဆန္နဂှ် ကဵုသိုၚ်ခၞံဘာ တဳလပိုဉ်ဆန္နရ၊ ပ္ဍဲအခိၚ်ဂှ် တဳလပိုဉ်ဆန္န ကဵုစၟဳတဴ ဘာမသိုၚ်ခၞံလဝ်တုဲထပ်ကဵု ထပ်တုဲ ကဵုလံက်လေတ် ထပ်ကဵုထပ်တုဲ ဘာဂှ် ဟိုတ်မဇြိုၚ်လောန်ဂှ်ရ သရိုဟ်စှေ်ရ။ ပ္ဍဲအခိၚ် တဳလပိုဉ်ဆန္န ပကောံပကေဝ်ချောဲကီု ဆုကီုမ္ဂး ခံက်ဩောံယဴဗဗၞးမွဲ လီုလာ်အာရ၊ ပ္ဍဲအခိၚ်ဂှ် ဗဗၞးဂှ် “မုဟိုတ် တဳလပိုဉ်မပြဲဂမၠိုၚ် ပလီုပလာ်ထောံ ခံက်ဩောံယဴအဲအိုတ်ရော?” ရဴဝွံ ဟီုဂရိုဟ်ရ၊ ပျုတ်ဗ္ဒေက်ရ၊ ဟီုထ္ၜးဒုဟ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်ဗဗၞးဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဆန္န သကဵုစၟဳတဴ ဘာမသိုၚ်ခၞံလဝ်တုဲ ထပ်ကဵုထပ်ရော? သကဵုလံက်လေတ် ထပ်ကဵုထပ်ရော? ဘာဂှ် ဟိုတ်မဇြိုၚ်လောန်ဂှ်ရ သရိုဟ်စှေ်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် တဳလပိုဉ်ဆန္န နုဟိုတ်မဂၠိုၚ်အိုတ်တုဲ ဂရၚ်ပတီဟီုတ်ပရူပရာဝွံ ကုတဳလမၞုံပိုည်ကျာ်တြဲအိုတ်ရ ။ ပ ။ “ယွံဆန္န တၠအဲ သကဵုစၟဳတဴ ဘာမသိုၚ်ခၞံလဝ်တုဲ ထပ်ကဵုထပ်ရ၊ သကဵုလံက်လေတ်ထပ်ကဵုထပ်ရ၊ ဘာဂှ် ဟီုတ်မဇြိုၚ်လောန်ဂှ်ရ သရိုဟ်စှေ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သကဵုစၟဳတဴ ဘာမသိုၚ်ခၞံလဝ်တုဲထပ်ကဵုထပ်ရော? သကဵုလံက်လေတ် ထပ်ကဵုထပ်ရော? ဘာဂှ် ဟိုတ်မဇြိုၚ်လောန်ဂှ်ရ သရိုဟ်စှေ်ရ၊ ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
135) “ခမဳ မမိက်ကဵုသိုၚ်ခၞံ ဘာမဇၞော်ဂှ် စဵုကဵုစိုပ်တိုၚ်တြၚ် တၞဟ်နစွံပတန်သၠတြၚ်, တိုၚ်တြၚ် ဗွဲမဗိုန်ဗတ် မသက္ကုကသဳကီု တၞဟ်နသ္ပပရိကမ်လံက်လေတ် သၠတြၚ် ဗတၚ်ကျာ ဗွဲမခိုၚ်ကၠိုက်ဗိုန်ဗတ်ကီု ဂပ်ဝ်လံက်လေတ်ထပ်ကဵုထပ်ရ၊ ဂပ်ဝ်ကဵုလံက်လေတ် ထပ်ကဵုထပ်ရ၊ ပွမစၟဳၜါကွိုန် ပိကွိုန်ဂှ် ဒတူဒၟံၚ်ပ္ဍဲဌာန်ဟၟဲကဵုဩောံၜဲ မလမ္စံက်ဍိုပ်ဍဴတုဲ ဂပ်ဝ် စဳရေၚ်ရ၊ လတူပွမစၟဳၜါကွိုန် ပိကွိုန်ဂှ် ဒတူဒၟံၚ်ပ္ဍဲဌာန်ဟၟဲကဵုဩောံၜဲ မလမ္စံက်ဍိုပ်ဍဴတုဲလေဝ် စဳရေၚ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
