၅.၂.၈။ ဝေဟာသကုဋိသိက္ခာပိုဒ်

129) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ်ၜါဇကု ပ္ဍဲဘာသၚ် အပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ်ခတဵုထပ်လတူဏီ ခမဳမွဲဇကု ပဒတဴပ္ဍဲထပ်သၟဝ်တုဲ ခမဳမွဲဇကု သ္ပဒတဴပ္ဍဲထပ်လတူရ။ ခမဳ မသ္ပဒတဴ ပ္ဍဲထပ်လတူဂှ် ဗွဲမပြဟ်ဟေၚ် ဍိုက်ဂဇအ်ဒး ဇံၚ်မၞုံကဵုဇိုၚ်မပြိုက်လဝ် ပ္ဍဲၝောံရ၊ ဇိုၚ်ဇံက်ဂှ် သၠောတ်စှေ်ကၠုၚ်တုဲ ဍိုက်ဒးက္ဍိုပ်ခမဳ မသ္ပဒတဴဒၟံၚ်ပ္ဍဲသၟဝ်ရ၊ ခမဳဂှ် က္ညာၚ်ကရေဲတိုန် ဗွဲမထတ်ရ သ္ပတဴဗရုရမျာၚ်မပၠန်ဂတးရ။ ခမဳဂမၠိုၚ် ဂြိပ်ကၠုၚ်အိုတ်တုဲ ယွံကောန်တၠ တၠအဲ မုဟိုတ် က္ညာၚ်ကရေဲတိုန် ဗွဲမထတ်ရော?” ရဴဝွံ သၟာန်သၟုက်အိုတ်ရ။ ပ္ဍဲအခိၚ်ဂှ် ခမဳဂှ် ဂရၚ်ပတီဟီုလဴဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် မုဟိုတ် ခမဳဂှ် ပ္ဍဲဘာသၚ် အပ္ဍဲကုဋဳ (ဘာကုဋ်) မၞုံကဵုဂၠး ဟွံလးလဝ်ခတဵုလပ်လတူဏီ ဗွဲမပြဟ်ဟေၚ် ဍိုက်ဂဇအ် ဇံၚ်မၞုံကဵုဇိုၚ် မပြိုက်လဝ်လဝ်ပ္ဍဲၝောံရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဂှ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳ တၠအဲ ပ္ဍဲဘာသၚ် အပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ်ခတဵုထပ်လတူဏီ ဗွဲမပြဟ်ဟေၚ် ဍိုက်ဂဇအ် ဇံၚ်မၞုံကဵုဇိုၚ်မပြိုက်လဝ် ပ္ဍဲၝောံရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ ပ္ဍဲဘာသၚ် အပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ် ခတဵုထပ်လတူဏီ ဗွဲမပြဟ်ဟေၚ် ဍိုက်ဂဇအ် ဇံၚ်မၞုံကဵုဇိုၚ်မပြိုက်လဝ်ပ္ဍဲၝောံ? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

130) “ယြဴခမဳမွဲ ပ္ဍဲဘာသၚ် အပ္ဍဲကုဋဳ (ဘာကုဋ်) မၞုံကဵုဂၠးဟွံလးလဝ်ခတဵုထပ်လတူဏီ ဓလီုဍိုက်ဇံၚ်ကီု ခတဵုကီု မၞုံကဵုဇိုၚ်မပြိုက်လဝ်ပ္ဍဲၝောံတုဲ ဂဇအ်လေဝ်ဂဇအ်မ္ဂး၊ ဓလီုဍိုက်တုဲ တိက်လေဝ်တိက်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံသ္ဂးရ)။