၅.၂.၇.၁။ ပွံက်သံဝိဓါနသိက္ခာပိုဒ်
183) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲဥဘတောသၚ်ရောၚ်။ မွဲစွံ မ္ဂးဂှ် မွဲဂကောံဓဝ်ရောၚ်။ ကသေံကၟဝ်တုဲ မ္ဂးဂှ် “ယွံဒေံဗြဴ အာအိုတ်ရ ယွံတဳလပိုဉ် အာအိုတ်ရ၊ ယွံတဳလပိုဉ်အာအိုတ်ရ ယွံဒေံဗြဴ အာအိုတ်ရ၊ ပ္ဍဲတ္ၚဲဏအ်ကီု ပ္ဍဲတ္ၚဲယးကီု ပ္ဍဲကလဳတေံကီု အာအိုတ်ရ” ရဴဝွံ ကသေံကၟဝ်မ္ဂး၊ ဒးအာပတ်ဒုက္ကဋ်ရ။ ဗွဲတွဵုယုတ် ကွာန်မွဲသအာၚ်လေဝ် မ္ဂးဂှ် ပ္ဍဲကွာန်မသ္ၚောဲခရာမွဲစာၚ်ပဝ် ဇၟာပ်ကွာန်မွဲ ဇၟာပ်ကွာန်မွဲ ‘ရိုဟ်ကွာန်မွဲ ရိုဟ်ကွာန်မွဲ’ ဒးအာပတ်ပဲါစိုတ်ရ။ ပ္ဍဲဂြိုပ် မဟွံသေၚ်ကဵုကွာန်ဂှ် ဇၟာပ်ကဝက်ယောဇနာ ဇၟာပ်ကဝက်ယောဇနာ ဒးအာပတ်ပဲါစိုတ်ရ။ ဝေၚ်ကၠေံ အခိၚ်အခါတုဲ မ္ဂးဂှ် ပဲါကၠေံအခိၚ်အခါတုဲ။ ဂၠံၚ်တရဴ ဂပ်ဝ်အာတဴ မွဲဟာန်ကေုာံသာတိုက်သာကွဳ မ္ဂးဂှ် ဂၠံၚ်တရဴဂှ် စာ်မ္ဂးကေုာံသာတိုက်သာကွဳ (သကအ်ရဲညးဗၞိက်) တုဲ ဟွံသၟဟ်ရထတၞဟ်နအာရ။ မၞုံကဵုသၠေဟ်ပၟာ မ္ဂးဂှ် ပ္ဍဲဂၠံၚ်တရဴဂှ် ဌာန်လုပ်ကမၠဒမၠဂမၠိုၚ် ပြာကဋ်ရ၊ ဌာန်စ ပြာကဋ်ရ၊ ဌာန်တန်တဴ ပြာကဋ်ရ၊ ဌာန်ဂဇအ် ပြာကဋ်ရ၊ ဌာန်တိက် ပြာကဋ်ရ။ ဒှ်မွဲဟာန်ကေုာံပရိုက်ဘဲ မ္ဂးဂှ် ပ္ဍဲဂၠံၚ်တရဴဂှ် သ္ဂောံညာတ်ကေတ် ကမၠတ်ဒမၠဂမၠိုၚ် ပြိုက်ဂစိုတ် လဝ်မၞိဟ်ဂမၠိုၚ်အိုတ်ရ၊ သ္ဂောံညာတ်ကေတ် ပၠံၚ်ဗတိုက်ဂမၠိုၚ်အိုတ်ရ၊ သ္ဂောံညာတ်ကေတ် ၜုၚ်တက်ဂမၠိုၚ်အိုတ်ရ၊ အာတဴဂၠံၚ်တရဴ မၞုံကဵုပရိုက်ဘဲမွဲစွံတုဲ ပ္ညုၚ်ထ္ၜးကဵုဂၠံၚ်တရဴ ဟွံမွဲကဵုပရိုက်ဘဲ တုဲ “ယွံဒေံဗြဴတအ် ဩဝ်အာအိုတ်ညိ” ရဴဝွံ (သ္ဂးတုဲ) ဂပ်ဝ်ဗလးကၠေံအိုတ်ရ။
184) ပ္ဍဲအရာကသေံကၟဝ် မၞုံကဵုစၟတ်သမ္တီကသေံကၟဝ်ဒှ်တုဲ သွိုန်ဗပိုန်တဴ တရဴအဓာန်မဂၠိၚ်သ္ၚောဲမွဲဂၠံၚ်ဓဝ်မ္ဂး၊ ဝေၚ်ကၠေံအခိၚ်အခါတုဲ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ ဒးအာပတ်ပဲါစိုတ်ရ။ ပ္ဍဲအရာကသေံကၟဝ် မၞုံကဵုသၠေဟ်ပၟာဒှ်တုဲ သွိုန်ဗပိုန်တဴ တရဴအာဓာန်မဂၠိၚ်သ္ၚောဲ မွဲဂၠံၚ်ဓဝ်မ္ဂး၊ ဝေၚ်ကၠေံအခိၚ်အခါတုဲ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ ဒးအာပတ်ပဲါစိုတ်ရ။ ပ္ဍဲအရာကသေံကၟဝ် မၞုံကဵုစၟတ်သမ္တီဟွံကသေံကၟဝ်ဒှ်တုဲ သွိုန်ဗပိုန်တဴ တရဴအဓာန် မဂၠိၚ်သ္ၚောဲမွဲဂၠံၚ်ဓဝ်မ္ဂး၊ ဝေၚ်ကၠေံအခိၚ်အခါတုဲ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ ဒးအာပတ်ပဲါစိုတ်ရ။
185) (အာ) မွဲအခိၚ်အခါမ္ဂး၊ ဟွံကသေံကၟဝ်တုဲ အာမ္ဂး၊ ခမဳဗြဴ ကသေံကၟဝ်ရ၊ ခမဳတြုံ ဟွံကသေံကၟဝ်မ္ဂး၊ ပွမချိၚ်ဖာပ် ဆောတ်ယောၚ်တုဲ အာအိုတ်မ္ဂး၊ ဟိုတ်နူပရိုက်ဘဲဂမၠိုၚ်အာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သံဝိဓာနသိက္ခာပိုဒ် သတ္တမတုဲရ။
