၅.၂.၆.၁။ ပွံက်အနုပခဇ္ဇသိက္ခာပိုဒ်

121) ယြဴမ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဘာသၚ် မ္ဂးဂှ် ဘာမဂပ်ဝ်ကဵုလဝ်ဒါန် မဂပ်ဝ်သၠးပွးလဝ် ကုသၚ်ရောၚ်။ တီရ မ္ဂးဂှ် တီတဴ ရဴဝွံမ္ဂး ခမဳဇၞော် 'ညးဝှ်သိက္ခာဇၞော်'ရ၊ တီတဴ ရဴဝွံမ္ဂး ညးဂိယဲရ၊ တီတဴ ရဴဝွံမ္ဂး ညးသၚ်မဂပ်ဝ်ကဵုလဝ်ရ။ ဃရိတ်ခတ်တုဲ မ္ဂးဂှ် ၜေတ်လုပ်ဇရေၚ်တုဲ။ သ္ပတဴ ပွမတိက် မ္ဂးဂှ် လးတဴသၞာသတိက်သၞာဒၟံၚ် ပ္ဍဲဇရေၚ်ဥပစာ ဇံၚ်ကီု ခတဵုကီု ခမဳလုပ်ကီု ခမဳတိတ်ကီု ဖအောဝ်ကဵုလးကီု ဒးအာပတ်ဒုက္ကဋ်ရ။ ဂဇအ်လေဝ်ဂဇအ်မ္ဂး၊ တိက်လေဝ် တိက်မ္ဂး၊ ဒးအာပတ်ဒုက္ကဋ်ရ။ သီုဟွံမွဲကဵုဟိုတ်မွဲသအာၚ် သ္ပဟိုတ်ကဵုပွမမိက်ကဵုစာ်စ္ဍးအာဟေၚ်တုဲ မ္ဂးဂှ် ဃရိတ်ခတ်တုဲ တၞဟ်နတိက် ဟိုတ်မမိက်ကဵုမွဲမွဲ ဟွံမွဲရ။

122) ပ္ဍဲဘာသၚ် သီုမၞုံကဵုစၟတ်သမ္တီဘာသၚ် ဃရိတ်ခတ်တုဲ တိက်မ္ဂး၊ ဒးအာပတ်ပဲါစိုတ်ရ။ ပ္ဍဲဘာသၚ် မၞုံကဵုသၠေဟ်ပၟာဒှ်တုဲ ဃရိတ်ခတ်တုဲ တိက်မ္ဂး၊ ဒးအာပတ်ပဲါစိုတ်ရ။ ပ္ဍဲဘာသၚ် သီုမၞုံကဵုစၟတ်သမ္တီဘာပူဂိုလ် ဃရိတ်ခတ်တုဲ တိက်မ္ဂး၊ ဒးအာပတ်ပဲါစိုတ်ရ။ ပဲါကၠေံ ဇရေၚ်ဥပစာ ‘ပွဳပွူၜါဟတ်မွဲက္ဍ’ ဇံၚ်ကီု ခတဵုကီု ခမဳလုပ်ကီု ခမဳတိတ်ကီုတုဲ လးသၞာသတိက်သၞာဒၟံၚ်ကီု ဖအောဝ်ကဵုလးကီု ဒးပးအာပတ်ဒုက္ကဋ်ရ။ ဂဇအ်ကီု တိက်ကီု ဒးအာပတ်ဒုက္ကဋ်ရ။ ပ္ဍဲဥပစာဘာကီု ပ္ဍဲဇြပ်ကောံဓရီုကီု ပ္ဍဲကၞာထးကီု ပ္ဍဲသၟဝ်တမ်ဆုကီု ပ္ဍဲအမှဲအကးကီု လးသၞာသတိက်သၞာဒၟံၚ်ကီု ဖအောဝ်ကဵုလးကီု ဒးအာပတ်ဒုက္ကဋ်ရ။ ဂဇအ်ကီု တိက်ကီု ဒးအာပတ်ဒုက္ကဋ်ရ။ ပ္ဍဲဘာပူဂိုလ် မၞုံကဵုစၟတ်သမ္တီဘာသၚ်မ္ဂး၊ ဒးအာပတ်ဒုက္ကဋ်ရ။ ပ္ဍဲဘာပူဂိုလ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ဘာပူဂိုလ် ပ္ဍဲအရာမၞုံကဵုစၟတ်သမ္တီ ဘာပူဂိုလ်ဂှ် ဒှ်ဘာပူဂိုလ်သအာၚ်မ္ဂး ဒးအာပတ်ဒုက္ကဋ်ရ။ ဒှ်ဘာဇကုပိုၚ်မ္ဂး၊ ဟွံဒးအာပတ်ရ။

123) ဂိယဲ လုပ်ပဒတဴမ္ဂး၊ ပရိုက်လၟုဟ်ပရိုက်မ္တဴ ပ္ဍဵုပ္ဍိုက်တုဲ လုပ်ပဒတဴမ္ဂး၊ ဟွံဒးအာပတ်ရ၊ ခမဳလုပ်ပဒတဴ ဟိုတ်နူပရိုက်ဘဲ ကုခမဳကြအ်ဥမ္မတ် ခမဳကလိလောန်ကၠာတဲ ဟွံဒးအာပတ်ရ။ အနုပခဇ္ဇသိက္ခာပိုဒ် ဆဋ္ဌတုဲရ။