၅.၂.၇.၁။ ပွံက်နိက္ကဍ္ဎနသိက္ခာပိုဒ်
126) ယြဴမ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳ မ္ဂး ခမဳသအာၚ် (မသအာၚ်နူဇကု)။ ထေဲပၞတ်သတိုတ် ဟွံမိပ်စိုတ်ဒှ်တုဲ မ္ဂးဂှ် မၞုံစိုတ်ဟွံမိပ်လဟိၚ်ဒှ်တုဲ မၞုံစိုတ်မဒွံလုက်စုတ်(ထ္ဍိမြိ)ဒးဒှ်တုဲ မၞုံစိုတ်မကတဵုဒှ် ညံၚ်ကၞက်စရံၚ်ဒှ်တုဲ။ ဘာသၚ် မ္ဂးဂှ် ဘာမဂပ်ဝ်ကဵုလဝ်ဒါန် မဂပ်ဝ်သၠးပွးလဝ် ကုသၚ်ရောၚ်။ ဗက်ဗ္ဒဴထောံ မ္ဂးဂှ် ဂန်ရပ်ကေတ်မပ္တံတဲ ပ္ဍဲဂၠမ်တုဲ ဗက်ဗ္ဒဴထောံ က္ဍိုပ်ဘာမ္ဂး၊ (ကေတ်ကၟေၚ်ကျာညိ)၊ ဒးအာပတ်ပဲါစိုတ်ရ။ ဂန်ရပ်ကေတ်မပ္တံတဲ ပ္ဍဲက္ဍိုပ်ဘာတုဲ ဗက်ဗ္ဒဴထောံ မ္ၚးမ္ဂး၊ ဒးအာပတ်ပဲါစိုတ်ရ။ နပယောဂလွဳပရာမွဲဝါ တြၚ်ဂမၠိုၚ်ဗွဲမဂၠိုၚ်လေဝ် ကဵုကလိလောန်မ္ဂး၊ ဒးအာပတ်ပဲါစိုတ်ရ။ ဖအောဝ်ကဵုဗက်ဗ္ဒဴထောံ မ္ဂးဂှ် ဖအောဝ်ကဵုညးသအာၚ်မ္ဂး၊ ဒးအာပတ်ဒုက္ကဋ်ရ။ နပွမဖအောဝ် စကာမွဲ တြၚ်ဂမၠိုၚ်ဗွဲမဂၠိုၚ်လေဝ် ကဵုကလိလောန်မ္ဂး၊ ဒးအာပတ်ပဲါစိုတ်ရ။
127) ပ္ဍဲဘာသၚ် သီုမၞုံကဵုစၟတ်သမ္တီဘာသၚ် ထေဲပၞတ်သတိုတ် ဟွံမိပ်စိုတ်ဒှ်တုဲ အလဵုဇကု ဗက်ဗ္ဒဴထောံကီု ဖအောဝ်ကဵုညးသအာၚ်ဗက်ဗ္ဒဴထောံကီုမ္ဂး၊ ဒးအာပတ်ပဲါစိုတ်ရ။ ပ္ဍဲဘာသၚ် မၞုံကဵုသၠေဟ်ပၟာဒှ်တုဲ ထေဲပၞတ်သတိုတ် ဟွံမိပ်စိုတ်ဒှ်တုဲ အလဵုဇကု ဗက်ဗ္ဒဴထောံကီု ဖအောဝ်ကဵုညးသအာၚ်ဗက်ဗ္ဒဴထောံကီုမ္ဂး၊ ဒးအာပတ်ပဲါစိုတ်ရ။ ပ္ဍဲဘာသၚ် သီုမၞုံကဵုစၟတ်သမ္တီ ဘာပူဂိုလ် ထေဲပၞတ်သတိုတ် ဟွံမိပ်စိုတ်ဒှ်တုဲ အလဵုဇကု ဗက်ဗ္ဒဴထောံကီု ဖအောဝ်ကဵုညးသအာၚ် ဗက်ဗ္ဒဴထောံကီုမ္ဂး ဒးအာပတ်ပဲါစိုတ်ရ။ ပရိက္ခရာခမဳဂှ် အလဵုဇကု တံၚ်ဓဇက်ပတိတ်ကီု ဖအောဝ်ကဵုညးသအာၚ် တံၚ်ဓဇက်ပတိတ်ကီု ဒးအာပတ်ဒုက္ကဋ်ရ။ ဗက်ဗ္ဒဴထောံ နူဥပစာဘာကီု နူဇြပ်ကောံဓရီုကီု နူကၞာထးကီု နူသၟဝ်တမ်ဆုကီု နူအမှဲအကးကီု ဖအောဝ်ကဵုညးသအာၚ် ဗက်ဗ္ဒဴထောံကီုမ္ဂး၊ ဒးအာပတ်ဒုက္ကဋ်ရ။ ပရိက္ခရာခမဳဂှ် တံၚ်ဓဇက်ပတိတ်ကီု ဖအောဝ်ကဵုတံၚ်ဓဇက်ပတိတ်ကီု ဒးအာပတ်ဒုက္ကဋ်ရ။ ဗက်ဗ္ဒဴထောံ ခရှ်သာမဏဳမဟွံသေၚ်ကဵုခမဳ နူဘာကီု နူဥပစာဘာကီု နူဇြပ်ကောံဓရီုကီု နူကၞာထးကီု နူသၟဝ်တမ်ဆုကီု နူအမှဲအကးကီု ဖအောဝ်ကဵုဗက်ဗ္ဒဴထောံကီုမ္ဂး၊ ဒးအာပတ်ဒုက္ကဋ်ရ။ ပရိက္ခရာ ညးဟွံသေၚ်ကဵုခမဳဂှ် တံၚ်ဓဇက်ပတိတ်ကီု ဖအောဝ်ကဵုတံၚ်ဓဇက်ပတိတ်ကီု ဒးအာပတ်ဒုက္ကဋ်ရ။ ပ္ဍဲဘာပူဂိုလ် မၞုံကဵုစၟတ်သမ္တီဘာသၚ်မ္ဂး၊ ဒးအာပတ်ဒုက္ကဋ်။ ပ္ဍဲဘာပူဂိုလ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်။ ဘာပူဂိုလ် ပ္ဍဲအရာမၞုံကဵုစၟတ်သမ္တီဘာပူဂိုလ်ဂှ် ဒှ်ဘာပူဂိုလ် ခမဳသအာၚ်မ္ဂး ဒးအာပတ်ဒုက္ကဋ်ရ။ ဒှ်ဘာဇကုပိုၚ်မ္ဂး၊ ဟွံဒးအာပတ်ရ။
128) ဗက်ဗ္ဒဴထောံ ပူဂိုလ်အလဇ္ဇဳ ‘မဟွံဂွပါပ် နူပွသရာံပါပ်’ ကီု ဖအောဝ်ကဵုဗက်ဗ္ဒဴထောံကီု၊ ပရိက္ခရာပူဂိုလ်ဂှ် တံၚ်ဓဇက်ပတိတ်ကီု ဖအောဝ်ကဵုတံၚ်ဓဇက်ပတိတ်ကီု ဟွံဒးအာပတ်ရ။ ဗက်ဗ္ဒဴထောံ ညးကြအ်ကြအ်ကီု ဖအောဝ်ကဵုဗက်ဗ္ဒဴထောံကီု၊ ပရိက္ခရာညးကြအ်ကြအ်ဂှ် တံၚ်ဓဇက်ပတိတ်ကီု ဖအောဝ်ကဵုတံၚ်ဓဇက်ပတိတ်ကီု ဟွံဒးအာပတ်ရ။ ဗက်ဗ္ဒဴထောံ ခမဳ မလေပ်ကတဵုဒှ်သေက်ဇဵု လေပ်ကယျာန်ဓဝါတ် လေပ်ဟီုဂလာန်စှေ်စး လေပ်အရေဝ်ဂၠိုၚ် လေပ်ကတဵုဗဒှ်ကဵုအဓိကိုရ် ပ္ဍဲသၚ်ကီု ဖအောဝ်ကဵုဗက်ဗ္ဒဴထောံကီု၊ ပရိက္ခရာခမဳဂှ် တံၚ်ဓဇက်ပတိတ်ကီု ဖအောဝ်ကဵုတံၚ်ဓဇက်ပတိတ် ဟွံဒးအာပတ်ရ။ ဗက်ဗ္ဒဴထောံ အန္တေဝါသိက'ကွးပဒတဴဇရေၚ် သဒ္ဓိဝိဟာရိက ကွးပဒတဴမွဲစွံ မဟွံဒ္ဂေတ်သ္ပဝတ်အ္စာ ဥပဇ္ၛာယ် ဗွဲမဒးရးကီု ဖအောဝ်ကဵုတံၚ်ဓဇက်ပတိတ်ကီု ဟွံဒးအာပတ်ရ။ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ နိက္ကဍ္ဎနသိက္ခာပိုဒ် သတ္တမတုဲရ။
