၅.၂.၇။ နိက္ကဍ္ဎနသိက္ခာပိုဒ်
124) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳသတ္တရသဝဂ္ဂဳဂမၠိုၚ် “ပိုဲညးဂမၠိုၚ် ကြက်ပြာပ်လုပ်ဒဂိုန် ပ္ဍဲဘာဇၞော်ဝွံအိုတ်ရ ” ရဴဝွံ ပဠေဝ်ပဠေတ်တဴ ဘာဇၞော်မွဲဘာ မဒှ်တၞုၚ်တၞးအိုတ်ရ။ ခမဳဆဗ္ဗဂ္ဂဳဂမၠိုၚ် ညာတ်ကေတ် ခမဳသတ္တရသဝဂ္ဂဳဂမၠိုၚ် ပဠေဝ်ပဠေတ်တဴဘာတုဲ “ယွံကောန်တၠတအ် ခမဳသတ္တရသဝဂ္ဂဳဂမၠိုၚ် ပဠေဝ်ပဠေတ်တဴဘာအိုတ်ရ။ ကြက်ကဵုခမဳဂမၠိုၚ်ဂှ် တိတ်အာလၟုဟ်အိုတ်ရ” ရဴဝွံ ဟီုသ္ဂးအိုတ်ရ။ ခမဳဆဗ္ဗဂ္ဂဳဂမၠိုၚ်လ္ၚဵုဂှ် “ယွံကောန်တၠတအ် စဵုကဵုပဠေဝ်ပဠေတ်တုဲဒှ် ဩဝ်လၟတ်မၚ်ဒၟံၚ်အိုတ်ညိကၠာ၊ ပဠေဝ်ပဠေတ်တုဲမှ ကြက်ကဵုတိတ်အာအိုတ်ရ” ရဴဝွံ ဟီုသ္ဂးအိုတ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ယွံကောန်တၠတအ် ဩဝ်တိတ်အာအိုတ်ညိ၊ ဘာဂှ်ဒှ်သွက်ပိုဲညးဂမၠိုၚ်ရ” ရဴဝွံ ဟီုသ္ဂးကဵု ခမဳသတ္တရသဝဂ္ဂဳဂမၠိုၚ်အိုတ်ရ။ ယွံကောန်တၠတအ် ပြဟ်ပြဟ်ဟေၚ် ထေက်ကဵုဒးဟီုလဴဗ္စရ ဟွံသေၚ်ဟာ၊ ပိုဲညးဂမၠိုၚ်လေဝ် ပဠေဝ်ပဠေတ်ဘာမွဲသအာၚ်မာန်အိုတ်ရ ရဴဝွံ (ဟီုသ္ဂးအိုတ်မ္ဂး)၊ ယွံကောန်တၠတအ် ဘာသၚ် ဟွံသေၚ်ဟာ ရဴဝွံ (သၟာန်အိုတ်ရ)။ ယွံကောန်တၠတအ် ဘာသၚ် ဍာံပြရ ရဴဝွံ (ဟီုသ္ဂးအိုတ်မ္ဂး)— “ယွံကောန်တၠတအ် ဩဝ်တိတ်အာအိုတ်ညိ၊ ဘာဂှ် ဒှ်သွက်ပိုဲညးဂမၠိုၚ်ရ” ရဴဝွံ (ဟီုသ္ဂးအိုတ်ရ)။ ယွံကောန်တၠတအ် ဘာဂှ် ဇၞော်လှဲရ၊ မၞးတအ်ညးဂမၠိုၚ်လေဝ် ဩဝ်ပဒတဴအိုတ်ညိ၊ ပိုဲညးဂမၠိုၚ်လေဝ် ပဒတဴအိုတ်ရ ရဴဝွံ (ဟီုသ္ဂးတိုန်အိုတ်ပၠန်မ္ဂး)— “ယွံကောန်တၠတအ် ဩဝ်တိတ်အာအိုတ်ညိ၊ ဘာဂှ် ဒှ်သွက်ပိုဲညးဂမၠိုၚ်ရ” ရဴဝွံ ဟီုသ္ဂးတုဲ ထေဲပၞတ်သတိုတ် ဟွံမိပ်စိုတ်ဒှ်တုဲ ဂန်ရပ်ကေတ် တမ်ကအ်တုဲမ္ဂး ဗက်ဗ္ဒဴထောံအိုတ်ရ၊ ခမဳသတ္တရသဝဂ္ဂဳဂမၠိုၚ်ဂှ် ဟိုတ်မဒးဒုၚ်ဗက်ဗ္ဒဴထောံဂှ်ရ လရိုအ်ယာံဒၟံၚ်အိုတ်ရ။ ခမဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ်လရိုအ်ယာံဒၟံၚ်အိုတ်ဂှ်ရော?” ရဴဝွံ သၟာန်အိုတ်ရ။ ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ ထေဲပၞတ်သတိုတ် ဟွံမိပ်စိုတ်ဒှ်တုဲ ဗက်ဗ္ဒဴထောံပိုဲညးဂမၠိုၚ် နူဘာသၚ်အိုတ်ရ ရဴဝွံ (ကလေၚ်ဟီုလဴထ္ၜးအိုတ်ရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ထေဲပၞတ်သတိုတ် ဟွံမိပ်စိုတ်ဒှ်တုဲ ဗက်ဗ္ဒဴထောံ ခမဳဂမၠိုၚ် နူဘာသၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳဆဗ္ဗဂ္ဂဳဂမၠိုၚ် နဟိုတ်မဂၠိုၚ်အိုတ်တုဲ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ထေဲပၞတ်သတိုတ် ဟွံမိပ်စိုတ်ဒှ်တုဲ ဗက်ဗ္ဒဴထောံခမဳဂမၠိုၚ် နူဘာသၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်ထေဲပၞတ်သတိုတ် ဟွံမိပ်စိုတ်ဒှ်တုဲ ဗက်ဗ္ဒဴထောံခမဳဂမၠိုၚ် နူဘာသၚ်အိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
125) “ယြဴခမဳမွဲ ထေဲပၞတ်သတိုတ် ဟွံမိပ်စိုတ်ဒှ်တုဲ ဗက်ဗ္ဒဴထောံ ခမဳသအာၚ် နူဘာသၚ်မ္ဂး၊ ဖအောဝ်ကဵုဗက်ဗ္ဒဴထောံမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံသ္ဂးရ)။
