၅.၂.၈.၁။ ပွံက်ဝေဟာသကုဋိသိက္ခာပိုဒ်

131) ယြဴမ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဘာသၚ် မ္ဂးဂှ် ဘာမဂပ်ဝ်ကဵုလဝ်ဒါန် မဂပ်ဝ်သၠးပွးလဝ် ကုသၚ်ရောၚ်။ ကုဋဳမၞုံကဵုဂၠး မ္ဂးဂှ် ကုဋဳ ဟွံလုက်စုတ်ဒး က္ဍိုပ်'မဇ္ၛိမပုရိသ'တြုံတဲလဒေါဝ်ရောၚ်။ ဇံၚ်မၞုံကဵုဇိုၚ်မပြိုက်လဝ်ပ္ဍဲၝောံ မ္ဂးဂှ် ထ္ပူပထောၚ်ကလိုဟ်လဝ် ပ္ဍဲၝောံတုဲ တန်တဴရ။ ခတဵုမၞုံကဵုဇိုၚ်မပြိုက်လဝ်ပ္ဍဲၝောံ မ္ဂးဂှ် ထ္ပူပထောၚ်ကလိုဟ်လဝ် ပ္ဍဲၝောံတုဲ တန်တဴရ။ ဓလီုဍိုက်တုဲ ဂဇအ် ဍိုက်ဇံၚ်ဂှ်တုဲ ဂဇအ်မ္ဂး၊ ဒးအာပတ်ပဲါစိုတ်ရ။ ဓလီုဍိုက်တုဲ တိက် မ္ဂးဂှ် ဍိုက်ဇံၚ်ဂှ် တိက်မ္ဂး၊ ဒးအာပတ်ပဲါစိုတ်ရ။

132) ပ္ဍဲဘာသၚ် မၞုံကဵုစၟတ်သမ္တီဘာသၚ်ဒှ်တုဲ ပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ်ခတဵုထပ်လတူဏီ ဓလီုဍိုက် ဇံၚ်ကီု ခတဵုကီု မၞုံကဵုဇိုၚ်မပြိုက်လဝ်ပ္ဍဲၝောံတုဲ ဂဇအ်လေဝ်ဂဇအ်မ္ဂး၊ ဓလီုဍိုက်တုဲ တိက်လေဝ်တိက်မ္ဂး၊ ဒးအာပတ်ပဲါစိုတ်ရ။ ပ္ဍဲဘာသၚ် မၞုံကဵုသၠေဟ်ပၟာမ္ဂး ။ ပ ။ ပ္ဍဲဘာသၚ် မၞုံကဵုစၟတ်သမ္တီဘာပူဂိုလ်ဒှ်တုဲ ပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ်ခတဵုထပ်လတူဏီ ဓလီုဍိုက် ဇံၚ်ကီု ခတဵုကီု မၞုံကဵုဇိုၚ်မပြိုက်လဝ်ပ္ဍဲၝောံတုဲ ဂဇအ်လေဝ်ဂဇအ်မ္ဂး၊ ဓလီုဍိုက်တုဲ တိက်လေဝ်တိက်မ္ဂး၊ ဒးအာပတ်ပဲါစိုတ်ရ။ ပ္ဍဲဘာပူဂိုလ် မၞုံကဵုစၟတ်သမ္တီဘာသၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲဘာပူဂိုလ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ဘာပူဂိုလ် ပ္ဍဲအရာမၞုံကဵုစၟတ်သမ္တီဘာပူဂိုလ်ဂှ် ဒှ်ဘာပူဂိုလ် ခမဳသအာၚ်မ္ဂး ဒးအာပတ်ဒုက္ကဋ်ရ။ ဒှ်ဘာဇကုပိုၚ်မ္ဂး၊ ဟွံဒးအာပတ်ရ။

133) ပ္ဍဲကုဋဳ (ဘာကုဋ်) မၞုံကဵုဂၠးလးလဝ်ခတဵုထပ်လတူတုဲကီု၊ ပ္ဍဲကုဋဳ မလုက်စုက်ဒးဟွံဗၠးက္ဍိုပ် ‘မဇ္ၛိမပုရိသ’ တြုံတဲလဒေါဝ်ကီု ဟွံဒးအာပတ်ရ၊ ပ္ဍဲထပ်သၟဝ် ဟွံပြဘိုဂ်သုၚ်စောဲမ္ဂး၊ လးစဳလဝ် ခတဵုမ္ဂး၊ တက်ဂစိုတ်လဝ်နှာဲမ္ဂး၊ (တက်လဝ်ပသဲမ္ဂး) ဒတူပ္ဍဲလတူဇံၚ်ခတဵုဂှ်တုဲ ဂိုၚ်ကေတ် (မမိက်ကဵုမွဲမွဲ)ကီု ကွက်စုတ်ကီု ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ ဝေဟာသကုဋိသိက္ခာပိုဒ် အဋ္ဌမတုဲရ။